Mang Fan ni Ngaun Fol ko Pi Motochiyel nu Bible?

DAKURIY fan e thin ko Bible ngodad e ngiyal’ ney ni murung’agen e par ko pumoon nge ppin, ma kaygi mo’maw’, fa? Danga’, ya n’en ni be yog e Bible u murung’agen e par ko pumoon nge ppin e ra ayuwegdad ni nge:

▪ Dabi af e m’ar ngodad

▪ Dab da diyengad ndawor da uned ko mabgol

▪ Dab da pirieged wenegan e mabgol nib kireb

▪ Dabi magawon e nangan’ rodad

▪ Dab da lemnaged ndakuriy fadad ni bochan e n’en ni ke rin’ boch e girdi’ ngodad ni nge fel’ lanin’rad riy

Jehovah Gota ni ir e ke sunmiydad e baadag ni ngad felfelan’gad me yib angin ngodad e pi tow’ath ni ke pi’. Got e ir ‘fa en baadag ni nge fil ngom e tin nib fel’.’ (Isaiah 48:17) Be’ ni ma fol ko n’en ni be yog e Bible u murung’agen e par ko pumoon nge ppin e:

▪ Ra fel’ u wan’ Got

▪ Ra gapas laniyan’

▪ Ra fel’ e tabinaw rok

▪ Ra fel’ thin

▪ Ra yib fan u wan’

Ere uw rogon ni faanra damur fol ko motochiyel nu Bible u murung’agen e re n’ey? Rayog ni ngam thilyeg e ngongol rom, fa? Ra fulweg Got taban e n’en nib kireb ni um rin’ kafram, fa?

Am lemnag e re n’ey: Immoy boch e girdi’ ko ulung ni Kristiano ko bin som’on e chibog ni ur uned ko ngongol ndarngal, ma yad be par e piin ni gathi mabgol rorad, ma yad ma un ko par ko pumoon nge pumoon nge ppin nge ppin u m’on ndawor ra manged Kristiano. Machane, kar dugliyed ni ngar thilyeged e ngongol rorad ma ke yib angin. (1 Korinth 6:9-11) Ngiyal’ ney e bokum biyu’ e girdi’ ni kar rin’ed e re n’ey. Kar talgad ndakurur chaggad ko girdi’ ndemtrug, ma kar guyed ni ke yib angin ngorad ni yad be fol ko pi motochiyel nu Bible. Am lemnag e n’en ni buch rok Sarah ni kan weliy murung’agen ko bin som’on e article.

“Rib Papey ni Baud Lanin’ug”

Ke nang Sarah nda i pirieg e puf rogon nge felfelan’ ni i yim’ ni bochan, ya ba kireb e ngongol rok. I yog ni gaar: “Ke magawon e nangan’ rog, ya kug tamra’ ma kug rus nri gu diyen fa af ba mit e m’ar ngog. Dariy ba ngiyal’ ni maruwar Got u wan’ug, ma gu manang ni ngongol rog nib kireb e ke kirebnag laniyan’. Kug nang nda kug beech ma kay gu par ni ireram e n’en ni gu be lemnag.”

Munmun me yib gelngin Sarah ni nge thilyeg e ngongol rok. I ning e ayuw ko gallabthir rok ni yow e Pi Mich Rok Jehovah. Miki ning e ayuw ngak e piin piilal u lan e ulung ni Kristiano. I gaar Sarah: “Kug gin ko gol nge t’ufeg ni ke dag e gallabthir rog nge piin piilal u lan e ulung ngog. Rib papey ni baud lanin’ug.”

Chiney e bay l’agruw e bitir rok Sarah. I yog ni gaar: “Da gur ma mithag ko bitir rog e n’en ni buch rog. Gu baadag ni ngar nangew wenegan ni yib ngog ni bochan e da gu fol ko pi motochiyel rok Got. Gu be nameg ni nggu ayuwegrow ngar nangew angin nra yib ngorow ni faan yow ra fol ko motochiyel rok Got u murung’agen e par ko pumoon nge ppin. Ke mich u wan’ug ni fan ni ma pi’ Got e motochiyel ngodad e bochan ni dabun ni nge guy ni kad gafgowgad.”

Ku rayog ni nge yib angin ngom ni faan ga ra fol ko pi motochiyel rok Got. Be micheg e Bible ni gaar: “Tin ni ke yog Somol ni ngan rin’ e mmat’aw: piin ni be fol riy e ke felan’rad. Tin ni ke yog ni ngan rin’ e ba yal’uw, ma ma ayuwegey nge tamilangan’uy. . . . Fol ni gu be tay riy e be yib puluwon ngog.”—Psalm 19:8, 11.b

[Footnotes]

[Blurb on page 8]

Piin ndarur folgad ko pi motochiyel nu Bible e ba ga’ ni yad ma k’aring e kireban’ ngak boch e girdi’

[Blurb on page 9]

Piin ni yad ma fol ko motochiyel nu Bible e ma par nib beech e nangan’ rorad mab felfelan’ e tabinaw rorad