Mu Fil Ban’en Ko Thin Rok Got

Mang e Ra Buch u Nap’an fare Rran ko Pufthin?

Re article ney e be weliy boch e deer ni kaam fith ma be dag ko uw a rayog ni ngam pirieg e fulweg riy u Bible. Pi Mich Rok Jehovah e yad ra felfelan’ ni ngar tamilangnaged e pi fulweg ney ngom.

1. Mang fare Rran ko Pufthin?

Rogon ni bay ko re gi sasing ney u baan mat’aw, e boor e girdi’ ni yad be lemnag nnap’an fare Rran ko Pufthin, ma bokum bilyon e girdi’ e yad ra sak’iy u p’eowchen Got ni ngan pufthinnagrad u rogon e ngongol ni ur rin’ed. Boch i yad e ran pi’ e tow’ath ngorad ni aram e yad ra un ko yan nga tharmiy, ma boch i yad e ran gafgownag u fithik’ e nifiy u infierno. Machane, rogon ni be tamilangnag e Bible e fare Rran ko Pufthin e ran chuweg e piin nib mat’aw u fithik’ e ngongol nib kireb. (Psalm 96:13) Ke mel’eg Got Jesus ni ir e nge mang e Ta Pufthin ni ir e ra sulweg e tin mat’aw e ngongol nga rogon.—Mu beeg e Isaiah 11:1-5; Acts 17:31.

2. Uw rogon ma fare Rran ko Pufthin e ra sulweg e tin nib mat’aw e ngongol nga rogon?

Nap’an ni togopuluw e bin som’on e girdi’ ni aram Adam ngak Got ni lem rok, ma aram e ke abuweg e denen, nge gafgow, nge yam’ ngak urngin e girdi’. (Roma 5:12) Rogon nra yal’uweg Jesus e re magawon nem e ra faseg bokum bilyon e girdi’ ko yam’. Be tamilangnag fare babyor ko Revelation nra buch e re n’ey u nap’an fare biyu’ e duw nra gagiyeg Jesus Kristus.—Mu beeg e Revelation 20:4, 11, 12.

Piin ni yira fasegrad ko yam’ e gathi yira pufthinnagrad ko ngongol ni ur rin’ed u m’on ni kar m’ad, machane yira pufthinnagrad ni be yan u rogon e n’en ni yad ra rin’ u nap’an yira pithig fare ke “babyor” ni be weliy murung’agen ko guruy ni 20 ko Revelation. (Roma 6:7) I yog apostal Paul ni bay e athap ko girdi’ “nib fel’ [“nib mat’aw”, NW] nge tin nib kireb [“nde mat’aw”, NW]” ni yad ra fas ko yam’ ma rayog ni ngar filed murung’agen Got.—Mu beeg e Acts 24:15.

3. Mang e ra lebguy fare Rran ko Pufthin?

Piin nra m’ad u m’on ni ngar filed mar pigpiggad ngak Jehovah Got e rayog rorad ni ngar thilyeged e ngongol rorad ngar rin’ed e tin nib mat’aw. Faanra yad ra rin’ ni aray rogon, ma yira fasegrad ngar “pired ni yad ba fos.” Machane, bay boch e girdi’ ni yira fasegrad ni dubrad ni ngar filed murung’agen pi n’en nib m’agan’ Jehovah ngay. Pi girdi’ ney e yira fasegrad ko yam’ “mi ni gechignagrad.”—Mu beeg e John 5:28, 29; Isaiah 26:10; 65:20.

Tomuren fare biyu’ e duw ni aram n’umngin nap’an fare Rran ko Pufthin, ma ra sulweg Jehovah gubin e girdi’ nib yul’yul’ nga rarogorad ko som’on ni yad ba flont. (1 Korinth 15:24-28) Ere, rib manigil e re athap ney ni fan ko piin ni yad ba yul’yul’! Tomuren fare biyu’ e duw ni kan kalbusnag Satan, min pag ngki skengnag e girdi’ bayay. Maku ra gay Satan rogon ni nge chafeg e girdi’ rok Jehovah nga orel, machane piin ni yad ra togopuluw ngak Satan e yad ra par u fayleng ni manemus u fithik’ e felfelan’.—Mu beeg e Isaiah 25:8; Revelation 20:7-9.

4. Ku mang reb e rran ko pufthin nra yib angin ngak gubin e girdi’?

Ku ma fanay e thin nu Bible fare “rran ko pufthin” ni nge yip’ fan ban’en nra buch u nap’an ni yira chuweg e re m’ag nib kireb ney. Re rran ney e ra yib nib tomgin ni bod fare ran ni tharey e fayleng u nap’an Noah ni chuweg gubin e girdi’ nib kireb. Ba mudugil ni yira felfelan’ u nap’an ni yira chuweg gubin e “girdi’ nib kireb” me par e fayleng ni “tin nib mat’aw e ngongol e bay i par riy.”—Mu beeg e 2 Peter 3:6, 7, 13.

Ra ga baadag ni ngkum nang boch, mag guy fare thin ni bay ko page 244-246 ko re ke babyor ney ni ke fal’eg e Pi Mich Rok Jehovah.

[Sasing ko page 16]

“Bin Tomur e Pufthin” ni Yoloy Gustave Doré, 1832-1883

[Credit Line]

Engravings by Doré