Mu Felfelan’ ko Maruwel Rom

1-3. (a) Uw rogon u wan’ boor e girdi’ e maruwel rorad? (b) Mang boch e deer ni gad ra weliy ko re guruy ney?

GIRDI’ u ga’ngin yang e fayleng e ngiyal’ ney e ba gel e maruwel ni yad ma tay ni ngar yognaged e tin nib t’uf rorad nge girdien e tabinaw rorad. Boor i yad e dubrad e maruwel rorad, maku boch i yad e dubrad ni nga ranod ko maruwel ni gubin e rran. Faanra aray rogon e lem rom, ma mang e rayog ni ngam rin’ ya nge yag nim felfelan’ ko maruwel rom? Ma uw rogon nrayog ni nge fel’ u wan’um e maruwel ni ga be rin’?

² Be gaar Jehovah ngodad: “Gadad gubin ndabi siy ni ngad abichgad ma gadad garbod nge felan’dad ko tin ni kad muruwliyed; ya pi n’ey ni gubin e tow’ath rok Got ngodad.” (Eklesiastes 3:13) Ke sunmiydad Jehovah nib t’uf ni ngad maruwelgad ma ngkud adaged ni ngaud maruwelgad. Baadag ni ngad felfelan’gad ko tin gad ma rin’.​—Mu beeg e Eklesiastes 2:24; 5:18.

³ Ere mang e rayog ni nge ayuwegdad ni ngad felfelan’gad ko maruwel rodad? Mang e re miti maruwel nsusun e nge siyeg e piin Kristiano? Uw rogon ni nge dab da lemnaged e maruwel rodad nib pag rogon? Ma mang e bin th’abi ga’ fan e maruwel nrayog ni ngad rin’ed?

FA GAL TAMARUWEL NTH’ABI FEL’

4, 5. Uw rogon e maruwel u wan’ Jehovah?

⁴ Baadag Jehovah ni ma maruwel. Be gaar e Genesis 1:1, BT: “Aram ko tabolngin ni tabab Got i sunmiy e fayleng nge urngin ban’en ni bay u lan e lang.” Nap’an ni mu’ Got i sunmiy e fayleng, nge urngin ban’en ni bay riy ma aram me yog nrib “fel’” e tin ke sunmiy. (Genesis 1:31) Rib fel’ u wan’ e En ni Sunmiydad e tin ke ngongliy.​—1 Timothy 1:11.

⁵ Der ma tal Jehovah ko maruwel. I gaar Jesus: “Chitamag e gubin ngiyal’ ni be maruwel.” (John 5:17) Yugu aram rogon ndad nanged gubin ban’en nib manigil ni be rin’ Jehovah, machane bay boch ni gad manang. Kab kafram i yib ni be mel’eg e piin ngar uned ngak Jesus Kristus ni Fak ko gagiyeg u Gil’ilungun. (2 Korinth 5:17) Ku be pow’iy Jehovah e girdi’ maku be ayuwegrad. Bochan angin e machib ni yibe tay u ga’ngin yang e fayleng, ma aram fan ni bokum milyon e girdi’ ni yad be fil murung’agen Jehovah, ma kki yag ngorad e athap ko yafos ni manemus u paradis u fayleng.​—John 6:44; Roma 6:23.

6, 7. Uw rogon Jesus ko maruwel?

⁶ Jesus e bod e Chitamangin ni baadag e maruwel. U m’on ni nge yib nga fayleng ma i maruwel rok Got “nib salap i maruweliy ban’en,” me un ngak i sunmiy urngin ban’en u tharmiy ngu fayleng. (Proverbs 8:22-31; Kolose 1:15-17) Nap’an ni immoy u fayleng miki ulul ni nge maruwel nib gel. Ma nap’an ni kab pagel me fil rogon ni nge mang reb e daiksang nib salap ko maruwel, mab ga’ ni ma ngongliy boch ban’en u lan e naun maku ma toy e naun. Rib salap i rin’ e re maruwel nem, ere aram fan ni yima yog ni ir “fare daiksang.”​—Mark 6:3.

⁷ Yugu aram rogon, ma bin th’abi ga’ fan e maruwel ni i rin’ Jesus u roy u fayleng e aram e i machibnag fare thin nib fel’ ma be fil murung’agen Jehovah ko girdi’. Thingari mu’nag e machib ni i tay u lan dalip nge baley e duw, mab gel e maruwel ni ma tay ya ma tabab ni kakadbul me maruwel nge n’uw e nep’. (Luke 21:37, 38; John 3:2) Bokum miriay e mayel ni ma yan riy u but’ ni be machibnag fare thin nib fel’ ngak urngin e girdi’ nrayog ni nge machibnagrad.​—Luke 8:1.

8, 9. Mang fan nib felfelan’ Jesus ko maruwel ni ma rin’?

⁸ Maruwel rok Got ni i rin’ Jesus e bod e ggan ngak. Re maruwel ney e ma pi’ gelngin. Bay boch e rran ni ma pag Jesus e abich ni bochan gelngin e maruwel ni ma tay. (John 4:31-38) I fanay gubin e kanawo’ ni ke mab ngak ni nge ayuweg e girdi’ ni ngar filed murung’agen e Chitamangin. Aram fan nrayog ni nge gaar ngak Jehovah: “Kug gilnag buguwam u fayleng; ma kug mu’nag e maruwel ni mpi’ ngog ni nggu rin’.”​—John 17:4.

⁹ Ba tamilang nib gel e maruwel ni ma tay Jehovah nge Jesus, ma yow ma felfelan’ ko maruwel ni yow ma tay. Gad baadag ni ngad ‘folwokgad rok Got,’ mad “leked luwan ay [Jesus].” (Efesus 5:1; 1 Peter 2:21) Aram fan ni gad ma guy rogon ni ngad maruwelgad nib gel, ma gad pi’ e tin th’abi fel’ rodad ko maruwel ni gad ma rin’.

SUSUN NGE UW ROGON E MARUWEL RODAD U WAN’DAD?

10, 11. Mang e ra ayuwegdad ni ngad sapgad nga fel’ngin e maruwel rodad?

¹⁰ Gadad e girdi’ rok Jehovah e ba gel e maruwel ni gad ma tay ni ngad yognaged e tin nib t’uf rodad nge girdien e tabinaw rodad. Gad baadag ni ngad adaged e maruwel rodad, machane bay yu ngiyal’ nib mo’maw’ e re n’ey. Ere mang e rayog ni ngad rin’ed ni faanra dubdad e maruwel rodad?

¹¹ Ngam sap nga fel’ngin e maruwel rom. Sana dabiyog ni ngad thilyeged e re miti maruwel ni kad uned ngay ara urngin e maruwel ni gad ma rin’, machane rayog ni ngad thilyeged rogon ni gad ma lemnag e maruwel rodad. N’en nra ayuwegdad e aram e ngad nanged e n’en ni baadag Jehovah ni ngad rin’ed. Bod ni: Baadag Jehovah ni piin lolugen e tabinaw e ngar pied e tin nib t’uf ko tabinaw rorad u rogon nrayog rorad. Bin riyul’ riy e, be yog e Bible ni en ndabi pi’ e tin nib t’uf ko tabinaw rok e “kab gel e kireb rok ngak be’ ndawori mich Got u wan’.” (1 Timothy 5:8) Faanra gur reb i lolugen e tabinaw, ma dabisiy ni ga ma maruwel nib gel ni ngam pi’ e tin nib t’uf ko tabinaw rom. Demtrug ko ga baadag e maruwel rom fa danga’, machane ga manang ni faan ga ra pi’ e tin nib t’uf ko tabinaw rom, ma aram e kag be felfelan’nag Jehovah.

12. Mang angin nra yib ngodad ni faanra gad ma maruwel nib gel ma gad ba yul’yul’?

¹² Mmaruwel nib gel mag yul’yul’. Re n’ey e ra momnag ngom ni ngam adag e maruwel rom. (Proverbs 12:24; 22:29) Faan ga ra rin’ ni aray rogon, ma aram e rayog ni nge pagan’ e en nib ga’ ko maruwel ngom. Piin nib ga’ ko maruwel e yad baadag e girdi’ nib yul’yul’ ni bochan e dab ra iringed e salpiy, ara chugum, ara tayim ko maruwel. (Efesus 4:28) Bin th’abi ga’ fan riy e, manang Jehovah e ngiyal’ ni gad be maruwel nib gel nge ngiyal’ ni gad ba yul’yul’. Ku rayog ni ngam par ‘ndariy ban’en ni be yog lanin’um ngom ni kam rin’ nib kireb’ ni bochan e ga manang ni ga be felfelan’nag fare Got nib t’uf rom.​—Hebrews 13:18; Kolose 3:22-24.

13. Ku mang reb i angin e yul’yul’ rodad u tabon e maruwel?

¹³ Ngam nang ni ngongol rom nib fel’ u tabon e maruwel e rayog ni ngan pining e sorok riy ngak Jehovah. Ku aray reb i fan ni ngad adaged e maruwel rodad. (Titus 2:9, 10) Ku rayog ni nge adag be’ u tabon e maruwel rom ni nge fil e Bible ni bochan e ngongol rom nib fel’.​—Mu beeg e Proverbs 27:11; 1 Peter 2:12.

MANG MARUWEL E THINGAR GU MEL’EG NI NGGU UN NGAY?

14-16. Mang e ba t’uf ni ngad lemnaged u m’on ni ngad mel’eged reb e maruwel ni ngad uned ngay?

¹⁴ Der yog e Bible e re miti maruwel ni nge un e piin Kristiano ngay nge tin ngar siyeged. Machane bay e pi kenggin e motochiyel u Bible nrayog ni nge ayuwegdad ni ngad mel’eged reb e maruwel nib fel’ ni ngad uned ngay. (Proverbs 2:6) Rayog ni ngad fanayed e pi kenggin e motochiyel u Bible ni ngad fithed gadad ko pi deer ni baaray.

¹⁵ Faan gu ra un ko re maruwel ney, ma ra t’uf ni nggu rin’ ban’en ni be yog Jehovah nib kireb, fa? Kad filed murung’agen boch e ngongol ni ma fanenikay Jehovah ni bod e moro’ro’ nge ban. (Exodus 20:4; Acts 15:29; Efesus 4:28; Revelation 21:8) Ere ngad kol ayuwgad ma gad siyeg boch e maruwel nib togopluw ko pi motochiyel rok Jehovah.​—Mu beeg e 1 John 5:3.

¹⁶ Bay ban’en ni yima rin’ ko re maruwel ney ni bay rogon nga ban’en ni ma fanenikay Jehovah, fa? Bod ni, uw rogon ni faanra ngam un i toy reb e galesiya? Dariy ban’en nib kireb riy ni ngam un ko maruwel ko dimow naun. Machane ga manang nib fanenikan Got e pi machib ni googsur ni yima fil u galesiya. Ere yugu aram rogon ndamur un i fil e pi machib ni googsur nem ko girdi’, machane gathi rogon u wan’ Jehovah e ga be un i tay tanggin e kireb rorad?​—Revelation 18:4.

17. Mang e rayog ni nge ayuwegdad ni ngad dugliyed boch ban’en nib m’agan’ Got ngay?

¹⁷ Gad ra fol ko pi kenggin e motochiyel rok Got, ma rayog ni ngad boded e piin be weliy e Hebrews 5:14 murung’agrad ni “kar filed rogon ni ngar nanged e tin nib fel’ ko tin nib kireb.” Ere mu fithem ni nge lungum: ‘Faan gu ra un ko re maruwel, ma ra magawonnag laniyan’ boch e girdi’, fa? Faanra nggu un ko re maruwel ney ma thingar gu digey e en mabgol rog nge pi fakmow nggu wan gu par nga yugu reb e nam, fa? Mang e ra rin’ e re n’ey ngorad?’

NGAM “MEL’EGED E TIN IR E TH’ABI GA’ FAN”

18. Mang fan nrayog ni nge mo’maw’ ni ngad tedan’dad ko liyor rodad?

¹⁸ Rayog ni nge mo’maw’ ngodad ni ngad m’oneged e liyor rodad ngak Jehovah e ngiyal’ ney ni ke “mo’maw’ ni ngan par nrogon e tin riyul’ ni girdien Kristus.” (2 Timothy 3:1) Ke mo’maw’ ni ngan pirieg e maruwel min par riy. Ba t’uf ni ngad ayuweged chon e tabinaw rodad, machane gad manang ni liyor rodad ngak Jehovah e aram e n’en ni nge m’on u wan’dad. Dab da paged e chugum ni nge mang ir e m’on u wan’dad. (1 Timothy 6:9, 10) Ere uw rogon ni ngad “mel’eged e tin ir e th’abi ga’ fan” mu kud pied e tin nib t’uf ko tabinaw rodad?​—Filippi 1:10, NW.

19. Faanra pagan’dad ngak Jehovah, ma uw rogon nra ayuwegdad ni nge dab da lemnaged e maruwel rodad nib pag rogon?

¹⁹ Ngari pagan’um ngak Jehovah. (Mu beeg e Proverbs 3:5, 6.) Gad manang ni Got e manang e tin nib t’uf rodad ma ri ma lemnagdad. (Psalm 37:25; 1 Peter 5:7) Be gaar e Thin rok: “Dabi m’on e salpiy u lanin’med, ma ngam pired ni nge fel’ u wun’med e tin ni ba’ romed ban’en. Ya ke yog Got ni ke gaar, ‘Ri dab gu pagem; ma ri dab gu n’igem.’” (Hebrews 13:5) Dabun Jehovah ni ngaud pared ni be magafan’dad ko tin ngad yognaged ni fan ko tabinaw rodad. Boor yay ni ke dag Jehovah nrayog ni nge pi’ e tin nib t’uf ko pi tapigpig rok. (Matthew 6:25-32) Demtrug rogon e maruwel rodad, ma gubin ngiyal’ ni ngaud filed e Thin rok Got, ma gad be machibnag fare thin nib fel’, ma dab ud paged e muulung rodad.​—Matthew 24:14; Hebrews 10:24, 25.

20. Uw rogon ni ngad momnaged e par rodad?

²⁰ Ngam m’oneg u wan’um e tin nib m’agan’ Got ngay. (Mu beeg e Matthew 6:22, 23.) Re n’ey e be yip’ fan ni ngam momnag e par rom ya nge yag nim tiyan’um ko pigpig rom ngak Jehovah. Gad manang nde puluw ni ngad paged e salpiy, ara flaab, ara tin th’abi beech e cell phone ara tablet ni nge ga’ fan u wan’dad ko tha’ u thildad Got. Ere mang e ra ayuwegdad ni ngad m’oneged e tin nib ga’ fan? Thingar da guyed rogon ndab da awgad nga tabon e malfith. Faanra bay e malfith rom, mag guy rogon ni ngam thang bang riy ara mu thang ni ga’ngin nge math. Faanra dab da kol ayuwgad ma rayog ni ngad fanayed boor e tayim rodad nge gelngidad ni ngad yoornaged e chugum rodad, ma dakuriy e tayim rodad ni fan ko meybil, ara fol Bible ni yigoo gadad, ara machib. Gad baadag ni ngad filed rogon ni nge fel’ u wan’dad e tin bay rodad ban’en ni bod e ‘ggan nge mad,’ ko bin ni ngad paged e chugum ni nge mo’maw’nag e par rodad. (1 Timothy 6:8) Demtrug rogon e par rodad, ma gad gubin nib fel’ ni nge ba ngiyal’ ma gad fal’eg i yaliy rarogodad ya nge yag nda nanged rogon nrayog ni ngad yoornaged boch ban’en ni gad be rin’ ni fan ko pigpig rodad ngak Jehovah.

21. Mang fan nib t’uf ni ngad dugliyed e n’en nthingari m’on u wan’dad?

²¹ Ngam m’oneg e tin nib ga’ fan. Ba t’uf ni ngad fanayed e tayim rodad, nge gelngidad, nge chugum rodad u fithik’ e gonop. Faanra dab da kol ayuwgad ma rayog ni ngad n’aged e tayim rodad nga boch ban’en ni gathi ri ir e ba ga’ fan ni bod e skul nib tolang ara salpiy. I gaar Jesus: “Ngam m’oneged u wun’med e gagiyeg rok Got.” (Matthew 6:33) Pi n’en gad ma dugliy, nge pi n’en ni kad mechamgad ngay, nge tin gad ma rin’ u reb e rran ngu reb, nge tin gad ma nameg e ir e be dag e n’en nib m’on u wan’dad.

BIN TH’ABI GA’ FAN E MARUWEL NRAYOG NI NGAD RIN’ED

22, 23. (a) Mang e bin th’abi ga’ fan e maruwel rodad ni gadad boch e Kristiano? (b) Mang e ra ayuwegdad ni ngad felfelan’gad ko maruwel rodad?

²² Pigpig rodad ngak Jehovah nge fare thin nib fel’ ni gad ma machibnag ko girdi’ e aram e bin th’abi ga’ fan e maruwel ni gad ma rin’. (Matthew 24:14; 28:19, 20) Gad baadag ni ngad rin’ed gubin ban’en nrayog rodad ni fan ko re maruwel ney ni bod ni rin’ Jesus. Bay boch e girdi’ ni ka ranod ra pared ko gin nib t’uf boch e tamachib riy. Ma boch e ke fil e thin u yugu reb e nam ya nge yag nra machibnaged e girdi’ ni ma non ko re thin nem. Mu non ko piin ke yag ni ngar rin’ed e re n’ey, mag fith murung’agen e pi n’ey ngorad. Yad ra yog ngom ni ke gel e felfelan’ rorad ma ke yib fan e yafos rorad.​—Mu beeg e Proverbs 10:22.

²³ Ngiyal’ ney e boor e girdi’ ni yad ma maruwel u lan boor e awa, ara boor e maruwel ni kar uned ngay ya nge yag nra pied e tin nib t’uf ko tabinaw rorad. Manang Jehovah e re n’ey ma rib ga’ fan u wan’ gubin e tin gad be rin’ ni bochan e ngad ayuweged e tabinaw rodad. Ere gad gubin ni ngad ululgad ngad folwokgad rok Jehovah nge Jesus ni aram e ngaud maruwelgad nib gel ndemtrug e re miti maruwel ni gad be rin’. Dab da paged talin ni pigpig rodad ngak Jehovah nge fare thin nib fel’ ni murung’agen Gil’ilungun Got ni gad ma machibnag ko girdi’ e aram e bin th’abi ga’ fan e maruwel rodad ni bay. Ireray e n’en nra yibnag e bin riyul’ e felfelan’ ngodad.