Kingdom News No. 37

Thin ni Fan Ko Fayleng Ni Polo’

Teliw Ni Googsur E Ke Chugur Ni Nge Mus!

▪ Mang e teliw ni googsur?

▪ Uw rogon nra mus?

▪ Uw rogon angin nra yib ngom?

Mang e Teliw ni Googsur?

Ma kireban’um ko pi ngongol ni kireb ni yima rin’ nbochan e teliw, fa? Mahl, nge terrorism, nge sasalap ni ma rin’ e piin ni ma yog ni yad ma pigpig ku Got e ke magawonnag e lem rom ni fan ko tin mat’aw, fa? Mang fan ni yuraba’ i teliw e gowa be k’aring e magawon ni boor?

Gathi nga nin’ e kireb nga daken urngin raba’ e teliw, ya kemus ni teliw ni googsur. Ani ba thothup ni baga’ ni ir e yima tay fan, ni Jesus Kristus, e fanathinnag ni teliw ni googsur e ma k’aring e girdi’ nge rin’ e tin nib kireb, ni aram e bod e “gek’iy ni ma k’uf nib kireb wom’engin.” (Matthew 7:15-17) Miti mang wom’engin e ma pi’ e teliw ni googsur?

Teliw ni Googsur . . .

◼ MA UN KO MAHL NGE POLITICS: “U Asia nge ku boch e nam, e piin pilung e yad baadag ni nge yib gelngirad ngar gagiyegnaged laniyan’ girdien e teliw nge yog ngorad e tin ba t’uf rorad,” aray rogon ni yog fare journal Asiaweek. Angin ni yib riy, e ginangey e journal ni gaar: “Fare fayleng e ke chugur ni nge aliliy.” Be’ nib gilbuguwan ko pi yurba’ i teliw nu Meriken e gaar: “U m’on ni nge tal e cham ma ngam li’ed fapi terrorist ngar m’ad.” Mang e puf riy ni yog? “Ngan li’ urngin e terrorist u fithingan Somol.” Rib thil, ko n’en ni yog e Bible ni gaar: “Faanra gaar be’, ‘Ba t’uf Got rog,’ machane be fanenikay walagen ni girdien Kristus, ma be lifith l’ugun.” (1 John 4:20) I yog Jesus ni gaar: “Nge t’uf romed e pi toogor romed.” (Matthew 5:44) In raba’ e teliw ni ga manang ni ma un e girdi’ riy ko mahl?

◼ MACHIB KO TELIW NI GOOGSUR NI KE GARER: Baga’ ni ma machibnag e teliw ni ba’ e yaal ni dab ni guy nra par nib fas u tomuren ni ke yim’ e girdi’. Bochan e re machib ney, ma ke yoor girdien e teliw ni ma pi’ e salpiy ni ngan yibilay fare yaal. Machane, machib ko Bible e ba thil. “Fare yaal ni ma denen​—e ra yim’.” (Ezekiel 18:4, New World Translation) “Piin ni kab fas e yad manang ni yad ra yim’; machane piin ni kar m’ad, e dariy e chi n’en ni yad manang.” (Eklesiastes 9:5, NW) Ke fil Jesus ni ku ra fas e piin kar m’ad​—ma de t’uf ni ngan faseg e girdi’ ni faanra bay e yaal rorad ni dabi yim’. (John 11:11-25) Ma machibnag e teliw rom ni dabi yim’ e yaal, fa?

◼ KAN PAG NI NGAN RIN’ E NGONGOL NDE YALEN: Boch e nam e ke dugliy e galesiya riy ni rayog ni mang prist e pumoon ni yad ma par e pumoon ara ppin ni yad ma par e ppin ma ri yad be athamgil ni ngan k’aring e pi am ni ngan pag ngan mabgol ni aram rogon. Mus ko pi galesiya ni yad ma yog nib kireb e ngongol ndarngal ma kar paged e piin ma yog e thin rorad yad be kol e bitir. Mang e ri be fil e Bible u murung’agen e ngongol ndarngal? Ke weliy nib fel’ rogon ni gaar: “Dab mu banniged gimed: ya girdi’ ni ma ngongliy e ngongol ko darngal, ara yad ma ta’ fan ma yad ma meybil ko liyos ni ma meybil boch e girdi’ ngay, ara yad ma par e piin ni gathi mabgol rorad, ara yad e pumoon ni ma darngalnag e pumoon . . . dariy bagayad e mit i girdi’ ney nrayog ngorad e gin nsuwon Got.” (1 Korinth 6:9, 10) Ga manang boch e teliw ni yad ma pag ni ngan rin’ e ngongol ndarngal, fa?

Mang e ra buch ko pi yurba’ i teliw ni ma yib wom’engin nib kireb? I ginangey Jesus ni gaar: “Re ke gek’iy ndabi yib wom’engin nib fel’ e yira th’ab nga nin’ nga mit e nifiy.” (Matthew 7:19) Rriyul’, teliw ni googsur e yira gothey min thangrad! Machane uw rogon nge wuin e ra buch e re n’ey? Yiiy ni bay u Revelation guruy ni 17 nge 18, e ra pi’ e fulweg.

Uw Rogon ni Ra Mus e Teliw ni Googsur?

Ngan susunnag. Fare pin nib gilbuguwan ko kireb ni be ngongliy ni be chuway’ ngak ni ke par nga daken keru’ fare gamanman nib tatamdag yaan. Re gamanman nem e medlip lolugen ni ba’ ma ragag e gagey rok. (Revelation 17:1-4) Mini’ e be yip’ fan fare pin ni ma chuway’ ngak? Bay gelngin ni nge “gagiyegnag e pi pilung nu fayleng.” Ke yin’ e mad nib reen purple, ma ma fanay e incense, ma kari yoor ban’en rok. Kub muun ngay, ni ke ‘bannag urngin e girdi’ ko pi nam u fayleng’ ko pig rok ni goo bogi ban’en. (Revelation 17:18; 18:12, 13, 23) Ke ayuwegdad e Bible ni ngan guy ni re pin ney ni ma chuway’ ngak e aram fare ulung ko yuraba’ i teliw ni googsur u fayleng ni polo’. Gathi be yip’ fan taab barba’ e teliw, ya urngin e teliw ni ma yib wom’engin nib kireb.

Fare gamanman ni ke af fare pin nga daken e be yip’ fan urngin e am nu fayleng. (Revelation 17:10-13) Teliw ni googsur e be yan u daken keru’ fare gamanman ni be yip’ fan e am u fayleng ni be guy rogon ni nge gagiyegnag e tin ni yad be dugliy nge gin ngar sorgad ngay.

Dabki n’uw nap’an, ma ra buch ban’en ni yira gin ngay. “Ma fa ragag i gagey ni kam guy nge fare gamanman e bay ra fanenikayed fare pin ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’.” (Revelation 17:16) Rib tomgin ni yira dada’ ngay nra chel e pi am nu fayleng ngar chamgad ko pi yurba’ i teliw ni googsur ngan thangrad. Mang e ra k’aring e re n’ey? Fare Bible ni Revelation e be pi’ e fulweg ni gaar: “Ya ke ta’ Got nga lan gum’ircharad ni ngar ngongliyed e tin ni be finey.” (Revelation 17:17) Arrogon, ra pining Got e teliw ni googsur nge yog fan urngin e ngongol nrib kireb ni ke rin’ u fithingan. Ra rin’ Got nrib mat’aw, ni ra fanay e am nu fayleng nib fel’ thilrow e teliw ni googsur nge mang ir e gothey.

Mang e thingar mu rin’ ni faanra dabum ni ngam un ko n’en ni ra buch ko teliw ni googsur? I yog Got ni gaar, “Mired pi girdieg ngam chuwgad rok!” (Revelation 18:4) Riyul’, ereray e ngiyal’ ni ngan chuw ko teliw ni googsur! Machane ba uw e gin ni ngan mil ngay? Gathi ngan yan ko piin ni de mich Got u wan’ rad, ya dariy e athap rorad nga m’on. (2 Thessalonika 1:6-9) Kari mus ni teliw ni riyul’ e yira naf ngay. Uw rogon ni ga ra poy e bin riyul’ e teliw?

Uw Rogon ni Ngan Poy e Bin Riyul’ e Teliw

Mang wom’engin nib fel’ ni ra yibnag e bin riyul’ e teliw?​—Matthew 7:17.

Bin Riyul’ e Teliw . . .

◼ YAD MA T’UFEGEY: Tin riyul’ e tapigpig e “gathi yad e girdi’ nu roy u fayleng,” ma dar yoor raba’gad nbochan raen dowey ara yalen, ma yad ma dag ni ‘bay e t’ufeg u fithik’rad.’ (John 13:35; 17:16; Acts 10:34, 35) Ba m’agan’rad ngay ni ngar m’ad ni fan ngak bochi yad ko bin ngar li’ed boch i yad.​—1 John 3:16.

◼ PAGAN’ KO THIN ROK GOT: Bin riyul’ e teliw e machib rorad e yib ko Thin rok Got ni fare Bible, ma gathi machib ni “sum ko girdi’” nge “motochiyel ni girdi’ e sunumiy” e yad be machibnag ngak e girdi’. (Matthew 15:6-9) Mang fan? Ya “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoliyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy.”​—2 Timothy 3:16.

◼ MA GELNAG CHON E TABINAW MA MA FOL KO NGONGOL NIB FEL’: Bin riyul’ e teliw e ma skulnag pi figirngiy ngari ‘t’uf rorad e piin nleengirad ni bod rogon nib t’uf dowrad rorad,’ me ayuweg pi leengiy ni ‘ngari ta’ fan figirngin,’ ma ma fil ko piin bitir ni ‘ngar folgad ko gallabthir rorad.’ (Efesus 5:28, 33; 6:1) Maku, piin ni kan pi’ mat’awrad ni ngar ayuweged girdien e galesiya e thingari yan i aw ni be’ nib fel’ thin nge pangin.​—1 Timothy 3:1-10.

Bay barba’ e teliw ni ma fol ko pi n’ey? Fare ke babyor ni Holocaust Politics, ni kan fal’eg ko duw ni 2001, e be gaar: “Faan gomanga boor e girdi’ ni be rin’ e pi n’en ni be machibnag ma be rin’ e Pi Mich Rok Jehovah, ma ra tal fare Magothgoth nib gel ma ma li’ girdi’ e dabki gafgownag e fayleng.”

Riyul’, ni 235 e nam ni bay e Pi Mich Rok Jehovah riy e gathi kemus ni yad be machibnag e thin ko Bible​—ya ku yad be fanay ko yafas rorad. Gamad be pi’ e athamgil nga lanin’um ni nga mog ko Pi Mich Rok Jehovah ngar ayuweged gur ngam fil e tin ba m’agan’ Got ngay ma aram e ra fel’ e liyor rom u wan’. Ereray e ngiyal’ nib t’uf ni ngam rin’ ban’en. Dab mu sagaal. Ya ke chugur ni nge mus e teliw ni googsur!​—Zefaniah 2:2, 3.

Faanra ga baadag ni ngkum nang boch murung’agen e Bible ni be wereg e Pi Mich Rok Jehovah, ma dab mu magawon ni ngam yol ngorad ko re address ni baaray nga but’.

□ Without obligation, I request a copy of the brochure Mang e Ba T’uf ni Ngad Rin’ed ku Got?

□ Please contact me concerning a free home Bible study.

[Blurb on page 3]

Teliw ni googsur e ma gagiyegnag “laniyan’ e pi pilung nu fayleng”

[Blurb on page 3]

“Mired pi girdieg ngam chuwgad rok”