N’en nib Muun ko Ngan Nang Fithingan Got

BAY fan fithingam, fa? Rogon e yalen u yu yang u fayleng, e ngan tunguy fithingan e bitir ni bay fan. Fare ngachal ni kan mel’eg e be dag e pi n’en ni ke michan’ fagal labthir ngay, nge pi n’en nib ga’ fan u wan’row, nge athap rorow, nge n’en ni yow be lemnag ni fan ngak fare tir ko gabul nge langlath.

Gathi fin chiney e yima tunguy fithingan e girdi’ ni bay fan. Kakrom, e yima tunguy fithingan e girdi’ ni bay fan. Ku yima tunguy fithingan e girdi’ ni nge m’ag ngak. Bod nnap’an ni yog Jehovah ngak David rarogon e maruwel nra rin’ Solomon ni fak, Me gaar: “I Solomon fithingan [ni yib u bbugithin ni be yip’ fan e “Gapas”], ya n’umngin nap’an ni ir e be gagiyeg e bay gu pi’ e gapas nga Israel mu gu yororiy paag ngorad.”​—1 Kronicles 22:9, BT.

Yu ngiyal’ e ma pi’ Jehovah reb e ngachal ngak be’ ni be yip’ fan reb e liw ni bay fini yan ngay. Fare pin ni leengin Abraham nder diyen e ni tunguy Sarah ngak ni be yip’ fan “Be’ nib Pin ni Fak e Pilung.” Mang fan? I weliy Jehovah fan ni gaar: “Bay gu fal’eg waathan nge gargeleg bochi pagel ni fakam. Bay gu fal’eg waathan nge mang chitiningin boor e nam, ma piin ni bay ra bad ni owchen e ba’ boch i yad ni bayi mang pilung.” (Genesis 17:16) Ere ba tamilang ni faan gad ra nang fan ni kan tunguy reb e ngachal nib beech ngak Sarah, ma gad ra nang ko mang e maruwel ni kan pi’ ngak.

Ma uw rogon fa bin th’abi ga’ fan e ngachal ni Jehovah? Mang e be yip’ fan? Nap’an ni fith Moses ngak Jehovah fan Fithingan, me fulweg ni gaar: “I gag e en ni gag.” (Exodus 3:14) Fithingan Jehovah e be dag ni ir reb e Got ni boor e liw rok. Baaray rogon nra ngan susunnag: Boor ban’en nthingari rin’ reb e matin ya nge ayuweg pi fak ni bod ni nge lum, ma be skulnagrad, ni be yan u rogon e n’en nib t’uf rorad u reb e rran ngu reb. Ere ku taareb rogon ngak Jehovah, machane kab gel e tolang ko birok e ngachal. Rayog ni nge mang e n’en ni baadag ara ba t’uf ni nge mang, ni fan e nge lebguy e n’en nib m’agan’ ngay ni fan ko girdi’. Machane, faanra ngari fel’ thildad Jehovah, mab muun ngay ni ngkun nang min tay fan e liw rok ni boor.

Piin ni dariy e tha’ u thilrad Got e dar nanged pi fel’ngin. Machane, faan ga ra fil e Bible ma rayog ni nge ga’ fan u wan’um boch e liw rok ni bod e Tafonow, Taayuw nib Gel Gelngin, nge En Ma Pi’ e Tin nib T’uf. Ere rriyul’ ni yira ngat nga fan e ngachal rok Jehovah.

Machane, de mom ni nge fel’ thildad Got. Bin migid e thin e ra weliy fan.