KENGGIN E RE KE BABYOR NEY: RAYOG NI NGE YAG E YAFAS NI BAY FAN
Rayog ni Nge Yag e Yafas ni Bay Fan, Fa?
“Ke mus ni medlip i ragag e duw n’umngin nap’an, ma be mada’ ko meruk i ragag ni faanra ba gel fithik’ i downgin bagamad; machane ke mus ni n’en ni be fek e pi duw nem i yib ngomad e magafan’ nge gafgow.”—Psalm 90:10.
RIYUL’ e pi thin ney! Yafas ko re fayleng ney e kari sug ko “magafan’ nge gafgow.” Sana kaam lemnag ko, ‘Rayog ni nge yag e yafas nriyul’ ni bay fan ngodad e ngiyal’ ney?’
Bod rogon Maria. Som’on, ma ir be’ nrib pasig, machane chiney ni ke gaman 84 e duw rok, ma ke mo’maw’ ni nge un ko yan. Kab fel’ rogon ni ma lemnag ban’en, machane ke mo’maw’ rok ni nge rin’ e tin be lemnag. Uw rogon ni nge lemnag ni bay fan e yafas rok?
Ma uw rogon gur? Dabisiy ni yu ngiyal’ e kam fithem ko bay fan e yafas rom. Sana taab maruwel e ga be sul u daken ni gubin ngiyal’, ma ke aw parowom riy ma be chachalbam ngay. Maku ra buch ni maruwel ni ga be rin’ e de ga’ fan u wan’ e girdi’. Sana ba fel’ e yafas rom e chiney, machane be magafan’um ko yafas rom boch nga m’on. Yu ngiyal’, e ma kireban’um. Sana yafas u lan e tabinaw rom e gubin ngiyal’ ni bay e maluagthin riy nge cham. Dabisiy ni bay be’ nib t’uf rom ni ke yim’. Reb e pumoon ni Andre fithingan e rib fel’ e tha’ u thilrow e chitamangin, machane ke yib e m’ar ngak e chitamangin me yim’ nib tomgin. Rib gel e kireban’ ni tay Andre, ma ke thamiy ni gowa bay ban’en ni kan chuweg ko yafas rok nib mo’maw’ ni ngan sulweg.
Yugu demtrug e magawon ni gad ra mada’nag, ma bay e deer nrib t’uf ni ngad nanged e fulweg riy: Gur, rayog ni nge yag ngodad e yafas ni bay fan? Rayog ni ngad pirieged e fulweg ko re deer ney nfaan gad ra nang rarogon e yafas rok Jesus u nap’an ni immoy u fayleng ni sogonap’an 2,000 e duw ni ke yan. Yugu aram rogon ni boor mit e skeng nge magawon ni mada’nag, machane ri bay fan e birok e yafas. Ere, ku arrogodad nfaan gad ra folwok rok.