Ngan Digey E Teliw Ni Googsur!

Satan nge pi moonyan’ rok e daburad ni ngam pigpig ku Got. Yad baadag ni ngar chefeged e girdi’ nga orel rok Got nfaan rayog rorad. Ba uw rogon ni yad ma guy rogon e re n’ey? Reb e kanawo’ e daken e pi yurba’ i teliw ni googsur. (2 Korinth 11:13-15) Teliw ni googsur e dabi fil e thin riyul’ nu Bible ngak e girdi’. Teliw ni googsur e bod e salpiy nde riyul’​—bod yaan e salpiy, machane dariy fel’ngin. Rayog ni nge karing boor e magawon ngom.

Teliw ni goosur e ri dabiyog ni nge falanag Jehovah, ni fare Got ko tin riyul’. Nap’an ni immoy Jesus u fayleng, ma bay yu ulung i girdi’ ni ri yad baadag ni ngar thanged e fan rok. Yad ma lemnag ni rogon ni ri yad be tiyan’rad e aram e bin mmat’aw. Ke lungurad: “Bay e Chitamangimad nri taareb, ni aram Got.” Taareb rogon ko lem rok Jesus fa? Danga’! Yi gaar ngorad: “Gimed e pi fak e chimangimed, ni fare Moonyan’.” (John 8:41, 44) Ngiyal’ ney e boor e girdi’ ni ma lemnag ni yad be liyor ku Got, machane bin riyul’ riy e yad be pigpig ngak Satan nge fapi moonyan’ rok!​—1 Korinth 10:20.

Ri bod e yu ke gek’iy ni ke misilpig ni ma yib wom’engin nib kireb, ere teliw ni googsur e ma yib e girdi’ riy nib kireb e pi n’en ni yad ma rin’. Ke sug e fayleng ko magawon ya ma rin’ e girdi’ e tin kireb. Bay e ngongol ni puwlag, nge cham, nge moro’ro’, nge wagey, nge ma li’ girdi’, nge mokol ppin. Boor e girdi’ ni ma rin’ e pi kireb ney ni bay e teliw rorad, machane teliw rorad e de yog ni nge ayuwegrad nguur rin’ed e tin bfel’. Dabiyog nra fagergad Got nge mada’ ko ngiyal’ ni kar taleged i rin’ e kireb.​—Matthew 7:17, 18.

Teliw ni googsur e ma fil rogon ngak e girdi’ ni ngar meybilgad ko liyos. Yog Got ni dabni meybil ko liyos. Ba puluw e re n’ey. Ga ra adag ni faanra yib e fager rom i non ko sasing rom ma dabi non ngom? Rayog ni ngan nog ni be’ ni aram rogon e riyul’ ni fager rom? Danga’ dabiyog. Ere Jehovah baadag ni ngi i non e girdi’ ngak, ma gathi liyos, fa sasing, ni dariy e pogofan rok.​—Exodus 20:4, 5.

Teliw ni googsur e yima fil riy ni yugu ba mat’aw nran li’ e girdi’ u nap’an ni yibe mahl. Ki yog Jesus ni piin fager rok Got e bay e t’ufeg u fithik’rad. Dabda liyed e girdi’ nib t’uf rodad. (John 13:35) Ku ba kireb rodad ni ngad liyed e girdi’ ni mus ko piin nib kireb. Nap’an ni yib e pi toogor rok Jesus faram ni ngar koled, ma de pag ni nge cham pi gachalpen ni fan e ngar ayuweged.​—Matthew 26:51, 52.

Teliw ni googsur e yima fil riy ni piin nib kireb e ra gafgow u fithik’ e nifiy u ar. Ke mada’ ko chiney, ma Bible e be fil ni denen e ma fekey i yan ko yam’. (Roma 6:23) Jehovah e reb e Got ko t’ufeg. Ra gafgownag reb e Got nib t’uf e girdi’ rok e girdi’ ni manemus? Ri danga’! U Paradis e ra par ni kari mus nri taareb e teliw riy, ni fa binem ni ke micheg Got. (Revelation 15:4) Ma urngin e teliw ni bay rogon ko ban rok Satan e go’ ra chuw.