Gur, Bay Barba’ e Teliw Nrayog ni Ngan Pagan’uy Ngay?

Faanra bay barba’ e teliw ni kam un ngay nde puluw e ngongol riy, ma dabisiy nra mo’maw’ ngom ni nge pagan’um ko gubin raba’ e teliw. Machane nge fel’ lanin’um ni bay barba’ e teliw nrayog ni ngan pagan’uy ngay. Nap’an ni immoy Jesus u fayleng, me kunuy boch e girdi’ ni yad ba yul’yul’, me fil ngorad rogon ni ngar folgad ko pi motochiyel rok Got. Ku bay e piin ni yad ma folwok rok Kristus ni yad ma athamgil ni ngar folgad ko pi motochiyel rok Got. Uw e rayog ni ngam piriegrad riy?

Estelle ni kan weliy murung’agen ko som’on e yog ni gaar: “Gu fil e n’en ni be weliy e Bible murung’agen u nap’an ni gu un ngak e Pi Mich Rok Jehovah ko fol Bible. Ma de n’uw nap’an ma aram mug nang fan fare thin ni bay ko John 8:32 ni be gaar: ‘Ra mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.’”

Ray, ni kan weliy murung’agen ko som’on, e ki yog ni gaar: “Bochan ni kug un ngak e Pi Mich Rok Jehovah ko fol Bible, ma kug fil ni gathi Got e ir e be k’aring e gafgow ko girdi’. Ma kar gu felfelan’ ni kug nang ni bay fan ni be pag Got e pi gafgow ney ni be buch e ngiyal’ ney, ma ke micheg nra boch nga m’on ma ra chuweg.”

Riyul’ nib mo’maw’ ni ngan par ni yib mudugil u lan e re fayleng ney nib sug ko ngongol nib kireb, machane rayog. Boor e girdi’ e yad baadag ni nge ayuwegrad be’ ya nge yag ni ngar nanged fan e thin ko Bible, mi yad nang rogon ni ngar folgad riy. Aram fan ni Pi Mich Rok Jehovah e yad ma fil e Bible ngak bokum milyon e girdi’ u ga’ngin yang e fayleng. Gubin e wik ma boor ni boor e girdi’ ni kar nanged ko mang e ri be fil e Bible, ma be chugur e tha’ u thilrad e En Ta Sunmiy, ma kar nanged rogon ni ngar pirieged e felfelan’ ko yafas rorad.a

Yay ni migid ni ga ra mada’nag e Pi Mich Rok Jehovah, mag fithrad ko mang fan ni be pagan’rad ko teliw rorad. Mu fal’eg i gay murung’agen e pi n’en ni yad be machibnag. Ma aram ma rayog ni ngam dugliy ko riyul’ ni bay barba’ e teliw nrayog ni nge pagan’um ngay.