Pi Tabinaw ko Kristiano, Mu Folwokgad rok Jesus!

“Kristus e . . . dag ngomed rogon ni ngam folwokgad rok, ni aram e nguum leked luwan ay.”​—1 PET. 2:21.

1. (a) Mang e un Fak Got i maruweliy u nap’an ni yibe sunmiy urngin ban’en? (b) Uw rogon e girdi’ u wan’ Jesus?

NAP’AN ni ke sunmiy Jehovah Got lan e lang nge fayleng, ma immoy e bin nganni’ i Fak u tooben ni “bod be’ nib salap i maruweliy ban’en.” Ir e un ngak ngar sunumiyew gubin ban’en u fayleng ni bod e gamanman nge woldug nge girdi’ nge fa gi Milay’ nrib fel’ yaan ni nge tafanay e girdi’. Ma en Fak Got nem, ni munmun min tunguy Jesus ngak, e rib t’uf e “girdi’” rok.​—Prov. 8:27-31; Gen. 1:26, 27.

2. (a) Mang e ke pi’ Jehovah ni nge ayuweg e girdi’? (b) Mang ban’en ni be pi’ e Bible e fonow riy ngak e girdi’?

² Tomren ni ke denen e gal ni som’on e girdi’, ma biyul e yib i mang ban’en nib ga’ fan ko n’en nib m’agan’ Jehovah ngay. Ere, ke pi’ Kristus ni nge mang biyul ni maligach ni nge pithig e girdi’ ko denen. (Rom. 5:8) Miki pi’ e Bible ni aram e gin ni bay e Thin rok riy nra pow’iy e girdi’ ko ngongol nib fel’ ni yugu aram rogon ni ke af e denen ngorad. (Ps. 119:105) Bible e ku aram e gin ni bay e fonow riy nra ayuweg e tabinaw nge par nib fel’ rogon. Bod rogon e fonow u murung’agen e mabgol ni bay ko Genesis. Be yog ni be’ nib moon e ra “yan i chag ngak e ppin rok, ngar pirew ni kar taab girdi’gow.”​—Gen. 2:24.

3. (a) Mang e yog Jesus u murung’agen e mabgol? (b) Mang e gad ra fil ko biney e thin?

³ Nap’an ni i machib Jesus u fayleng me tamilangnag ni mabgol e nge par ni nap’an e yafas. Ki yog ni faanra fol e girdi’ u lan e tabinaw ko pi kenggin e motochiyel ni fan ngorad, ma aram e rayog ni ngar siyeged e ngongol nra kirebnag e par u lan e tabinaw. (Matt. 5:27-37; 7:12) Re thin ney e ra weliy rogon angin e machib nge ngongol rok Jesus ngak e piin figirngiy, nge piin leengiy, nge piin gallabthir, nge piin bitir.

Rogon ni Nge Tay e En Figirngiy ni Kristiano Fan Leengin

4. Mang e ba taareb rogon ko maruwel rok Jesus nge maruwel rok e piin figirngiy ni Kristiano?

⁴ Ke tay Got ni en figirngiy e ir lolugen e tabinaw, ni bod rogon ni Jesus e ir Lolugen e ulung ni Kristiano. I yog apostal Paul ni gaar: “En ni pumoon e ngi i gagiyegnag e ppin rok ni bod rogon Kristus ni ir e be gagiyegnag e galesiya; mi Kristus e ir e ayuweg girdien e galesiya, ni aram downgin nge thapegrad ngak Got. Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efe. 5:23, 25) Rogon e ngongol rok Jesus ngak pi gachalpen e aram rogon ni thingari ngongol e piin figirngiy ni Kristiano ngak e piin leengirad. Ere, ngad weliyed boch e kanawo’ ni i maruwel Jesus nga mat’awun ni ke pi’ Got ngak.

5. Uw rogon e ngongol rok Jesus ngak pi gachalpen?

⁵ Jesus e ba ‘munguy ma ba sobut’an’.’ (Matt. 11:29) Ku ir be’ ni ma rin’ e tin nib t’uf ni nge rin’. Dariy ba ngiyal’ nde lebguy e n’en nib milfan ngak. (Mark 6:34; John 2:14-17) Nap’an nra t’uf ni nge fonownag pi gachalpen, me rin’ u fithik’ e sumunguy. (Matt. 20:21-28; Mark 9:33-37; Luke 22:24-27) Machane, da i puwan’ fa k’aring e tamra’ ngorad. Maku da i rin’ ban’en nra k’aringrad ngar lemnaged ndar t’ufgad rok fa dabiyog ni ngar rin’ed e tin ni ke yog ngorad. Ya ma n’ufrad mma pi’ e athamgil nga lanin’rad. (Luke 10:17-21) Aram fan ni ur ted fan Jesus!

6. (a) Mang e ra fil e piin figirngiy ko ngongol rok Jesus ngak pi gachalpen? (b) Mang e fonow rok Peter ngak e piin figirngiy?

⁶ Ngongol rok Jesus e be fil ngak e piin figirngiy ni Kristiano ni, bochan e yad lolugen e piin leengirad ma aram e gathi be yip’ fan ni kar suweyed yad, ya ngaun tay farad mu un t’ufegrad. Ke pi’ apostal Peter e athamgil nga laniyan’ e piin figirngiy ni ngar folwokgad rok Jesus ‘nguur pired e piin leengirad ma thingar nanged ni yad mmeewar,’ ere ngaun ‘tay farad.’ (Mu beeg e 1 Peter 3:7.) Ere, uw rogon ni nge maruwel e en figirngiy nga mat’awun ni kan pi’ ndabi darifannag e en leengin?

7. Mang boch e kanawo’ ni nge tay e en figirngiy fan leengin riy? Mu weliy.

⁷ Reb e kanawo’ ni nge tay e en figirngiy fan leengin riy e nga i lemnag rogon laniyan’ u nap’an ni nge dugliy ban’en ni bay rogon ko tabinaw rorow. Sana ba t’uf ni ngan puruy’nag boch ban’en ni bod e gin ni ngan yan ni par ngay, ara maruwel, ara boch ban’en ni ma rin’ e tabinaw u taabang ni bod e gin ni ngan yan ngay ko fafel, nge rogon i fanay e salpiy ni be yog nga tabinaw. Pi n’ey e gubin ni bay rogon ko tabinaw, ere ba fel’ ni nga i lemnag e en figirngiy rogon laniyan’ leengin u m’on ni nge dugliy ban’en. Ya faanra rin’ ni aray rogon ma aram e rayog ni nge dugliy ban’en nra yib fel’ngin ko tabinaw miki momnag ngak leengin ni nge tayfan e n’en ni ke dugliy. (Prov. 15:22) Faanra tay e en figirngiy fan leengin ma gathi kemus ni yira tayfan min t’ufeg, ya bin th’abi ga’ fan riy e ra fel’ u wan’ Jehovah.​—Efe. 5:28, 29.

Rogon ni Nga i Tay e En Leengiy Fan Figirngin

8. Mang fan nde fel’ ni ngad folgad ko n’en ni rin’ Efa?

⁸ Piin leengiy ni Kristiano e rayog ni ngar folwokgad rok Jesus u rogon ni ngaur folgad ko en lolugrad. Rib thil rogon e lem rok Jesus u murung’agen e en ni ir lolugen nga rogon e lem rok Efa! De yog ni nge ngongol Efa u rogon nrayog ni nge folwok e piin leengiy riy. Immoy be’ ni lolugen ni ir e ma yog Jehovah ngak e n’en ni baadag ni ngar rin’ew Efa. Machane, de tayfan e re yaram ney maku de fol ko n’en ni yog figirngin ngak. (Gen. 2:16, 17; 3:3; 1 Kor. 11:3) Maku nap’an ni kan bannag ma de fith e en figirngin ko ba fel’ ni nge mich u wan’ e thin rok faanem ni ke yog ngak e n’en ni ‘manang Got’, fa danga’. Ere, n’en ni ke rin’ e ke dugliy e n’en ni nge rin’ figirngin, ni susun e dabi rin’.​—Gen. 3:5, 6; 1 Tim. 2:14.

9. Uw rogon e ngongol rok Jesus ni ngad folwokgad riy?

⁹ Ba thil e n’en ni rin’ Jesus, ya i fol rok e en ni ir Lolugen. Rogon e ngongol rok nge n’en ni i rin’ e ke m’ug riy ni “de guy rogon ni nge gelnag ir nge yan i par nib taareb rogon ngak Got.” Ki “pag e flaab rok ni gubin, nge yib i ngal’ nib tapigpig.” (Fil. 2:5-7) Mus ko ngiyal’ ney ni ke Pilung Jesus, maku dawori thil e ngongol rok, ya ka ma fol ko Chitamangin u gubin ban’en, mma tayfan e liw rok ni ir Lolugen.​—Matt. 20:23; John 5:30; 1 Kor. 15:28.

10. Uw rogon ni nge tay e en leengiy fan e liw rok figirngin?

¹⁰ Be’ ni leengiy nib Kristiano e thingar ki tayfan e liw rok figirngin. (Mu beeg e 1 Peter 2:21; 3:1, 2.) Baaray reb e kanawo’ nrayog ni nge rin’ e re n’ey riy. Susun e bay ban’en ni keb reb e pagel ni fakrow ngak ni nge fith ko rayog ni nge rin’ fa dabiyog. Faanra dawor ra weliyew figirngin e re n’ey u m’on riy, mab fel’ ni nge gaar ngak fare tir, “Kam fith e chitamam, fa dawor?” Ma faanra dawori fith e chitamangin, ma dabi dugliy leengin ni goo ir ya som’on e ngar weliyew figirngin. Ku de fel’ ni nge togopuluw ko n’en ni be lemnag figirngin u p’eowchen e bitir rorow. Faanra der m’agan’ nga ban’en ni ke yog figirngin, ma ngar weliyew ni goo yow.​—Efe. 6:4.

Piin Gallabthir e Ngar Folwokgad rok Jesus

11. Mang e ke rin’ Jesus ni nga i folwok e piin gallabthir riy?

¹¹ Yugu aram rogon nde mabgol Jesus maku de fakay e bitir, machane rayog ni nge folwok e piin gallabthir ni Kristiano rok. Mang fan? Ya ma fil ban’en ngak pi gachalpen u fithik’ e t’ufeg nge gum’an’ ngu daken e thin nge ngongol rok. Ma ki dag ngorad rogon ni ngar rin’ed e n’en ni ke tay chilen ngorad ni ngar rin’ed. (Luke 8:1) Ngongol rok ngak pi gachalpen e ra filed riy rogon ni ngaur ngongolgad ngak e girdi’.​—Mu beeg e John 13:14-17.

12, 13. Mang e thingari rin’ e gallabthir nfaanra yad baadag ni nge ilal pi fakrad ni bay madgun Got u wan’rad?

¹² Piin bitir e ba ga’ ni yad ma fol ko n’en ni ma rin’ e gallabthir rorad, ndemtrug ko tin nib fel’ fa tin nib kireb. Ere gimed e gallabthir e ngam fithed gimed ni nge lungumed: ‘Mang kanawo’ e gamad be dag ko pi bitir romad u rogon urngin e tayim ni gamad ma tay ni fan ko mayal T.V. nge ku boch ban’en ni yima n’ag e chalban ngay? Ma uw rogon e tayim ni fan ko fol Bible nge machib ni gamad ma tay? Mang e n’en nib ga’ fan u wan’ girdien e tabinaw romad? Gur, pigpig ni gamad be tay ngak Got e aram e n’en nrib ga’ fan u wan’mad?’ Faanra baadag e gallabthir ni nge ilal pi fakrad ni bay madgun Got u wan’rad, ma susun e gallabthir e som’on ni ngar ted e motochiyel rok Got nga lanin’rad.​—Deut. 6:6.

¹³ Faanra be athamgil e piin gallabthir ni ngar folgad ko pi kenggin e motochiyel nu Bible ni gubin ngiyal’, ma ra guy e bitir, maku ra yib angin e fonow ni yad ma pi’ ngorad. Machane, faanra guy e bitir nder fol e gallabthir rorad ko pi kenggin e motochiyel nu Bible, ma yad ra lemnag nde ga’ fan ni ngan fol riy. Ma nap’an ni yad ra mada’nag e skeng nge magawon ko re fayleng ney ma dabiyog ni ngar pired ni yad ba gel.

14, 15. (a) Mang e ba ga’ fan ni nge ayuweg e piin gallabthir pi fakrad ni ngar rin’ed? (b) Mang reb e kanawo’ nrayog ni ngar rin’ed e re n’ey riy?

¹⁴ Manang e piin gallabthir ni Kristiano ni gathi kemus ni ggan nge mad e ba t’uf rok pi fakrad, ya ku bay boch ban’en nib t’uf rorad. De gonop e gallabthir nfaanra ngar filed ngak pi fakrad ni ngar nameged e tin nu fayleng ni ma fel’ rogoy riy. (Ekl. 7:12) Jesus e fil ngak pi gachalpen ni ngar m’oneged u wan’rad e gagiyeg rok Got nge tin nib m’agan’ ngay ni ngar rin’ed. (Matt. 6:33) Ere, piin gallabthir ni yad be folwok rok Jesus e susun ni ngar ayuweged pi fakrad ni ngar m’onoggad ko pigpig ni yad be tay ngak Got.

¹⁵ Reb e kanawo’ nrayog ni nge rin’ e gallabthir e re n’ey riy e ngar gayed rogon ni nga i chag pi fakrad ko piin ni yad ma pigpig ngak Got u polo’ e tayim rorad. Mu lemnag gelngin e athamgil nra tay laniyan’ e piin fel’ yangaren ni faan yad ra chag ngak e piin ni yad ma machib u polo’ e tayim nge pi walag ni pumoon ni yad ma lekag e ulung nge ppin rorad. Ma pi missionary, nge piin ni ma maruwel u Bethel, nge piin ni yad ma un ko dimow Kingdom Hall nge ku boch e naun ni yima toy u fayleng i yan, e yad ma weliy rogon e felfelan’ ni ma yib ngorad ko pigpig ni yad be tay ngak Jehovah. Ere, dariy e maruwar riy ni boor ban’en nra ur weliyed ni ke buch rorad nra pi’ e athamgil nga lanin’uy. Pigpig ni be tay e pi walag ney e rayog ni nge ayuweg pi fakmed ni ngar nameged boch ban’en ni fan ko pigpig rorad ngak Got, mar tedan’rad ko tin ni yad be fil u skul nra ayuwegrad ko pigpig u polo’ e tayim.

Piin Bitir, Uw Rogon ni Ngam Folwokgad rok Jesus?

16. Uw rogon ni i tay Jesus fan e gallabthir rok nu fayleng nge Chitamangin nu tharmiy?

¹⁶ Gimed e piin bitir e ngkum folwokgad rok Jesus. Jesus e ni pag gafalngin ngak Josef nge Maria ni ngar ayuwegew, ma i fol rorow. (Mu beeg e Luke 2:51.) Manang Jesus ni yugu aram rogon ndawor ra flontgow, machane ke tayrow Got ni ngar ayuwegew, ere thingar i tayfarow. (Deut. 5:16; Matt. 15:4) Nap’an ni ilal ma gubin ngiyal’ ni ma fol ko Chitamangin nu tharmiy ma ki par nib gel ko pi skeng nge towasar ni i yib ngak. (Matt. 4:1-10) Gimed e piin bitir e ku ra i yib e skeng ngomed maku ra un towasariymed ni nge dab kum folgad ko gallabthir romed. Ere, mang e ra ayuwegmed ni ngam folwokgad ko n’en ni rin’ Jesus?

17, 18. (a) Piin bitir, mang magawon e gimed ma mada’nag u skul? (b) Mang e ra i par e piin bitir ni yad be lemnag ma rayog ni nge ayuwegrad ni ngar gelgad ko magawon ni yad ma mada’nag?

¹⁷ Dabisiy ni oren e bitir u skul romed e darur ted fan e motochiyel nu Bible. Sana yad ma towasariymed ni ngam uned ngorad i rin’ boch ban’en nde fel’, ma faanra dab mu uned ngay mu un gosgosnagmed. Bay bayay ni kan pining boch e ngachal nib kireb ngomed ni bochan e dam uned ko n’en ni yad be rin’? Faanra bay, ma mang e kam rin’ed? Gimed manang ni faanra mu uned u forad ko n’en ni yad be rin’ ni bochan e kam rusgad, ma ra kireban’ e gallabthir romed nge Jehovah. Gimed be lemnag, ma mang e ra buch romed ni faan gimed ra folwok ko bitir u skul romed? Sana bay boch i gimed ni be nameg ni nge un ko machib u polo’ e tayim fa nge mang reb e ministerial servant, fa nge yan i pi’ e ayuw ko machib nga bang nib t’uf e ayuw riy, fe un ko maruwel u Bethel. Machane, faanra um chaggad ko bitir u skul romed, ma gimed be lemnag nrayog ni ngar ayuweged gimed ngam rin’ed e pi n’ey?

¹⁸ Gimed e piin bitir u lan e ulung, gimed ma mada’nag boch e magawon ni ma skengnag e yul’yul’ romed? Ere, mang e gimed ma rin’? Mu lemnaged Jesus. I siyeg e pi n’en ni un waliy ngay ma i par nib mudugil laniyan’ ni fan ko tin nib fel’. Faanra um lemnaged e re n’ey ma ra yib gelngimed ni nga mogned ko bitir u skul romed ndubmed ni ngam uned ngorad i rin’ ban’en ni gimed manang nib kireb. Ere, um pired ni gubin ngiyal’ ma gimed be lemnag fel’ngin nra yib ngomed ni faanra mu pigpiggad ngak Jehovah ni gimed ba yul’yul’.​—Heb. 12:2.

N’en Nra Yibnag e Felfelan’ ko Tabinaw

19. Mang e ra yibnag e bin riyul’ e felfelan’ ngodad?

¹⁹ Jehovah Got nge Jesus Kristus e yow baadag e tin nib fel’ ni fan ko girdi’. Ma rayog ni ngad felfelan’gad ni yugu aram rogon ndawor da flontgad. (Isa. 48:17, 18; Matt. 5:3) Boor ban’en ni i machibnag Jesus nra yibnag e felfelan’ ko girdi’, machane gathi kemus aram, ya ki fil ko girdi’ e pi n’en nra fal’eg e par rorad. Ma ki par ni be tiyan’ ko tin nib ga’ fan mab fel’ e ngongol rok. Ere gad gubin u lan e tabinaw e thingar da folwokgad rok Jesus ya ra yib angin ngodad. Ra t’uf rodad e thin rok Jesus mu ud folwokgad rok ma aram e ra yog e felfelan’ nga lan e tabinaw rodad.

Uw Rogon ni Ga Ra Fulweg?

• Uw rogon ni nge maruwel e piin figirngiy ko liw rorad ni ke pi’ Got?

• Uw rogon ni nge folwok e piin leengiy rok Jesus?

• Mang e ra fil e piin gallabthir ko ngongol rok Jesus ngak pi gachalpen?

• Mang e ra fil e piin bitir ko n’en ni i rin’ Jesus?

[Picture on page 15]

Mang e nge rin’ e en figirngiy u m’on ni nge dugliy ban’en u lan e tabinaw?

[Picture on page 16]

Mang ban’en nthingari tay e en leengiy fan e liw rok figirngin riy?

[Picture on page 17]

Piin bitir e yad ma folwok ko tin nib fel’ ni ma rin’ e gallabthir rorad