Mang e Ra Buch ko Pi Yurba’ i Teliw?

1. Gubin e teliw nib fel’, fa?

Gubin raba’ e teliw ma bay e girdi’ riy nib yul’yul’ ngay. Gad ba felfelan’ ya be guy Got e pi girdi’ ney ma ma lemnagrad. Machane, yibe fanay e pi yurba’ i teliw ni fan nga boch ban’en nib kireb. (2 Korinth 4:3, 4; 11:13-15) Rogon ni be m’ug ko news e bay boch e teliw ni yad ma un nga ngongolen e terrorist ara girdi’ nib kireb, nge girdi’ ni yibe li’ ni yugu demtrug, nge mahl, nge bitir ni yibe gafgownagrad. Re n’ey e ma kirebnag laniyan’ e piin nib mich Got u wan’rad.​—Mu beeg e Matthew 24:3-5, 11, 12.

Ba’ nriyul’ e teliw e yad ma pining e sorok ngak Got, ma pi yurba’ i teliw ni googsur e yad ma rin’ boch ban’en nde m’agan’ Got ngay. Yad ma machibnag boch ban’en ndariy u lan e Bible, nib muun ngay boch e machib nde riyul’ u murung’agen Got nge piin ni kar m’ad. Machane, baadag Jehovah ni nge nang e girdi’ e tin riyul’ u murung’agen.​—Mu beeg e Ezekiel 18:4; 1 Timothy 2:3-5.

2. Mang e ra buch ko pi yurba’ i teliw?

Pi yurba’ i teliw ni yad ma yog ni yad be t’ufeg Got, machane bin riyul’ riy e yad be t’ufeg e pi n’en ni bay ko re fayleng rok Satan ney e dabiyog ni ngar bannaged Got. (James 4:4) Be yog e Bible ni pi yurba’ i teliw ni googsur e ka nog “fare Babylon nib Gilbuguwan” ngorad. Babylon e aram reb e mach ni immoy kakrom. Aram e gin ni sum e teliw ni googsur riy u tomuren ni yib e Ran i Tharey e Fayleng u nap’an Noah. Dabki n’uw nap’an me thang Got e pi yurba’ i teliw ni yad be bannag e girdi’ ma yad be gafgownagrad.​—Mu beeg e Revelation 17:1, 2, 5, 16, 17; 18:8.

Ku bay ban’en ni yira felfelan’ ngay. Dawori pag Jehovah talin e girdi’ ni yad bay ko pi yurba’ i teliw ni googsur u fayleng i yan nriyul’ ni yad baadag ni ngar nanged e tin riyul’. Be taarebnag laniyan’ e pi girdi’ ney, ni aram e be fil e tin riyul’ ngorad.​—Mu beeg e Mikah 4:2, 5.

3. Mang e susun ni nge rin’ e pi girdi’ ney?

Ma lemnag Jehovah e piin nib t’uf e tin riyul’ nge tin nib fel’ rorad. Be pi’ e athamgil nga lanin’rad ni ngar chuwgad ko pi yurba’ i teliw ni googsur. Piin nib t’uf Got rorad e ra m’agan’rad ngay ni ngar thilyeged boch ban’en ko yafas rorad ya ngar rin’ed e tin nib m’agan’ ngay.​—Mu beeg e Revelation 18:4.

Nap’an ni rung’ag e piin ni yad baadag e tin riyul’ fare thin nib fel’ ni i machibnag e pi apostal u nap’an e bin som’on e chibog, ma yad ba felfelan’ ni ngar folgad riy. I fil Jehovah ngorad e bin nib fel’ kanawoen e yafas nra yibnag e felfelan’ nge athap ngorad. Ba fel’ ni ngad folwokgad rorad ni bochan e kar folgad ko fare thin nib fel’ mi yad m’oneg Jehovah u wan’rad.​—Mu beeg e 1 Thessalonika 1:8, 9; 2:13.

Ba felfelan’ Jehovah ni nge yib e piin ni kar chuwgad ko pi yurba’ i teliw ni googsur ngar uned ko pi tapigpig rok ko liyor ni yad be tay. Faan ga ra rin’ e re n’ey, ma ra fel’ e tha’ u thilmew Jehovah, mag pirieg boch e girdi’ ni yad e pi tapigpig rok ni yad ra mang pi walagem, miki yog e yafas ndariy n’umngin nap’an ngom.​—Mu beeg e Mark 10:29, 30; 2 Korinth 6:17, 18.

4. Uw rogon nra yibnag Got e felfelan’ nga ga’ngin yang e fayleng?

Yira felfelan’ ni ngan nang ni dabki n’uw nap’an min pufthinnag e pi yurba’ i teliw ni googsur. Re n’ey e ra chuweg e girdi’ ko gafgow, ma aram e dakuriy e ngiyal’ nra i bannag e pi yurba’ i teliw e girdi’ ma be yurba’nagrad. Piin ni yad ra magey e ngiyal’ nem e yad ra par ni ke taareban’rad ma yad be liyor ko bin riyul’ e Got.​—Mu beeg e Revelation 18:20, 21; 21:3, 4.