LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w98 4/1 pp. 3-7
  • Ba Gafgow Machane Ba Fel’–Rogon Uw Rogon Nrayog?

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Ba Gafgow Machane Ba Fel’–Rogon Uw Rogon Nrayog?
  • Fare Wulyang Ntagil’ E Damit Ni Be Weliy Morngaagen Gil’ilungun Jehovah—1998
  • Pi Subheading
  • Boch Ban'en ni Ku Taareb Rogon Ngay
  • Piin nib Yul’yul’ Nkakrom
  • Nguun Par nib Yul’yul’
  • Ngan Gel ko Mulan’uy
  • Gelngin e Meybil
  • Baga’ Fan e Fol Bible
  • Ngan Skulnag e Bitir Nge Yog e Yafas ni Manemus Ngorad
  • Nguun Lemnag ni Ngan Pi’ Ban’en
  • Ngan Madangdang
  • Ma Ayuweg Jehovah e Girdi’ Rok
  • Ba Fayleng NI Dariy e Gafgow Riy e Ke Chugur
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2005
  • Gafgow Ngan Pithig E Re Magawon Ney Ni Manemus
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2004
  • Mu Felfelan’ ko Maruwel Rom
    Rogon ni Ngad Pared ni Gad Ba T’uf rok Got
  • Uw Feni Mudugil E Pagan’ Rom Ngak Got?
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2006
Fare Wulyang Ntagil’ E Damit Ni Be Weliy Morngaagen Gil’ilungun Jehovah—1998
w98 4/1 pp. 3-7

Ba Gafgow Machane Ba Fel’​–Rogon Uw Rogon Nrayog?

Bokum miriay e duw faram me yibilay reb e moon nib gonop ni dabi gafgow. Mang fan ni ke ning e re n’em? Ya ke rus ni faan ra gafgow ma sana ra lemnag boch ban’en ara ra rin’ boch ban’en ni ra kirebnag thilrow Got. Aram e n’en ni be tamilangnag e pi thin ney ni be gaar: “Mpag ni nggu way e ggan ni fan ngog . . . ni aram e dab gu un ko gafgow ma dab gu iring ban’en me kirebnag e ngochol rok Got.”​—PROVERBS 30:8, 9.

PI thin ney e be tamilangnag ni dabiyog ku be’ nib gafgow ni nge pigpig ku Got u fithik’ e yul’yul’ fa? Ri danga! Ya chepin e girdi’ e be dag ni boor e tapigpig rok Jehovah Got e ur pared nib yul’yul’ ngak ni yugu aram rogon ni yad ba gafgow. Ma ma t’ufeg Jehovah e piin ni ma pagan’ ngak ma ma pi’ e ayuw ngorad.

Piin nib Yul’yul’ Nkakrom

Yu ngiyal’ ma immoy apostal Paul nib gafgow. (2 Korinth 6:3, 4) Miki weliy u morngaagen e pi mich rok Got u m’on ko ngiyal’ ko Kristiano ni yad boor ni bod e ‘manileng nib ga’’ ma boch i yad e “uranod i yan ni keru’ e saf nge kaming e ka ron’ed ni mad, ni kar gafgowgad . . . Ma uranod u daken e ted i yan nge yungi n’en ndabi tugul ban’en riy, ma yad be par u lan e yiy nge low u tan e but’.”​—Hebrews 11:37, 38; 12:1.

Bagayad e pi cha’ ney nib yul’yul’ e Elijah ni profet. Nap’an e dalip nge baley e duw ni der aw e n’uw, me pi’ Jehovah e ggan ngak. Som’on me n’igin Got ni nge yib e arche’ ni raven ni nguur feked e flowa nge thum’ag iyib ngak. (1 Kings 17:2-6) Me munmun mu daken e maangang me n’igin Jehovah ndabi m’ay e merikenko nge oil ku be’ ni ppin ni kem’ figirngin ni ke ayuweg Elijah. (1 Kings 17:8-16) Fare ggan e gathi tin th’abi fel’ machane ke par fare profet nge fare ppin nge fare pagal ni fak ni yad ba fas.

Ku arrogon ni ke ayuweg Jehovah Jeremiah ni profet nib yul’yul’ u nap’an ni ke gafgow. Ke magay Jeremiah nib fas u nap’an ni cham yu Babylon ngak yu Jerusalem, ma girdi’ riy e thingara “ked e flowa ni kan fek malngin ma yad be ayuweg.” (Ezekiel 4:16) Ma munmun ma kari gel e uyungol u lan e re mach nem ma aram me kay boch e ppin e ufin ko bitir rorad. (Lamentations 2:20) Yugu aram rogon ni immoy Jeremiah u kalbus ni bochan ni de rus ni nge wereg e machib, ma guy Jehovah rogon ni gubin e rran ma ran pi’ “ba yal’ e flowa” ngak “nge yan i mada’ ko ngiyal’ ni ke m’ay urngin e flowa ni bay u lan fare binaw.”​—Jeremiah 37:21.

Ere ke buch uw e ggan ni nge kay Jeremiah, ni bod rogon Elijah. Der yog e Bible ko mang e ke kay Jeremiah ara uw urngin ban’en ni ke kay u tomren ni ke m’ay e flowa u Jerusalem. Machane gad manang ni ke ayuweg Jehovah ma aram me par nib fas ko ngiyal’ nem ni bay e uyungol.

Ngiyal’ ney ma bay e piin nib gafgow u gubin yang u fayleng. Rogon ni yog fare United Nations, ma gin nth’abi gel e gafgow riy e yu Africa. Ke weliy fare UN u nap’an e duw ni 1996 ni gaar: “Baley ko urngin e girdi’ u Africa e yad be par nib gafgow.” Machane yugu aram rogon ni be gel iyan e mo’maw ko par ma be yoor e girdi’ nu Africa ni yad be fol ko thin ko Bible ma yad be pigpig nib yul’yul’ ku Got, ma ke pagan’rad ngak ni ra ayuwegrad. Mu lemnag boch e thin u morngaagen bang u fayleng nib gafgow.

Nguun Par nib Yul’yul’

Ma par Michaela u Nigeria, ni ir be’ ni ta milay’ ma bay nel’ e bitir rok. Be gaar: “Rib mo’maw ni ngan par nib yul’yul’ nfaanra dariy e salpiy rom ni ngam ayuweg e tabinaw rom. Machane nap’an ni ke yib e lumel ngog ni nggu rin’ ban’en nde mat’aw, ma gu ma lemnag fare thin ni bay ko Efesus 4:28, ni be gaar: ‘Cha’ ni be moro’ro e nge tal ko moro’ro’ nge tabab ko maruwel nge thognag e salpiy ni fan ko par rok.’ Ere nap’an ni ke yib e lumel ngog, ma gu ma fitheg ni ‘Kug maruwel ni fan ko re salpiy ney fa?’ ”

Miki gaar Michael, “reb e rran ni gu be yan u but’ ma kug guy ba tutuw ni ke mul ko reb e otobay. De yog ni nggu taleg facha’, me ere kug fek fare tutuw ma kug guy ni ba sug ko salpiy! Kug gayiy ma bay fithingan be’ riy, ma aram mug pirieg e en fen fare tutuw, ma kug sulweg ngak.”

Ngan Gel ko Mulan’uy

Reb e pumoon u North Africa e ke gaar: “Gafgow e gonapan ni ke mit be’ u lan e low nib toar, ma rayog ni nge guy e tamilang nge girdi’ ni yad be yan nib puf rogorad, machane dariy laman nrayog ni nge tolul ni ngan ayuweg ara ngan pi’ e tawo’ ni nge yib nga lang.” Ere dabni gin ngay ni par nib gafgow e ma yibnag e mulan’uy nge magafan’uy! Mus ko pi tapigpig rok Got e rayog ni ngar guyed e piin nib fel’ rogorad ma yad lemnag ni dariy angin ni ngan par nib yul’yul’. (Mu taarebnag ko Psalm 73:2-13.) Uw rogon nrayog ni ngan gel ko lem ni aram rogon?

Be’ nu West Africa ni Peter fithingan e ke retire ko maruwel u tomren 19 e duw. Ma chiney ma bay buch uw e salpiy ni yibe pi’ ngak ni pension rok. Ke gaar: “Yu ngiyal’ ma ma magafan’ug ma aram mu gu lemnag e pi n’en ni kug poy u Bible nge pi babyor ni fl’eg fare Watch Tower Society. Dabki n’uw nap’an ma ra m’ay e re m’ag ney, ma gad be sonnag reb e m’ag nib fel’ ni bay yib.

“Maku gu ma lemnag e pi thin ko 1 Peter 5:9, ni be gaar: ‘Ere um pired nib mudugil e michan’ romed ngak Kristus mi gimed togopuluw ngak fare moonyan’, ya gimed manang ni piin ni yad be par u roy u fayleng ni polo’ ni Kristus e ke michan’rad ngak e gafgow ni be yib ngomed e ku ir e be yib ngorad.’ Ere gathi ke mus ni gag e gub gafgow. Pi n’en ney ni be yib ngan’ug e ma ayuwegneg ndabki mulan’ug ma dabki maga’fan’ug ngay.”

Miki gaar Peter: “I ngongliy Jesus boor e maangang u nap’an ni bay u fayleng, machane de n’igin nge fel’ rogon be’ ko salpiy. Ere susun mang fan ni gu be lemnag ni nge n’igin nge yoor e salpiy rog?”

Gelngin e Meybil

Ku reb e kanawo’ ni rayog ni ngan gel ko lem nde puluw e ngan chuchugur ngak Jehovah Got u fithik’ e meybil. Ke mang Mary reb e Pi Mich Rok Jehovah ko duw ni 1960, ma girdien e tabinaw rok e kar digeyed. Dawori un ko mabgol ma ke pag 50 e duw rok e chiney, ma ke meewar dow ma buch uw e salpiy rok. Machane kab passig ko machib ko Kristiano.

Gaar Mary: “Nap’an ni ke mulan’ug ma gu ma meybil ku Jehovah. Ya gu manang ni dakuriy be’ nrayog ni nge ayuwegneg ni bod ir. Gu nang ni faanra nge pagan’um ngak Jehovah ma ra ayuwegem. Gubin ngiyal’ ma gu ma lemnag e thin ni yog David ni Pilung ni bay ko Psalm 37:25 ni be gaar: ‘Chiney e kug pillibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.’

“Pi thin u morngaagen e pi walag ni pumoon nge ppin nib ilal boch ni bay ko fare Wulyang Ntagil’ e Damit e ku ma pi’ e athamgil nga lanin’ug. Ke ayuwegrad Jehovah Got, me ere ke mich u wan’ug ni ku ra ayuwegneg. Ma flaabnag e maruwel rog ni gu ma pi’ e fufu nchuway’ ma aram e ba gaman e tin nib t’uf rog u gubin e rran. Yu ngiyal’ ma kari buch uw e salpiy rog ma gu ma lemnag ko mang e nggu rin’, ma ma l’og Jehovah be’ ni nge pi’ e taw’ath ngog ma ra gaar, ‘Sister, amu fek e biney.’ Dariy biyay ni ke pageg Jehovah.”

Baga’ Fan e Fol Bible

Ngan fil e Thin Rok Got ni bay ko Bible e rib baga’ fan u wan’ e Pi Mich Rok Jehovah, ma ku arrogon u wan’ e pi arorad ni yad ba gafgow. John e ke gaman nel’ i ragag e duw rok ma ir e pioneer (be’ ni ma wereg e machib nib full-time) maku ir e ministerial servant u lan e ulung. Ma par u lan ba naun ni l’agruw thal ni ke kireb ma bay 13 e tabinaw ni be par riy. Singgil rok e bang u hallway ko thal ni som’on ni kan fl’eg e rungrung riy ko boch e plang. Ma bay riy l’agruw e chiya ni ke n’uw nap’an nge reb e tebel ni bay boor e babyor ni be weliy morngaagen e Bible u daken. Ma ma mol u daken e chob.

Ra reb e rran ma yog reb e dolla ngak John ya ke pi’ nchuw’ay e flowa, machane kan taleg i chuw’iy e merikenko ko nam rok, ma aram ma dakir yog ni nge yognag e salpiy. Be gaar: “Ke mo’maw e par rog, machane ka gu be un ko pioneer. Jehovah e be ayuwegneg. Gu ma gayiy e maruwel nrayog ni nggu rin’ ndemtrug ko mang ma dagur ma taga’ nga daken be’ ni nge pi’ ganag, machane pi walag ko ulung e ma ayuwegneg. Kar gayed e maruwel ni nggu un ngay ma yu ngiyal’ ma yad ma pi’ e salpiy ngog nib taw’ath.

“Gu ma poy e Bible nge pi babyor ko Watch Tower Society u gubin ngiyal’. Gu ma fol babyor ko ngiyal’ nri kakadabul u nap’an ni dariy e wagey u naun nge balayal’ nfaanra bay e gamig. Gu manang ni thingar dab gu pag e fol babyor.”

Ngan Skulnag e Bitir Nge Yog e Yafas ni Manemus Ngorad

Daniel e be’ ni kem’ leengin ma bay nel’ e bitir rok. Nap’an e duw ni 1985 ma kan taleg ko maruwel rok ni ke rin’ u lan 25 e duw u m’on riy, ma ke un ko yugu reb e maruwel ko reb e kantin. Ke weliy ni gaar: “Mo’maw e par ko tabinaw rog. Chiney ma ke mus ntaab yay u reb e rran ni rayog ni nggu abichgad. Bay biyay ni dagu wed ban’en u lan dalip e rran. Kari mus ni ran e gu unumed ni nggu pared nib fas.”

Daniel e reb e piilal ko ulung. Be gaar: “Dagur ma pag e pi muulung ko Kristiano, ma bay boor pa’ u puluwog ko maruwel ko ulung. Gubin ngiyal’ ni bay ban’en ni ngan rin’ ko Kingdom Hall ma gu ma un ngay. Ma nap’an ni ke gel e mo’maw ko par ma gu ma lemnag e pi thin ni yog Peter ngak Jesus ni bay ko John 6:68 ni gaar: ‘Somol, i mini’ e gamad ra yan ngak?’ Faanra nggu tal ndakugu pigpig ku Jehovah ma gu ra yan ngan? Pi thin rok Paul ni bay ko Roma 8:35-39 e be pi’ e athamgil nga lanin’ug ya be dag ni dariy ban’en ni rayog ni nge daregdad u rogon ni gadad ba t’uf rok Got nge Kristus. Aram e lem ni gu ma tay nga laniyan’ e bitir rog. Gubin ngiyal’ ma gu ma yog ngorad ni thingar dabda paged Jehovah.” Rogon fene passig Daniel nge fol babyor ni ke tay u taabang ko tabinaw rok e ke ayuweg e bitir rok.

Nguun Lemnag ni Ngan Pi’ Ban’en

Sana ra lemnag be’ ni piin ni ma par u fithik’ e gafgow nib gel ni dabiyog ni ngar pied e salpiy ni ayuw ko machib. Machane gathi aram rogon. (Mu taarebnag ko Luke 21:1-4.) Bay boch e Pi Mich u Ghana ni yad ma milay’ ni nge yog garad machane ur ted bang ko milay’ rorad ni fan ko Gil’ilungun Got. Nap’an nra yib e woldug riy ma yira pi’ nchuway’ ma ran fanay e re salpiy nem ni fan ko tirok Got ban’en ma kari mus, ma re n’em e ba muun ngay ni ngan pi’ e salpiy ni ayuw u lan e Kingdom Hall ko Pi Mich Rok Jehovah.

Ma par Joan u Central Africa, ma ir e pioneer. Pumoon rok e ba magutgut ma ka bay aningeg ni’ ni thingari ayuweg, me ere ma pi’ e flowa nchuway’. Nap’an ni ba t’uf ko ulung e benchi ko Kingdom Hall ma tabinaw rok Joan e kar turguyed ni ngar pied urngin e salpiy rorad. Ma aram e dakuriy ban’en rorad. Machane bin migid e rran ma ke pi’ be’ e salpiy ngorad ni ke thang e malfith nkakrom, ni salpiy nda ur lemnaged ni ran sulweg ngorad!

Ma par Joan nib falfalan’ ma der magafan’ ko salpiy. Be gaar: “Gu ma weliy salpeg ngak Jehovah u fithik’ e meybil, ma aram ma gu ma un ko machib. Goo gad manang ni dabki fel’ e par ko re m’ag ney. Machane gad manang ni ra pi’ Jehovah e pi n’en nib t’uf rodad.”

Ngan Madangdang

Ba lingagil e Pi Mich Rok Jehovah ni bochan nib t’uf bagayad rok bagayad. (John 13:35) Piin ni bay e salpiy rorad e yad ma ayuweg e pi Kristiano nib t’uf ban’en rorad. Yad ma pi’ e taw’ath ngorad ma yu ngiyal’ ma yibe pi’ e maruwel ngorad.

Ma par Mark u Congo, ma bay e daraw rok. Ere ke mit rogon buguli ay nge buguli pa’. Ma fanay baley i gek’iy ni nge sog ngay. Nap’an ni ke turguy Mark ni nge pigpig ku Jehovah ma ke thiliyeg boch ban’en ko yafas rok. Kafram ma i taman ggan, ma chiney ma ma yung e woldug nge yog e ggan ngak. Maku ma fl’eg e renga ni nge pi’ nchuway’.

Yugu demtrug ni ke kireb dow, machane ba madangdang Mark ko maruwel. Munmun ma ke chuw’iy reb e binaw me toy e naun rok u daken. Chiney ma ir reb e piilal ko ulung ma girdi’ ko re binaw nem e ma tay fan Mark. Ma chiney ma ma ayuweg yugu boch e girdi’ nib gafgow.

U yu yang ma rib mo’maw ni ngan pirieg e maruwel. Reb e piilal ko Kristiano ni ma maruwel ko branch ofis ko Watch Tower Society u Central Africa e ke yoloy ni gaar: “Boor e pi walag u roy e dariy e maruwel rorad. Boch i yad e ma sunumeg e maruwel rorad machane rib mo’maw e re n’em. Boor e girdi’ e ur lemnaged ni demtrug e n’en ni yad ra rin’ ma yad ra gafgow me ere yad ra pag farad ma yad ra un ko pioneer. Ma piin ni ma yodorom e ma pirieg ni yibe taw’athnagrad ni kab boor ko ngiyal’ ni kar uned ko maruwel ni buch uw e salpiy ni ke yog ngorad.”

Ma Ayuweg Jehovah e Girdi’ Rok

Yog Jesus Kristus u morngaagen ni gaar: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.” (Luke 9:58) Ku arrogon ni yoloy apostal Paul ni gaar: “Ke yan i mada’ ko re awa ney ma gamad be yim’ ko bilig nge belel; ma gamad be yin’ e mad nib mogchoth; yibe li’mad; ma gamad be milekag i yan.”​—1 Korinth 4:11.

Jesus nge Paul e ur turguyew ni ngar unew ko par ndariy e fel’ rogon riy ni aram e rayog ni ngar unew ko machib nib mus rogon. Boor e pi Kristiano ko ngiyal’ ney e yad ba gafgow ni bochan ndariy ban’en nrayog ni ngar rin’ed. Machane yad ma fol ko thin ko Bible ma yad ma pigpig ku Got u fithik’ e passig. Yad manang ni yad ba t’uf rok Jehovah ma yad manang fene riyul’ e pi thin rok Jesus ni ke yog ni gaar: “Ere ngam m’oneged u wun’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey [chugum] ngomed.” (Matthew 6:25-33) Ma pi tapigpig rok Got ney ni yad ba gafgow e kan micheg ngorad ni “flaab rok Jehovah​—e aram e n’en ni ma n’igin e fel’ rogon.”​—Proverbs 10:22.

[Boch e Thin nra Tamilangnag Murung’agen]

a Kan thiliyeg e ngochol ko girdi’ u lan e re thin ney.

[Kahol ko page 6]

Mini’ e “Piin ni ma Maruweliy e Thin Rok Got”?

ROGON ni yog e Gallup poll ko duw ni 1994 ma kan deeriy e girdi’ ma 96 percent ko girdi’ nu Meriken e “ke mich Got u wan’rad ara mmich u wan’rad ni bay e kan.” Maku be weliy fare babyor ni U.S. News & World Report ni “kab boor e galesiya u Meriken ko yugu reb e nam u fayleng.” Machane George Gallup, Jr. ni ir be’ ni ma deeriy boch ban’en e yog ni gaar: “Bin riyul’ riy e baga’ ni girdi’ nu Meriken e dar nanged e n’en ni ke michan’rad ngay ara mang fan.”

Ku ba tamilang ni n’en ni ma yog e girdi’ ni ke michan’rad ngay ko teliw e ri de puluw ko ngongol rorad. Susun, yog Jeffery Sheler ni gaar: “Piin ni sociologists e ur guyed ni yu gin nth’abi gel e bugel riy e aram e yu gin ni rib gel e passig ko girdi’ riy ko teliw.”

Susun ndabda gingad ko re n’ey. Mang fan? Ya nap’an e bin som’on e chibog me ginang apostal Paul e pi Kristiano u morngaagen e piin ni “yad ma yog ni yad manang Got, machane be m’ug u pangirad ndar nanged Got.” (Titus 1:16) Ki yog Paul ngak Timothy ni “ngiyal’ ntin tomren e rran” e ra moy e piin ni “bay ur dake yad be liyor ngak Got, machane bay ra pied keru’rad nga gelngin.”​—2 Timothy 3:1, 5.

Machane tin riyul’ e Kristiano e ma rin’ urngin ban’en nrayog rorad ni ngar folwokgad ko n’en ni tay Jesus Kristus chilen ni gaar: “mmarod ngak girdien e pi nam u gubin yang ngam pingeged yad ngar manged pi gachalpeg.” (Matthew 28:19) Aram rogon ma “dabra banniged yad ni ke mus ni nguur motoyilgad ko thin rok; ya ngar maruwelgad ngay.”​—James 1:22.

[Sasing ko page 7]

Girdi’ u gubin yang u fayleng e ma tay fan e fol Bible

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag