Ra Chuweg Got e Girdi’ ko Gafgow u Daken fare Messiah

“Rogon ni ma yim’ urngin e girdi’ ni bochan e yad taab girdi’ Adam, e aram rogon ni gubin e girdi’ ni bay ni faseg ko yam’ ni bochan e kar taab girdi’gad Kristus.”​—1 KOR. 15:22.

1, 2. (a) Mang e rin’ Andrew nge Filip u nap’an ni kar mada’gad Jesus? (b) Mang fan ni ka boor ban’en ni be micheg e ngiyal’ ney ni Jesus e ir fare Messiah ko fa bin som’on e chibog?

“KUG piriegew fare Messiah,” ireray e n’en ni yog Andrew ngak Peter ni walagen, ya ke mich u wan’ ni Jesus nu Nazareth e ir Fa En ni Ke Dugliy Got. Ke felfelan’ Filip me gay Nathanael ni fager rok me yog ngak ni gaar: “Kug piriegew faanem ni yoloy Moses murung’agen nga lan fare ke babyor ko Motochiyel, ni ku ir fa en ni ki yoloy fapi profet murung’agen. I ir Jesus, ni fak Josef nu Nazareth.”​—John 1:40, 41, 45.

² Gur kari mich u wan’um ni Jesus e ir fare Messiah ni kan micheg, ni tay Jehovah ni nge ‘pow’iy e girdi’ ngar thapgad ngak’? (Heb. 2:10) Ka boor ban’en e ngiyal’ ney ni be micheg ni Jesus e ir fare Messiah ko fa bin som’on e chibog. Ngiyal’ ni kan gargelnag Jesus nge mada’ ko ngiyal’ ni kan faseg ko yam’ ma Thin rok Got e be dag e mich riy ni ir Kristus. (Mu beeg e John 20:30, 31.) Ma ku be yog e Bible ni bay Jesus u tharmiy ma ra ulul ni nge lebguy e maruwel rok ni ir fare Messiah. (John 6:40; mu beeg e 1 Korinth 15:22.) Ere ku rayog ni nga mog ni “kam pirieg” fare Messiah ni bochan e n’en ni kam fil u Bible. Machane som’on e ba fel’ ni ngad weliyed ko mang fan ni pi gachalpen Jesus kakrom e rogned ni kar pirieged fare Messiah.

Kan Nang fare “Tin nib Mith nib Thothup” u Murung’agen fare Messiah

3, 4. (a) Uw rogon ni ke pirieg pi gachalpen Jesus fare ‘Messiah’ ko bin som’on e chibog? (b) Mang fan ni rayog ni nga mog ni kemus ni Jesus e ra lebguy urngin e yiiy u murung’agen fare Messiah?

³ Uw rogon ni ka ri mudugil u wan’ pi gachalpen Jesus ko fa bin som’on e chibog ni Jesus e ir fare Messiah? I pi’ Jehovah e mich riy ni buchuuw ma buchuuw u rogon ni rayog ni ngan nang fare Messiah. Reb e Bible scholar e ke taareb rogonnag e re n’ey nga ba liyos nni ngongliy ko malang ni kan th’ethab min puthuy nga taabang. Mu susunnag ni boor e girdi’ ni dawor ra nonad ngorad biid ma ra bagayad ma ke fek bang ko fare liyos nga lan reb e singgil. Faan yad ra chamiy urngin yang fare liyos ni kar feked nga taabang me yib i m’ug yaan fare liyos ni polo’, ma yira nang ni bay be’ ni th’ethab fare liyos me pi’ ngak e pi cha’nem. Ra bang u dow fare liyos ma kan taareb rogonnag nga reb fapi yiiy u murung’agen fare Messiah.

⁴ Ere ku taareb rogon ni urngin fapi yiiy u murung’agen fare Messiah ni gathi bogi ban’en ni yigi buch ni nge lebug u daken ta’ be’ ya kan dugliy. I yog be’ ni ma fal’eg i yaliy ban’en ni gathi yigi buch, ya “rib mo’maw’” ni aram rogon. Ya “kab kakrom i yib ma goo Jesus e ke yog rok ni nge rin’ e pi n’em.”

5, 6. (a) Uw rogon ni yira gechignag Satan? (b) Uw rogon ni ke tamilangnag Got ko mini’ e tabinaw rok e ra sum fa en ni “fak” ni kan micheg riy?

⁵ Urngin e thin ko profet u murung’agen fare Messiah e bay rogon ko tin nib thothup “nib mith.” (Kol. 1:26, 27; Gen. 3:15) Mab muun ngay e pufthin ni fan ngak Satan ni ir “fare porchoyog ni ke kakrom” ma ir e k’aring e denen nge yam’ ko girdi’. (Rev. 12:9) Uw rogon ere pufthin nem? Ke yog Jehovah ni fak fare “pin” e ra maad’adnag lolugen Satan. Faen ni fak e ra pirdiiy lolugen fare porchoyog ni aram e ra chuweg faen ni be k’aring e togopuluw, mar, nge yam’. Machane u m’on riy ma ra pag Got Satan ni nge mada’nag wurilen ay “fak” fare pin.

⁶ I yog Jehovah ngak e pi tapigpig rok ko mini’ faen ni “fak” ni kan micheg. I micheg ngak Abraham ni gaar: “Ma urngin e nam nu fayleng ni bay ra weniggad ngog ni nggu fal’eg waathrad ni bod rogon ni kug fal’eg waathan e piin ni owchem.” (Gen. 22:18) Ke yiiynag Moses ni Cha’ney e ra mang “ba profet” ni kab ga’ ngak Moses. (Deut. 18:18, 19) Kan micheg ngak David ni fare Messiah e bayi sum u tabinaw rok ma rayog ni nge mang pilung ni dariy n’umngin nap’an. Ma ku ireray e n’en ni yog boch e profet.​—2 Sam. 7:12, 16; Jer. 23:5, 6.

Boch e Thin ni Be Micheg ni Jesus e Ir fare Messiah

7. Uw rogon ni ke yib Jesus u fithik’ ba ulung i engel ni yima yog ni “ppin” rok Got?

⁷ Immoy Jesus u tharmiy u fithik’ ba ulung i engel ni yima yog ni ppin Rok Got. Me l’og Got nge yib nga fayleng me mang fa en ni “fak” ni kan micheg. Ere ba t’uf ni nge “pag e flaab rok ni gubin” u tharmiy min gargeleg nga fayleng nib girdi’ nib flont. (Fil. 2:5-7; John 1:14) Bochan ni ke “yib” gelngin Got nib thothup ngak Maria ma aram e ke mudugil ni ra gargeleg ‘fare tir nib thothup ma bay ni pining ni Fak Got.’​—Luke 1:35.

8. Uw rogon ni ke lebguy Jesus fare yiiy u murung’agen fare Messiah u nap’an ni ke un ko taufe?

⁸ Fapi yiiy u murung’agen fare Messiah e weliy ko uw nge wuin e ra yib. Rogon ni kan yiiynag e ni gargeleg Jesus u Bethlehem. (Mik. 5:2) Nap’an e bin som’on e chibog ma piyu Jew e ri yad be athapeg e wub rok. Boch e girdi’ e kar guyed John ni ta taufe ma kar fineyed “nsana ir fare Messiah.” Me gaar John: “Be’ nri ka ba ga’ ngog e bay yib.” (Luke 3:15, 16) I chugur ni nge m’ay fare duw ni 29 u nap’an ni ke 30 e duw rok Jesus me yan ngak John ni ngan taufenag. Me ireray e tayim ni ke dag ni ir fare Messiah ma ba puluw ko thin ni kan yiiynag. (Dan. 9:25) Nge mu’ me tabab ko machib me gaar: “Ke taw nga nap’an nnog, ma gagiyeg rok Got e ke chugur.”​—Mark 1:14, 15.

9. Yugu aram rogon ni boor ban’en ni dawori tamilang u wan’ pi gachalpen ma mang e kari mich u wan’rad?

⁹ Machane ba t’uf ni ngan thilyeg e n’en ni be lemnag e girdi’. Ke pining e girdi’ e sorok ngak Jesus, ma ka rogned ni ir e Pilung, machane ngiyal’ nem ma dawor ra nanged fan ni ra par u tharmiy nge gagiyeg boch nga m’on. (John 12:12-16; 16:12, 13; Acts 2:32-36) Machane nap’an ni fith Jesus ni gaar: “Ma gimed e be lungumed e gag mini’?” Me fulweg Peter nib papey ni gaar: “I gur fare Messiah, ni Fak Got gur, ni Got nib fos.” (Matt. 16:13-16) Ma ku aram rogon ni yog Peter u nap’an ni pi gachalpen Jesus e kar digeyed ni bochan e ke magawon lanin’rad ko machib ni i tay.​—Mu beeg e John 6:68, 69.

Ngan Fol Rok fare Messiah

10. Mang fan ni tamilangnag Jehovah nib t’uf ni ngan motoyil ngak Jesus?

¹⁰ Nap’an ni i moy Jesus u tharmiy, ir ba engel nib gel gelngin. Ma nap’an ni i moy u fayleng “ma ir owchen Chitamangin.” (John 16:27, 28, NW) I gaar: “N’en ni gu be machibnag e gathi gag e yib rog, yi yib rok Got, ni ir e ke l’ugeg ku gub.” (John 7:16) Nap’an ni ke thil yaan Jesus me yog Jehovah ngak pi gachalpen ni gaar: “Mu telmed ngak.” (Luke 9:35) Ke yog Got ngorad ni ngar motoyilgad ara ngar folgad rok faanem ni Ke Turguy. Ba t’uf ni ngad daged e michan’ nge ngongol nib fel’, ya ireray e n’en nib t’uf ya nge yog ni ngar felfelan’naged Got me yog ngorad e yafas ni manemus.​—John 3:16, 35, 36.

11, 12. (a) Mang fan ni piyu Jew ko bin som’on e chibog e de michan’rad ni Jesus e ir fare Messiah? (b) Mini’ e ke mich u wan Jesus?

¹¹ Yugu aram rogon ni boor e thin ni be micheg ni Jesus e ir fare Messiah, ma yooren e Jew ko bin som’on e chibog e de mich u wan’rad. Mang fan? Bochan ni ba thil rogon ni yad be lemnag murung’agen fare Messiah, reb riy e yad be lemnag ni ra mang ba Pilung ko am, ni ra ayuwegrad ni dabki gafgownagrad piyu Roma. (Mu beeg e John 12:34.) Aram fan ni de fel’ u wun’rad fare Messiah ni lebguy fapi yiiy ni be yog ni ran darifannag, ra dabuy e girdi’ daken, ma yira gafgownag ma ra yib e kireban’ ngak, me tomur riy ma ran li’ ngem’. (Isa. 53:3, 5) Ngki mada’ ngak boch e pi gachalpen Jesus ni ke kireban’rad ya de chuwegrad Jesus u tan e am nu Roma. Machane kar pared ni yad ba yul’yul’, ma munmun ma kar nanged fan.​—Luke 24:21.

¹² Maku reb i fan ni de fol e girdi’ rok Jesus e bochan e machib ni i tay ya kar lemnaged nib mo’maw’ ni ngar folgad riy. Ya yog Jesus ngorad ni rayog ni nge yog e gin suwon Got ngorad ni faan yad ra ‘pag tilrad,’ ‘mi yad kay’ e ufin u dow Jesus mar unumed rachaen, min ‘gargelnagrad bayay,’ ‘ma gathi yad bang ko re fayleng ney.’ (Mark 8:34; John 3:3; 6:53; 17:14, 16) Girdi’ nib tolangan’ nge piin nib fel’ rogon nge piin ni yad be dake yad be pigpig ngak Got e kar lemnaged ni n’en ni yog Jesus e rib mo’maw’ ni ngan fol riy. Machane piyu Jew nib sobut’an’rad nge boch e girdi’ u Samaria e ke michan’rad ni Jesus e ir fare Messiah ya ke lungurad: “Ri ir faanem ni nge thapeg e girdi’ nu fayleng ngak Got.”​—John 4:25, 26, 41, 42; 7:31.

13. Uw rogon ni ke maad’ad wurilen e rifrif u ay Jesus?

¹³ Ke yog Jesus ni ra turguy e pi prist nib tolang ni ngan li’ ngem’, min richibiy nga daken baley i gek’iy, machane bin dalip e rran e yira faseg ko yam’. (Matt. 20:17-19) Bochan e n’en ni yog Jesus ngak e pi tapuf oloboch ni ir “fare Messiah ni Fak Got” e kar dugliyed ni ke darifannag Got. (Matt. 26:63-66) De pirieg Pilate “tapgin ni ngan thang e fan rok” machane ka rogned ni ke togopuluw ko am “me pi’ Jesus ngorad ngar rin’ed ngak e n’en ni yad be finey.” (Luke 23:13-15, 25) Ere kar ‘dabuyed’ facha’ ni “ir e tabolngin e yafas” kar athamgilgad ni ngan li’ ngem’ ni yugu aram rogon ni boor e mich riy ni Got e ke l’og. (Acts 3:13-15) Fare Messiah e kan “thang e pogofan rok,” min richibiy nga baley i gek’iy ko duw ni 33 ni rorran ni Paluk’af ya ke lebug fare yiiy. (Dan. 9:26, 27; Acts 2:22, 23) Bochan e re yam’ ney ni i tay ma ke lebug fare thin ko Genesis 3:15 ni yira maad’adnag “wurilen e rifrif u ay.”

Fan ni Thingari Yim’ fare Messiah

14, 15. (a) Mang l’agruw i fan ni ke pag Jehovah Jesus ni nge yim’? (b) Mang e ke rin’ Jesus u tomuren ni kan faseg ko yam’?

¹⁴ Bay l’agruw i fan ni ke pag Jehovah Jesus ni nge yim’. Bin som’on, yul’yul’ ni i tay Jesus nge mada’ ko yam’ e ke tamilangnag fan fare “n’en nib thothup nib mith.” Ke dag ni be’ nib flont, e rayog ni nge par “nib yul’yul’ ngak Got” ma nga par u tan e gagiyeg rok Got ni ir e th’abi tolang ni yugu demtrug e skeng ni ke yib rok Satan. (1 Tim. 3:16) Bin l’agruw, e yog Jesus, “ni bod e en ni Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matt. 20:28) Re ‘biyul’ ney e ke pi’ puluwon e denen ni ke af ngak pi fak Adam ma ke bing e kanawo’ ni nge yog e yafas ni dariy n’umngin nap’an ngak urngin e girdi’ ni ke mich Jesus u wan’rad.​—1 Tim. 2:5, 6.

¹⁵ Tomuren dalip e rran min faseg Jesus ko yam’ me m’ug ngak pi gachalpen u lan 40 e rran ni nge mich u wan’rad ni kan faseg ko yam’ me fil boch ban’en ngorad. (Acts 1:3-5) Nge mu’, me yan nga p’eowchen Got u tharmiy ni ke fek fel’ngin fare biyul me son nge mada’ ko ngiyal’ ni nge gagiyeg riy. U m’on riy ma bay boor ban’en ni thingari rin’.

Ra Lebguy e Maruwel Rok ni Ir fare Messiah

16, 17. Mu weliy ko mang e rin’ fare Messiah u tomuren ni ke yan nga tharmiy.

¹⁶ Nap’an ni kan faseg Jesus ko yam’ nge mada’ ko chiney ma ma ayuweg e maruwel u lan ulung ni Kristiano ya ke mang e pilung rorad. (Kol. 1:13) Ra tabab ni nge fanay gelngin ni ir e Pilung ko Gil’ilungun ko ngiyal’ ni kan dugliy. Ma fapi yiiy u Bible nge pi n’en ni buch u fayleng e be micheg ni ke tabab ko gagiyeg ko duw ni 1914, ma ku ireray e ngiyal’ ni ke tabab e tin “tomren” e rran ko re m’ag ney. (Matt. 24:3; Rev. 11:15) De n’uw nap’an nga tomuren ni ke tabab ko gagiyeg ma ir nge pi engel rok e ka ron’ed Satan nge pi moonyan’ rok nga wuru’ e tharmiy.​—Rev. 12:7-10.

¹⁷ Fare maruwel ni ngan machib min fil e thin rok Got ko girdi’ ni tababnag Jesus ko duw ni 29 e dab ki n’uw nap’an me tal. Dab ki n’uw nap’an me pufthinnag urngin e girdi’ nib fas. Ma aram e ra yog ngak e piin ni ke mich Jesus u wan’rad ni gaar: “Mired ngan pi’ e gin nsuwon Got ngomed, ni kan ngongliy rogon kan tay ni fan ngomed ni ka nap’an e ngiyal’ nsunumiy e fayleng riy.” (Matt. 25:31-34, 41) Piin ni de mich u wan’rad ni Jesus e ke mang Pilung e yira thangrad u nap’an ni ra yib e pi engel rok ngar thanged urngin e girdi’ ni kireb. Ma aram e ra m’ag Jesus Satan nge yin’ nga lan fare “low nib toar.”​—Rev. 19:11-14; 20:1-3.

18, 19. (a) Mang e ra rin’ Jesus ni nge lebguy e maruwel rok ni ir fare Messiah? (b) Mang angin ngak e piin ni ma fol?

¹⁸ Nap’an e Gagiyeg rok Jesus nib Biyu’ e Duw ma ra lebguy e maruwel rok ni ir e “Tafonow nrib Manigil ma ba Gonop,” nge “Got nrib Gel,” nge “Chitamngiy ni Manemus,” nge “Pilung ko Gapas.” (Isa. 9:6, 7) Nap’an e gagiyeg rok ma ra ayuweg e girdi’ ngar flontgad nib muun ngay e piin ni kar m’ad ni yira fasegrad ko yam’. (John 5:26-29) Fare Messiah e ra pow’iy e girdi’ ko “fapi alublub ni bay e ran ko yafos riy” ni ra ayuwegrad nge fel’ e tha’ u thilrad Jehovah. (Mu beeg e Revelation 7:16, 17.) Tomuren fa bin tomur e skeng ma urngin e piin ma togopluw nib muun Satan nge pi moonyan’ rok ngay e nin’rad nga “lan fare lipath i nifiy” ma aram e ke lebug fare yiiy ni yira pirdiiy lolugen fare “porchoyog.”​—Rev. 20:10.

¹⁹ Rib fel’ rogon ni ra lebguy fare Messiah e maruwel rok! Re fayleng ney e ra paradis me sug e girdi’ riy nib flont mi yad ra par u fithik’ e felfelan’ ni dariy n’umngin nap’an. Urngin e thin nib kireb ni ka nog nib togopluw ku Jehovah e ra tamilang ni de riyul’. Rib ga’ e tow’ath ni be sonnag urngin e girdi’ ni yad be fol rok Fa En ni ke Dugliy Got!

Kam Pirieg fare Messiah?

20, 21. Mang boch i fan ni ngam weliy ngak e girdi’ murung’agen fare Messiah?

²⁰ Nap’an e duw ni 1914 ma gad be par u ba ngiyal’ ni ka nog e pa·rou·siʹa ngay, ara ngiyal’ ni bay Kristus riy. Yugu aram rogon ni dabiyog ni ngad guyed Kristus ni ke mang Pilung ko Gil’ilungun Got, machane rayog ni ngad nanged ni bochan fapi yiiy ni ke lebug. (Rev. 6:2-8) Yugu aram rogon ma yooren e girdi’ e ngiyal’ ney e taareb rogorad ngak piyu Jew kakrom ni ur darifannaged e mich riy ni bay fare Messiah. Ku yad baadag be’ nib tolang ko am ara reb i girdien e am ni ra ayuwegrad. Machane gur e kam nang ni be gagiyeg Jesus e chiney ni ir e Pilung u Gil’ilungun Got. Ere gathi kam felfelan’ ni kam nang e re n’ey? Ere ku taareb rogom ko pi gachalpen Jesus kakrom, ni kam gaar: ‘Kug pirieg fare Messiah.’

²¹ Ngiyal’ ney u nap’an ni ga be weliy tin riyul’, ga ma tamilangnag murung’agen e maruwel rok Jesus ni ir fare Messiah? Bochan e re n’ey ma ra fel’ u wan’um e n’en ni ke rin’ Jesus, nge n’en ni be rin’ e chiney, nge n’en ni ra rin’ boch nga m’on. Dariy e maruwar riy ni kam weliy ngak e girdi’ rom nge pi fager rom murung’agen fare Messiah ni bod e n’en ni rin’ Andrew nge Filip. Ere mang fan ni dabda machibnaged yad u fithik’ e pasig ma ngad daged ngorad ni riyul’ ni Jesus Kristus e ir fare Messiah ni kan micheg, ni ma fanay Got ni nge chuwegdad ko gafgow?

Rayog ni Ngam Weliy?

• Uw rogon ni pirieg e pi gachalpen Jesus fare Messiah kakrom?

• Mang l’agruw i fan ni yim’ Jesus?

• Mang e bayi rin’ Jesus ni fan ko fare maruwel rok ni ir fare Messiah?

[Pictures on page 25]

Uw rogon ni ke nang e girdi’ kakrom ni Jesus e ir fare Messiah ni kan micheg?

[Picture on page 27]

Nap’an ni ga ra non ngak e girdi’ ma ga ma tamilangnag e maruwel rok Jesus ni ir fare Messiah?