Mu Par ni Gab Felfelan’ u Nap’an e Magawon

“Piin yad ma naf ngom e bay ra felfelan’gad; rayog ni gubin ngiyal’ ni nguur tanggad ni yad ba felfelan’.”​—PS. 5:11.

1, 2. (a) Mang boch ban’en e ngiyal’ ney ni ma k’aring e magafan’ ngodad? (b) Yugu aram rogon ni ma yib e gafgow ngodad, mang e thingari athamgil e tin riyul’ e Kristiano riy?

PI MICH ROK JEHOVAH e ma yib e gafgow ngorad ni bod rogon e gafgow ni ma yib ko girdi’. Boor e girdi’ rok Got e kar gafgowgad ni bochan e bugel, mahl, nge boch ban’en ni ke rin’ e girdi’ ni de mat’aw. Ku ma magafan’rad ko gafgow u nap’an e yoko’, uyungol, m’ar nge yam’. Ke gaar Paul: “Gadad manang ni urngin e tin ni ke sunumiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney.” (Rom. 8:22) Ku ma yib e gafgow ngodad ni bochan e dad flontgad. Ku rayog ni nga dogned e thin ni yog David ni Pilung ni gaar: “Gu be limach u fithik’ pi denen rog ni ke sugubur; nib gilab ni kaygi tomal ni nggu chibiy.”​—Ps. 38:4, BT.

² Gathi kemus ni gafgow ni ma yib ko girdi’ e ma yib ko tin riyul’ e Kristiano, ya ku yima gafgownagrad ni bod rogon ni un gafgownag Kristus. (Luke 14:27) U ni fanenikay Jesus min gafgownag, ma ku aram e n’en ni un rin’ ngak pi gachalpen. (Matt. 10:22, 23; John 15:20; 16:2) Ere faanra ngad folwokgad rok Kristus mab t’uf ni ngad gelnaged gadad ma gad athamgil u nap’an ni gad be sonnag e tow’ath ni ka bay nga m’on.​—Matt. 7:13, 14; Luke 13:24.

3. Uw rogon ni gad manang ni pi Kristiano e gathi gubin ngiyal’ ni ngar gafgowgad ni fan e ngar felan’naged Got?

³ Re n’ey e be yip’ fan ni tin riyul’ e Kristiano ni yad be athapeg e yafas e dabiyog ni ngar felfelan’gad? Kari mus ni ngaud pared ni gad be gafgow ma be kireban’dad nge yan i mada’ ko tomur? Ba tamilang ni baadag Jehovah ni ngad pared ni gad ba felfelan’ u nap’an ni gad be son nge mada’ ko ngiyal’ nra lebguy e n’en ni ke micheg. Ki tamilangnag e Bible ni tin e girdi’ ni ma liyor ngak Got e yad e girdi’ ni ba felfelan’. (Mu beeg e Isaiah 65:13, 14.) Be gaar e Psalm 5:11: “Piin yad ma naf ngom e bay ra felfelan’gad; rayog ni gubin ngiyal’ ni nguur tanggad ni yad ba felfelan’.” Arrogon, ku rayog ni ngad felfelan’gad me gapas lanin’dad u nap’an e gafgow. Ngad guyed boch e thin nu Bible ni rayog ni nge ayuwegdad ni ngad felfelan’gad ko ngiyal’ nra yib e skeng ngodad.

Jehovah ‘e Ba Got nib Felfelan’’

4. Uw rogon laniyan’ Got u nap’an ni dakun fol ko tin nib m’agan’ ngay?

⁴ Am mu lemnag Jehovah. Ir e got ni Th’abi Gel ma ba milfan e fayleng nge tharmiy ngak. Dariy ban’en ni dariy rok ma de t’uf e ayuw rodad rok. Yugu aram rogon ni rib gel gelngin, machane Jehovah e ke kireban’ u nap’an ni ke togopuluw reb e engel rok ni aram Satan ngak. Ma ki kireban’ u tomuren ni ke un boch e engel ko togopuluw. A ku mu lemnag gelngin e kireban’ ni ki tay Got u nap’an ni daki fol Adam nge Efa ni aram e n’en ni th’abi ga’ fan ni ke sunmiy Got u fayleng. Ka nap’an e ngiyal’ nem i yib ngaray ma bokum bilyon e girdi’ ni kar dabuyed ni ngar folgad rok Jehovah.​—Rom. 3:23.

5. Mang e k’aring e kireban’ ngak Jehovah?

⁵ Togopuluw ni be tay Satan e ka be gel i yan. Gonap’an 6,000 e duw, ni ke guy Jehovah ni ke sug e fayleng ko girdi’ ni ma meybil ko liyos, cham, ma thang e fan ko girdi’, nge ngongol ni darngal. (Gen. 6:5, 6, 11, 12) Ma ku be rung’ag e girdi’ ni yad lifith l’ugunrad ma yad be yog e thin ni be darifannag Got. Ku arrogon e piin ni yad ma liyor ngak Got ni yu ngiyal’ e yad ma k’aring e kireban’ ngak. Be gaar e Bible: “Rib yoor yay nra togopluwgad ngak u lan e ted ni desert; boor yay nra kirebniged laniyan’! Ur skengniged Got u bayay nge bayay, nguur amithniged laniyan’ fare Got nib Thothup rok yu Israel.” (Ps. 78:40, 41, BT) Rib gel e kireban’ ni ma tay Jehovah u nap’an ni dab ki fol e girdi’. (Jer. 3:1-10) Rib tamilang ni ma kireban’ Jehovah u nap’an nra rin’ e girdi’ e kireb.​—Mu beeg e Isaiah 63:9, 10.

6. Mang e ma rin’ Got u nap’an ni kan k’aring e kireban’ ngak?

⁶ Ere de par Jehovah ni de rin’ ban’en u nap’an ni kan k’aring e kireban’ ngak. Nap’an nra sum boch e magawon, mab gur Jehovah ni nge pithig u rogon nib mat’aw. Ke pag ni nge buch boch ban’en ya nge yog ni nge riyul’ e tin nib m’agan’ ngay ko tomur. Ere be par Jehovah nib felfelan’ ya bayi tamilang mat’awun ni nge gagiyeg me tow’athnag e piin nib yul’yul’ ni ma liyor ngak. (Ps. 104:31) Yugu aram rogon ni yibe darifannag Jehovah, ku be par ni ir ba Got nib “felfelan’.”​—1 Tim 1:11; Ps. 16:11.

7, 8. Uw rogon ni ngad folwokgad rok Jehovah u nap’an ni ke yib e magawon ngodad?

⁷ Dabiyog ni ngad taarebnaged rogodad ngak Jehovah u nap’an ni ngad pithiged e magawon. Machane, rayog ni ngad folwokgad rok Jehovah u nap’an nra yib e gafgow ngodad. Rayog ni nge kireban’dad u nap’an ni ke buch ban’en, machane ba t’uf ni ngad thilyeged e lem rodad. Bochan ni kan sunmiydad ni bay rarogon Got rodad, rayog ni ngad lemgad fa ngad gonopiyed rogon ngad pithiged e magawon rodad.

⁸ Reb e n’en nib ga’ fan nra ayuwegdad ko magawon ko yafas rodad e ngad nanged ni bay boch ni dabiyog ni ngad pithiged. Ma faanra ngad lemnaged e pi magawon nem nib pag rogon ma ra gelnag e kankanan’ rodad ma dabkud pirieged e felfelan’ ko bin riyul’ e liyor ni gad ma tay. Tomuren ni kan rin’ boch ban’en ni ngan pithiged fare magawon, rib fel’ ni ngad fal’eged i yaliy boch ban’en nib fel’ ni rayog ni ngad rin’ed. Pi thin ko Bible ni gad ra guy e be tamilangnag u murung’agen e re n’ey.

Ba Ga’ Fan ni Nge Tamilangan’uy

9. Uw rogon ni ke dag Hannah ni ke tamilangan’?

⁹ A mu lemnag e n’en ni rin’ Hannah, ni ir e yib e mang chitiningin Samuel ni profet. Ke kireban’ ya ke lemnag ni dabiyog ni nge diyennag e bitir. Ma u ni moningnag ni bochan e dabiyog ni nge diyen. Boor yay ni i mulan’ ma i yor ma daki abich. (1 Sam. 1:2-7) Bay bayay ni yan Hannah nga tempel, me meybil ngak Got “nri be yor nib gel.” (1 Sam. 1:10) Tomuren ni ke yog Hannah gubin ban’en ni be lemnag ngak Jehovah, ma aram me non Eli ngak ni gaar: “Mman u fithik’ e gapas, mi Got, ni Got rok piyu Israel e nge pi’ ngom e tin ni ga be wenignag ngak.” (1 Sam. 1:17) Ma ireray e ngiyal’ ni ke nang Hannah ni ba mich u wan’ ni ke rin’ e tin ni rayog rok. Ke pag fan e magawon rok ngak Jehovah, ma ke dag ni ke tamilangan’. Me gaar ngak Eli, ‘Kammagar, me yan. Ma aram me abich ni ke chuw e kireban’ rok.’​—1 Sam. 1:18.

10. Uw rogon ni ke tamilangan’ Paul u nap’an ni de yog ni nge pithig e magawon rok?

¹⁰ Ki dag apostal Paul ni ke tamilangan’ u nap’an ni ke yib e magawon ngak. Ke magafan’ ko magawon ni ke yib ngak. Me yog ni bod ba ‘liliy nib gel e amith riy.’ (2 Kor. 12:7) Ke rin’ Paul e tin rayog rok ni nge chuweg e gafgow ni ke yib ngak, ya ke meybil ngak Jehovah. Uw urngin yay ni yog Paul ngak Jehovah ni nge chuweg e re magawon rok ney? Dalip yay! Tomuren e yay ni dalip, me yog Got ngak Paul ni fare ‘liliy nib gel e amith riy’ e dabi chuw. Ke nang Paul ni dabi fal’eg Got e maang’ang ni nge chuweg e m’ar rok ma aram ma ki ulul ko pigpig ngak Jehovah.​—Mu beeg 2 Korinth 12:8-10.

11. Uw rogon nra ayuwegdad e meybil ko magawon rodad?

¹¹ Pi n’ey e gathi be yip’ fan ni ngad talgad ko meybil ngak Jehovah ni bochan e magawon rodad. (Ps. 86:7) Be gaar e Thin rok Got: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed.” Uw rogon nra fulweg Got taban e meybil? Ki gaar e Bible: “Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Fil. 4:6, 7) Sana dabi chuweg Jehovah e magawon rodad, machane rayog ni nge fulweg taban e meybil rodad ni aram e nge tamilangnag lanin’dad. Tomuren ni kad yibilayed e magawon rodad, ma rayog ni ngad nanged ni de fel’ ni ngad lemnaged e magawon rodad nge pag rogon.

Ga Ra Felfelan’ ni Faanra Mu Rin’ e Tin nib M’agan’ Got Ngay

12. Mang fan ni rayog ni ngam gafgow ni faanra mulan’um nib n’uw nap’an?

¹² Be gaar e Proverbs 24:10, BT: “Faanra ga ba meewar u nap’an ni aw e gafgow nib tomgin, ma rriyul’ ni ga ba meewar.” Ki gaar reb e thin ko proverb: “Ma nap’an nra kireban’rad, me gafgow yaarad.” (Prov. 15:13) Boch e Kristiano e kar wargad ma kar talgad i fil e Bible rorad ma dakur lemnaged e Thin rok Got. Ma meybil rorad e de yib u gum’ircha’rad, ma dab kur liyorgad u taabang ko girdi’ rok Got. Ere, faanra um par ni ba kireban’um ma ga ra gafgownagem.​—Prov. 18:1, 14.

13. Mang boch ban’en ni rayog ni nge ayuwegdad nge chuweg e magafan’ rodad me felfelan’nagdad?

¹³ Faanra ba fel’ rogon ni gad be lem ma ra ayuwegdad ni ngad tayan’dad ko boch ban’en ni ra yibnag e felfelan’ ngodad. I gaar David: “Got rog, ri gub adag ni nggu rin’ e tin nib m’agan’um ngay.” (Ps. 40:8) Nap’an nra yib e magawon ngodad, dabda talgad ko pipgig ngak Got. Reb e kanawo’ nra chuweg e kireban’ rodad e ngad rin’ed boch ban’en nra k’aring e felfelan’ ngodad. Ma yog Jehovah ngodad ni gad ra felfelan’ ni faan gad ra beeg e Thin rok ni gubin ngiyal’ ma da nanged fan. (Ps. 1:1, 2; Jas. 1:25) “Pi thin nib manigil” ni gad ma fil u Bible nge nap’an e pi muulung e rayog ni nge pi’ e athamgil ngodad me felfelan’nagdad.​—Prov. 12:25; 16:24.

14. Mang e ke micheg Jehovah ni gad be felfelan’ ngay e chiney?

¹⁴ Ma pi’ Got boor e kanawo’ ni rayog ni ngad felfelan’gad riy. Bin ba ga’ e kanawo’ ni rayog ni ngad felfelan’gad e ke micheg Got nra chuwegdad ko gafgow. (Ps. 13:5) Gad manang ni yugu aram rogon ni boor e magawon ni be buch ngodad e chiney, ra flaabnag Got e piin ni yad be fol rok ko tomur. (Mu beeg e Eklesiastes 8:12.) Ke mich u wan’ Habakkuk e thin rok Got ere ke yog ni gaar: “Mus nra yan i par ndariy wom’engin e gek’iy ni fig, ma dariy wom’engin e grapes; mus ni faanra de k’uf e gek’iy ni olive, ma de k’uf e grain; mus nra yim’ urngin e saf me par tafen e garbaw ndakuriy e garbaw riy; ma ku ra gu par nri gub felfelan’ ni bochan e Somol ni Got e ir e be ayuwegneg.”​—Hab. 3:17, 18.

‘Nge Felan’ e Girdi’ ni Got Rorad e Jehovah’

15, 16. Mog boch e tow’ath rok Got nrayog ni ngad felfelan’gad ngay u nap’an ni gad be sonnag e tin ni ka bay nga m’on.

¹⁵ Ere nap’an ni gad be sonnag e tin nib fel’ ni bay nga m’on rodad, gad be felfelan’ ko tin nib m’agan’ Got ngay ni aram e tin nib fel’ ni ke pi’ ngodad. Be gaar e Bible: “Ere kug nang ni n’en ni nge rin’ be’ e nge par nib felan’ me tiyan’ ko tin ni be rin’ u nap’an e ngiyal’ ni be par nib fos ko biney e tamilang. Gadad gubin ndabi siy ni ngad abichgad ma gadad garbod nge felan’dad ko tin ni kad maruweliyed; ya pi n’ey ni gubin e tow’ath rok Got ngodad.” (Ekl. 3:12, 13) Be’ ni be “tiyan’ ko tin ni be rin’” e nge rin’ e ngongol nib fel’ ni fan ngak boch e girdi’. Ke yog Jesus nib ga’ e felfelan’ ko pi’ ban’en ko bin ni be’ e nge pi’ ban’en ngom. Ra ngad golgad ko piin mabgol rodad, bitir rodad, gallabthir rodad, nge girdi’ rodad ma ra yib e felfelan’ ngodad. (Prov. 3:27) Ra ngad munguygad, ma gad gol, ma gad n’ag fan e kireb ni ke rin’ e pi walagdad ma aram e rayog ni ngad felfelan’gad ma be felfelan’nag Jehovah. (Gal. 6:10; Kol. 3:12-14; 1 Pet. 4:8, 9) Ma ngad paged fadad ni ngad mu’naged fare machib ma aram e ra yib angin ngodad.

¹⁶ Fapi thin ni bay ko Eklesiastes e ma weliy e felfelan’ ni yima tay ko abich nge garbod. Yugu aram rogon ni yu ngiyal’ e ma yib e skeng ngodad rayog ni ngad felfelan’gad ko tow’ath ni ma pi’ Jehovah. Rayog ni ngad felfelan’gad nga yaan e yal’ ni ke gonowrug nge yaan e yungi binaw nib fel’ yaan nge pi fak e gamanman nib fel’ yaan nge ku boch ban’en u roy u fayleng nib fel’ yaan ni dariy puluwon. Nap’an ni gad ra lemnag e pi n’ey ma aram ra ga’ e t’ufeg rodad ngak Jehovah ya ir e ke pi’ gubin e pi n’ey nib fel’.

17. Mang e ra chuwegdad ko gafgow, ma mang e be pi’ e athamgil nga lanin’dad e chiney?

¹⁷ Bin th’abi ga’ fan e aram e t’ufeg rodad ngak Got, ma ngad folgad ko motochiyel rok, ma nge michan’dad ko fare biyul ni aram e maligach nra chuwegdad ko gubin mit e gafgow nge denen ma aram me pi’ e felfelan’ ngodad ni manemus. (1 John 5:3) Ba fel’ lanin’dad e chiney ya kad nanged ni manang Jehovah gubin ban’en ni be gafgownagdad. Ke gaar David: “Ri bay gu uf mug felfelan’ ni bochan e t’ufeg rom ni dabi mus. Ga be guy e gafgow rog; ga manang e oloboch rog.” (Ps. 31:7) Faanra ud pared ni bay e t’ufeg rok Jehovah rodad ma rayog ni nge chuwegdad ko gafgow.​—Ps. 34:19.

18. Mang fan ni thingari felfelan’ e girdi’ rok Got?

¹⁸ Nap’an ni gad be sonnag ni nge riyul’ e tin ni ke micheg, ere ngad folwokgad rok Jehovah ni ir fare Got nib felfelan’. Ngad paged e lem nib kireb nra talegdad ko pigpig ngak Got. Nap’an nra sum e magawon, ngad paged e thin rok Got ni kad filed ni nge pow’iydad. Ra ayuwegdad Jehovah ni ngad yal’uweged lanin’dad ma gad rin’ boch ban’en nra warnag e gafgow ni be yib ngodad. Ngad felfelan’gad ko pi n’en nib fel’ ni ma yib rok Got ni fan ko yafas nge michan’ rodad. Faan gad ra par nib chugur ngak, ma rayog ni ngad felfelan’gad ni bochan e ma ‘felfelan’ e girdi’ ni Got rorad e Jehovah!’​—Ps. 144:15.

Mang e Kam Fil?

• Uw rogon ni rayog ni ngad folwokgad rok Jehovah u nap’an e gafgow?

• Uw rogon ni tamilangan’ e ra ayuwegdad ko gafgow?

• U nap’an ni ke kireban’dad, uw rogon ni gad ra felfelan’ ni gad be rin’ e tin nib m’agan’ Got ngay?

[Pictures on page 18]

Ma kireban’ Jehovah ko pi n’en nib kireb ni ma buch

[Credit Line]

© G.M.B. Akash/​Panos Pictures

[Pictures on page 20]

Ke pi’ Jehovah boch ban’en ngodad nra ayuwegdad ni ngad pared ni gad ba felfelan’