Uw Rogon e Gafgow nib Gel?

GAFGOW nib gel e be magawonnag e yafos ko girdi’. Re n’ey e be yip’ fan ni ke gafgow e girdi’ ni bochan e der gaman e ggan nge ran nge l’ud nge kerosin nge gin ni ngan par riy nge tafalay nge skul. Taareb e bilyon e girdi’ ni ke yib e magawon ngorad ni aram rogon, ere re n’ey e sogonap’an taareb rogon urngin ko girdi’ nu Africa. Machane ba ga’ ni pi binaw u Western Europe nge North America e dariy be’ ni yad manang ni ke yib e gafgow ngak ni aram rogon. Ere chiney e ngad weliyed murung’agen boch i pi girdi’ ney.

Mbarushimana nge ppin rok nge lal e bitir rorow e yad ma par u Rwanda, Africa. Bin nel’ e bitir rorow e ke yim’ ko m’ar ni malaria. I yog Mbarushimana ni gaar: “Chitamag e ke kieg e binaw rok ni nel’ yang. Ma gin ni kan pi’ ngog e rib achig, ere rib t’uf ni nggu warod chon e tabinaw rog nggu pared nga reb e binaw. Maruwel romow e ppin rog e gamow ma gochowriy yu tutuw i malang nge yan’. Naun romad e dariy e winda riy. Gamad ma fek e ran u lan ba luwed u tafen e polis. Ba ga’ ni kemus ni taab yay u reb e rran e gamad ma abich, machane faanra dariy e maruwel ma dariy e ggan romad u reb e rran. Faanra buch ni aram rogon ma gu ma yan nga bang, ya dabug ni nggu rung’ag laman e bitir rog ni yad be yornag e bilig.”

Victor nge Carmen e maruwel rorow e yow ma ngongliy e sus. Yad ma par lal e bitir rorow u reb e binaw u Bolivia. Yad ma pi’ puluwon reb e singgil u ba naun ni ma lul’ e chig riy, maku dariy e gamig riy. Bay bochi buliyel rok Victor ni nge un nga skul mab t’uf ni nge fal’eg reb e tebel ni fan ko re tir nem ya boor e bitir ni ma un ko re skul nem. Victor nge Carmen e thingar ranow u but’ ni nel’ e mayel ya nge yog ni ngar th’abew e l’ud ni fan ko lum. I gaar Carmen: “Dariy e kolosis romad, ere gamad ma sor ko lul’ maku aram e gin ni gamad ma maluk riy maku yima n’ag e dow ngay. Ba mom ni nge yib e mar ko bitir.”

Francisco nge Ilídia e yow ma par nib palog u reb e binaw u Mozambique. Aningeg e bitir rorow ni kab fas ma reb e ke yim’ ko fare m’ar ni malaria ya de pag e aspital ni ngan tay nga naun ngan tafalaynag. Yow ma yung e komey nge kamot ni fan ngorad u lan dalip e pul. I yog Francisco ni gaar: “Yu ngiyal’ e der ma aw e n’uw ara yima iring e woldug romow, ere gu ma th’ab boch e mor nggu fal’eg boch ban’en riy ni fan ko dimow naun nggu pi’ ni chuway’ ya nge yog e salpiy riy. L’agruw e awa n’umngin nap’an ni gamow ma yan u but’ mfin gu tawgow ko gin ni bay e l’ud riy. Ma ra bagamow me fek taab thum e l’ud, nreb e fan ko lum u lan reb e wik ma reb e nggu piew ni chuway’.”

Boor e girdi’ ni yad be lemnag ni bay e magawon nib gel ya ra medlip e girdi’ ma taabe’ u fithik’ e ba gafgow ni bod Mbarushimana nge Victor nge Francisco ma bokum bilyon e girdi’ e ba fel’ rogon e par rorad. Boch e girdi’ e kar guyed rogon ni ngar pithiged e re magawon ney. Bin migid e article e ra weliy murung’agen e athamgil nge athap rorad.

[Picture on page 3]

Carmen nge l’agruw e bitir rok ni yad be fek e ran ko lul’