Mang Fan ni Thingari Ga’ Fan e Bible u Wan’um?

Bible e aram e re ke babyor nri boor e girdi’ nu fayleng ni yad baadag, maku boor e girdi’ ni kar beeged e thin riy. Mang fan? Reb i fan e bochan ni pi n’en ni bay riy e rayog ni ngad fanayed nga lan e yafas rodad. Bay murung’agen e girdi’ riy nge rarogon e yafas rorad nge n’en ni ur rin’ed yugu boch e girdi’ nge Got u taabang. Pi n’ey e boor ban’en ni yira fil riy ya bochan ni kan yoloy e thin riy nib tamilang mab mom ni ngan nang fan. Ku rayog ni ngan piliyeg nga boor mit e thin, ma gubin mit e girdi’ nrayog ni ngar nanged fan e thin riy ni yugu aram rogon nib thilthil e ngiyal’ nge gin ni yad be par riy. Gubin ngiyal’ ni yira fol ko pi kenggin e motochiyel u Bible ma ra yib angin.

Ma n’en nth’abi ga’ fan riy, e thin ko Bible e be micheg ni gathi kemus ni aram ba ke babyor ni murung’agen Got ya ba ke babyor ni ke yib rok Got. Maku be weliy murung’agen fithingan Got nge rarogon, nge fan ni ke sunmiy e fayleng nge girdi’. Pi n’ey e dariy e ngiyal’ nra thil. Maku be tamilangnag e thin ko Bible murung’agen e pi magawon kakrom u thilin e fel’ nge kireb: pi thin ni bay riy e bod reb e yat nra beeg e girdi’ ma yad baadag, ma nap’an ni yad ra mu’ i beeg ma yad ra felfelan’. Ra ga be beeg e Bible ni ga baadag ni ngam fol riy, ma aram e rayog e michan’ nge athap ngom.

U lan e Bible e gad ra pirieg riy murung’agen boch ban’en ndabiyog ni ngan pirieg u bang. Ni bod ni be weliy e tin riyul’ u murung’agen e:

• Gin ni kad bad riy nge fan ni gadad be gafgow

• N’en ni ke rin’ Got, ya nge yag ni ngan biyuliydad

• N’en ni rin’ Jesus ni fan ngodad

• N’en nra buch ko fayleng nge girdi’

Ere mang fan ndab mu yaliy e bin migid e page, mag fal’eg i lemnag e n’en ni be weliy e Bible murung’agen?