Ke Rin’ Got Boch Ban’en ni Nge Ayuweg e Girdi’ Rok

I micheg Got ngak Abraham ni fa en “fak” ara owchen ni kan yiiynag e ra yib ko tabinaw rok. Ma u daken fa en fak e yira tow’athnag “urngin e nam nu fayleng.” (Genesis 22:18) Tungin Abraham ni aram Jakob e munmun me yan i par nga Egypt ni aram e gin ni yoor chon e tabinaw rok riy, mar manged fare nam nu Israel.

Me munmun, me Farao ni ir e pilung nu Eygpt nib kireb e gafgownag piyu Israel nge mada’ ko ngiyal’ ni pi’ Got Moses ni profet ni nge pow’iyrad nga wuru’ fare nam. I ngongliy e maang’ang ni aram e sey fa gi day ni Red Sea ya nge yag ni thap piyu Israel nga barba’. Ma tomuren e re n’em me pi’ Got e motochiyel ngorad nib muun ngay fa Ragag i Motochiyel ni nge pow’iyrad me yororiyrad. Ma pi motochiyel nem e tamilangnag ni bay e maligach ni ngar pied ya nge yag ni ngan n’ag fan e denen rorad. Ke thagthagnag Got nga laniyan’ Moses ni nge yog ngak piyu Israel nra pi’ Got yugu reb e profet ngorad. Re profet nem e aram fa en ni “fak” ni kan micheg.

Ke pag 400 e duw nga tomuren me micheg Got ngak David ni Pilung ni fa en ni “fak” ni kan yiiynag murung’agen u nap’an ni sum fare magawon u Eden e ra gagiyeg u Gil’ilungun Got ma ra par ndariy n’umngin nap’an. Ma ir fare Messiah ni ke dugliy Got nra ayuweg e girdi’ nge Chuwegrad ko gafgow me sulweg fare fayleng nge mang ba Paradis.

I tamilangnag Got murung’agen fare Messiah ni buchuuw ma buchuuw u daken David nge boch e pi profet. Kar yiiynaged ni ir be’ nib sobut’an’ mab gol ma nap’an nra gagiyeg, ma dakuriy e girdi’ nra yim’ ko bilig, ma ra chuw e lem ni laniyan’, ma ra m’ay e mahl. Ra gapas thilin urngin e girdi’ maku ra gapas thilin e girdi’ nge gamanman. M’ar, nge gafgow, nge yam’ ni aram boch ban’en nde m’agan’ Got ngay ko tabolngin e ra chuw, ma piin ni kar m’ad e yira fasegrad ko yam’ ngar pared u fayleng.

Ke yiiynag Got u daken Mikah ni profet ni yira gargelnag fare Messiah u Bethlehem miki yiiynag u daken Daniel ni profet ni bay ni li’ ngem’. Machane, ra faseg Got fare Messiah ko yam’ me dugliy ni nge mang Pilung u tharmiy. Miki guy Daniel ni Gil’ilungun fare Messiah e ra yan nga lon urngin e am me par ni manemus. Gur, riyul’ ni ke yib fare Messiah nrogon ni kan yiiynag?

​—Kan fek ko Genesis 22-50, Exodus, Deuteronomy, 2 Samuel, Psalms, Isaiah, Daniel, Mikah, Zekariah 9:9.