N’en ni Gad Ra Fil Rok Jesus

u Murung’agen e Tabinaw

Mang e nge rin’ e mabgol me par e tabinaw nib felfelan’?

Mabgol e ban’en nib thothup. Nap’an ni fith boch e girdi’ ngak Jesus ko rayog ni nge dar e mabgol fa danga’, me yog ni gaar: “Mogned, dawor mbeeged e pi thin ni baaray u lan e babyor nib thothup ni gaar, ‘Som’on ko tabolngin e sunumiyrow e en ni Tasunumiy ni bagayow e be’ nib pumoon ma bagayow e be’ ni ppin?’ Me gaar, ‘Ereray fan nra digey e pumoon e chitamangin nge chitiningin ngar pirew leengin, mi yow par ni kar taab girdi’gow.’ Ya aram e gathi ku yow ba ruw ni girdi’, ya kar taab girdi’gow. Ere thingari dabi dareg e girdi’ e gali cha’ ni Got e ke chagiyrow. . . . En nra chuweg leengin ni gathi ban’en ni ke par fare pin nge be’ ngki leengiy yugu reb e ppin, e aram e ke th’ab e motochiyel, ya kar pirew yugu reb e ppin ni gathi mabgol rok.” (Matthew 19:4-6, 9) Ere faanra fol ba wu’ e mabgol ko fonow ni pi’ Jesus mi yow par ni yow ba yul’yul’ ngorow, ma aram e rayog ni nge par e tabinaw rorow nib felfelan’.

Mang fan ni t’ufeg ngak Got e ma felfelan’nag e tabinaw?

I gaar Jesus: “‘Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.’ Ereray e bin th’abi ga’ nge bin th’abi ga’ fan e motochiyel.” Ma mang e bin migid ngay e motochiyel? I yog Jesus ni gaar: “Gin’en ni ga ba’ riy e thingari t’uf rom e en ni ir e mmigid ngom [nib muun chon e tabinaw rom ngay] ni gowe gur.” (Matthew 22:37-39) Ere rogon me yog e felfelan’ nga lan e tabinaw e nge fel’ e tha’ u thildad Got, ya t’ufeg rodad ngak e ra k’aringdad ni ngaud t’ufeged gadad.

Mang e ra rin’ e piin figirngiy nge piin leengiy mar felfelan’naged yad?

Faanra i folwok e piin figirngiy rok Jesus ma rayog ni ngar felfelan’naged e piin leengirad. I t’ufeg Jesus e ulung ni Kristiano kakrom me pag fan e pogofan rok ni fan ngorad. (Efesus 5:25) I gaar: “Bod e en ni Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:28) Da i gelnag Jesus e thin ngak e piin ni i ayuwegrad. (Matthew 11:28) Ere piin figirngiy e thingar ur maruwelgad nga mat’awrad ni ke pi’ Got nrogon nra yib angin ko tabinaw.

Ku rayog ni nge yib angin ngak e piin leengiy e n’en ni i rin’ Jesus. Be yog e Bible ni, “Kristus e ir e lolugen urngin e pumoon.” Maku be yog ni “pumoon e ir lolugen leengin.” (1 Korinth 11:3) Dariy ba ngiyal’ ni dabuy Jesus ni nge fol rok Got. Gubin ngiyal’ ni ma tayfan e Chitamangin. I yog ni gaar: “Gubin ngiyal’ ma gu be rin’ e tin nib m’agan’ ngay.” (John 8:29) Faanra i fol e en leengiy rok figirngin ni bochan e ba t’uf Got rok ma be tayfan, ma ra felfelan’nag e tabinaw rok.

Mang e ra fil e piin gallabthir u rogon e lem rok Jesus ngak e piin bitir?

Ba ga’ ni i chag Jesus nge piin bitir ma baadag ni nge nang e pi n’en ni yad be lemnag. Nap’an ni puwan’ pi gachalpen Jesus ngak bogi girdi’ ni kar feked pi fakrad i yib ngak Jesus, me gaar ngorad: “Mpaged e pi bitir nir ngar bad ngog.” (Luke 18:15, 16) Ku bay ba ngiyal’ ni gathibthibnag e girdi’ boch e pagel ni yad be weliy murung’agen e michan’ rorad ngak Jesus. I yog Jesus nib fel’ e n’en ni ke rin’ e pi pagel nem, me gaar ngak fapi girdi’ ni yad be gathibthib: “Dawor mpoyed fa gin’em u lan e babyor nib thothup? Ya be gaar, ‘Kam fil ngak e bitir nge bitir ni kabran ni ngar pininged e sorok nib fel’ rogon.’”​—Matthew 21:15, 16.

Mang e ra fil e piin bitir rok Jesus?

Ke dag Jesus e kanawo’ u rogon nrayog ni nge adag e piin bitir e tirok Got ban’en. Nap’an ni ke 12 e duw rok, me pirieg e gallabthir rok ni bay “u lan e tempel, ni kar pired e pi tamachib nu Israel nga but’, be motoyil ngorad ma be fithrad.” Ere mang angin? “Urngin e girdi’ ni ur motoyilgad ngak e ra gingad nga feni llowan’ ko thin ni ur fithed nga ngi i fulweg.” (Luke 2:42, 46, 47) Yugu aram rogon ni boor ban’en ni manang Jesus, machane de tolangan’. Ya i par ni be tayfan e gallabthir rok. Be gaar e Bible: “I par ni be fol rorow.”​—Luke 2:51.

Mu guy e guruy ni 29 ko fare babyor ni Rayog Ni Ngam Par Ni Gab U Paradis U Fayleng.a

[Footnote]