“Dabi N’ag Jehovah E Girdi’ Rok”

“En nib mat’aw e boor e gafgow ni ma yib ngak, machane i Jehovah e ma chuweg u fithik’ ni gubin.”​—PSALM 34:19, New World Translation.

1, 2. (a) Uw rogon ni be taw’athnag Jehovah e girdi’ rok ko ngiyal’ ney? (b) Mang boch e magawon ni ma yib ko pi Kristiano, ma mang boch e deer ni sum?

KE LEBUG e thin ko Bible, ya piin ni ma liyor ku Jehovah e yad be par u lan e paradis nib spiritual. (2 Korinth 12:1-4) Pi Mich Rok Jehovah e aram ba ulung i girdi’ nu gubin e nam ma bay e t’ufeg u fithik’rad ma ba taareb lanin’rad. (John 13:35) Kan tamilangnag e thin riyul’ ko Bible ngorad. (Isaiah 54:13) Ri yad ma pining e magar ku Jehovah ya ke taw’athnagrad mi yad par u lan e tento rok nib spiritual!​—Psalm 15:1.

² Urngin e girdi’ u lan e ulung rok Jehovah e yad be par nib fel’ rogon ko tirok Got ban’en, machane be m’ug riy ni boch i yad e be par nib gapas lanin’rad mab mocha’ ma yugu boch e yugu be yib e magawon ngorad. Boor e Kristiano e be pat ko magawon nib n’uw n’umngin nap’an ma be m’ug riy ndabra chuwgad riy. Ma dabi siy ni ra mulan’uy. (Proverbs 13:12) Ran pat ko magawon ma aram e mich riy ni de felan’ Got ku be’ fa? Ma ayuweg Jehovah boch e Kristiano nib elmirin ma be n’ag yugu boch fa?

3. (a) Ke n’igin Jehovah e pi magawon ni nge yib ko girdi’ rok fa? (b) Mang fan ni mus ko piin nib yul’yul’ ku Jehovah e ma yib e gafgow ngorad?

³ Be pi’ e Bible e fulweg ni gaar: “Ma faanra yib e mit nem e sikeng ngak be’ nrayog ni nge waliy faanem nge denen, ma thingari dabi gaar u laniyan’: ‘Re n’ey ni be n’en ni nge waliyeg nggu denen e yib rok Got.’ Ya dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’.” (James 1:13) Jehovah e ir e Ta Matanag nge Ta Ayuw ko girdi’ rok. (Psalm 91:2-6) “Dabi n’ag Jehovah e girdi’ rok.” (Psalm 94:14) Gathi fan e re n’ey ni dabi mit e piin nib yul’yul’ ko gafgow. Piin ndar flontgad e yad be gagiyegnag e re fayleng ney. Ma boor iyad e yad ba sasalap, ma boch e rib kireb e rorad. Ma dariy bagayad ni be sap ku Jehovah ni nge pi’ e gonop ngorad. Ma wenegan riy e boor e gafgow ni ma yib ko girdi’. Be tamilangnag e Bible ni dabiyog ko girdi’ rok Jehovah ni ngar siyeged wenegan nib kireb ni bochan thibngin e girdi’ nde flont nge ngongol nib kireb.​—Acts 14:22.

Pi Kristiano nib Yul’yul’ e Goo Yad Manang ni Bay Yib e Gafgow Ngorad

4. Mang e dabiyog ni nge siyeg urngin e Kristiano n’umngin nap’an ni be par e re m’ag nib kireb ney ma mang fan?

⁴ Yugu aram rogon ni gathi yad bang ko fayleng, machane pi gachalpen Jesus e ma par u fithik’ e re m’ag ney. (John 17:15, 16) Ma be tamilangnag e Bible ni Satan e be gagiyegnag e re fayleng ney. (1 John 5:19) Ere rayog ni nge lemnag urngin e Kristiano ni bay yib e magawon ngorad. Aram e n’en ni lemnag apostal Peter faani gaar: “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy. Ere um pired nib mudugil e michan’ romed ngak Kristus mi gimed togopuluw ngak fare moonyan’, ya gimed manang ni piin ni yad be par u roy u fayleng ni polo’ ni Kristus e ke michan’rad ngak e gafgow ni be yib ngomed e ku ir e be yib ngorad.” (1 Peter 5:8, 9) Arrogon urngin e pi Kristiano e ra yib e gafgow ngorad.

5. Uw rogon ni i tamilangnag Jesus ni pi Kristiano nib yul’yul’ e ra i kirebanrad?

⁵ Mus ni faanra ri ba t’uf Jehovah rodad ma gad ba yul’yul’ ngak, machane yu ngiyal’ ma ra yib e kireban’ ngodad. I tamilangnag Jesus e re n’ey ko reb e fanathin ni ke weliy ni bay ko Matthew 7:24-27, ni ke taarebnag e piin ni ma fol rok nib math keru’ ko piin dar fol. Kan puluwnag pi gachalpen ni ma fol ku be’ nib gonop ni ke toy e naun rok nga daken e war. Ma piin ni dar folgad ko thin rok e bod be’ nib balyang ni toy e naun rok nga daken e yan’. Ma tomren ni ke aw e n’uw me yib e nifeng nib gel ma kari mus fare naun ni kan toy nga daken e war e de puth. Mu lemnag ni be yog u morngaagen fare naun ko facha’ nib gonop ni “ke aw e n’uw nge sugubur e lul’ nge yib nga daken e binaw, me yib e nifeng nib gel i aw ko fare naun. Ma de puth, ya kan toy nga daken e war.” De micheg Jesus ni ra par fare moon nib gonop u fithik’ e gapas nge mocha’ u gubin ngiyal’. Danga’ ya gonop rok e re moon nem e ra ayuweg ni nge par nib mudugil u nap’an fare nifeng nib gel. Aram rogon ni be tamilangnag fare fanathin u morngaagen fa en ni ke yung e awoch. I tamilangnag Jesus ni mus ko piin nib yul’yul’ nib “fel’ gumercha’rad” e ra “yib womengirad u fithik’ e k’adan’.”​—Luke 8:4-15.

6. U lan fare fanathin rok Paul u mornaagen e pi n’en ndabi kireb ko nifiy, ma mini’ e ra un ko skeng ko nifiy?

⁶ Nap’an ni ke yoloy apostal Paul e babyor ngak piyu Korinth me weliy ko fanathin e pi felngin nib t’uf rodad ni ngad gelgad ko magawon. Pi n’en ni dabi kireb ko nifiy ni gol, nge silber, nge pi malang nib tolang puluwon e ba puluw ko felngin Got. (Mu taarebnag ko Proverbs 3:13-15; 1 Peter 1:6, 7.) Ma tirok e fayleng ban’en e bod e pi n’en ni ma yik’. Ma aram me gaar Paul: “Ma ra be’ ma bay ni guy felngin e maruwel rok ko chirofen ni bay fin nchuweg e upong u daken, ni aram e Chirofen ni bay sul Kristus riy. Ya nifiy ko re Rran nem e bayi dag rogon e maruwel rok urngin e girdi’ ni baaray rogon: nifiy e bayi sikengnag e maruwel rorad nge be’ me m’ug e bin riyul’ i felngin e maruwel rok. Faanra dabi yik’ e n’en ni ke toy be’ nga daken e re def nem, ma ba’ puluwon ni rayog ngak.” (1 Korinth 3:10-14) Ere be tamilangnag e Bible ni ra yib mit e skeng ngodad ni gad gubin.

7. Rogon ni yog u Roma 15:4, ma uw rogon nrayog ni nge ayuwegdad e thin ko Bible ni ngad k’adedan’dad u fithik’ e gafgow?

⁷ Bay boch e thin ko Bible u morngaagen e pi tapigpig rok Got ni ur pared nib yul’yul’ u fithik’ e gafgow, ni boch e rib n’uw nap’an. Machane de n’agrad Jehovah. Ereram e n’en ni be lemnag Paul morngaagen faani gaar: “Ya urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” (Roma 15:4) Mu lemnag dalip e pumoon ni ke fel’ thilrad Got machane boor e gafgow ni yib ngorad.

N’en ni Gad Ma Fil ko Thin ko Bible

8. Mang e ke pag Jehovah ni nge buch ku Josef, ma uw n’umngin nap’an?

⁸ I felan’ Jehovah ku Josef ni fak Jakob u nap’an ni kab fel’ yangaren. Machane yugu aram rogon ni de kireb e rok, ma ke yib boch e gafgow ngak. Ya pi walagen e kar koled mab kireb e ngongol rorad ngak. Kan pi’ nchuw’ay nga reb e binaw nu bang me mang sib ku be’ ma kan nog ni ke rin’ ban’en nib kireb min nin’ nga “low ko kalbus.” (Genesis 40:15) Ma “chen nni m’ag nga ay ni yugub mache’che’ e i amithnag, ma kan they’ ba wasey nga belel’ugun.” (Psalm 105:17, 18) Nap’an ni immoy nib sib ma bay u kalbus, ma dabi siy ni boor yay ni ke wenig Josef ku Jehovah ni nge ayuweg nge chuw riy. Ma yugu aram rogon ni ke gelnag Jehovah u boch e kanawo’ machane u lan 13 e duw ma ke par ni ra od gubin e rran ni kadabul ma kab sib ara ka bay u kalbus.​—Genesis 37:2; 41:46.

9. Mang e ke athamgil David riy u lan in e duw?

⁹ Ku aram rogon ni buch ngak David. Nap’an ni be mel’eg Jehovah be’ ni nge gagiyegnag yu Israel me gaar: “Kug pirieg ni David, ni fak Jesse e ir e cha’ ni gub adag, ya ir be’ nra rin’ urngin e tin ni gub adag ni nge rin’.” (Acts 13:22) Yugu aram rogon ni ke felan’ Jehovah ku David machane boor e gafgow ni yib ngak. Ni nge ayuweg e pogofan rok me par nib mith u daken e ted, ngu lan e yiy, ngu yu gin u thilin e war, ngu lan e pi binaw nu bang. Kan lek ni bod e gamanman me ere ke par ni ke mulan’ me rus. Machane ke k’adan’ u daken gelngin Jehovah. Ere bay mat’awun David ni nge gaar: “En nib mat’aw e boor e gafgow ni ma yib ngak, machane i Jehovah e ma chuweg u fithik’ ni gubin.”​—Psalm 34:19.

10. Mang gafgow ni baga’ ni yib ngak Naboth nge tabinaw rok?

¹⁰ Nap’an Elijah ni profet ma ke mus ni 7,000 e girdi’ e immoy u Israel ni dar siro’gad ngak Baal ni got ni googsur. (1 Kings 19:18; Roma 11:4) Dabi siy ni Naboth, e bagayad e pi cha’ nem ma kan rin’ ban’en nde mat’aw ngak. Ya kan nog ni ke yog e thin nib kireb ngak Got. Min nog nib kireb e rok, me yog e pilung ni ngan malangnag ngem’, me yib e pilis i lil’ u but’. Mus ngak pi fak ni kan li’rad kar m’ad! Machane de rin’ e n’en ni kan nog ni ke rin’. Fagali mich nib togopuluw ngak e ur lifithew l’iginrow. Ya Jezebel ni pilung ni ppin e ke makathnag ni nge yog ni nge tafnaynag fare pilung e binaw rok Naboth ni bay e woldug ni grapes riy.​—1 Kings 21:1-19; 2 Kings 9:26.

11. Mang e yog apostal Paul ngodad u morngaagen e pi pumoon nge ppin nib yul’yul’ u lan e Bible?

¹¹ Josef, David, nge Naboth e yad dalip ko boor e piin pumoon nge ppin nib yul’yul’ ni be weliy e Bible morngaagen ni ke yib e gafgow ngorad. I yoloy apostal Paul morngaagen e pi tapigpig rok Jehovah u lan in e chibog. Ke weliy u morngaagen boch i yad ni “un moningng ma yibe toy, ma boch i yad e ni m’ag nga nin’ nga kalbus. Ma un malangnagrad ngar m’ad, ma un goloyochiy boch i yad nge ruw ley, ma boch i yad e un li’ ko sayden. Ma uranod i yan ni keru’ e saf nge kaming e ka ron’ed ni mad, ni kar gafgowgad, ma yibe gafgownagrad, ma ba tagan e ngongol ni yibe rin’ ngorad. Ya dab ra m’aggad e girdi’ nu roy u fayleng. Ma uranod u daken e ted i yan nge yungi n’en ndabi tugul ban’en riy, ma yad be par u lan e yiy nge low u tan e but’.” (Hebrews 11:36-38) Ma de n’agrad Jehovah.

Ma Ayuweg Jehovah e Piin nib Gafgow

12. Mang boch e gafgow ni ma yib ko Pi Mich Rok Jehovah ko ngiyal’ ney?

¹² Ma uw rogon e girdi’ rok Jehovah ko ngiyal’ ney? Girdien e ulung rok e rayog ni nge michan’rad ni yira ayuwegrad u fithik’ e tin tomren e rran ngu fithik’ fare gafgow ni baga’. (Isaiah 54:17; Revelation 7:9-17) Machane, ra bagadad ma goo gad manang ni “ngiyal’ nge pi n’en ni be buch ni dawor ni guy e be m’ug” ngak urngin e girdi’. (Eklesiastes 9:11) Ngiyal’ ney ma bay boor e Kristiano nib yul’yul’ nib gafgow. Boch i yad e ri yad ba gafgow ko chugum. Be weliy e Bible u morngaagen e pi Kristiano ni “piin bitir ndariy e gallabthir rorad nge piin ppin ni ke yim’ e pumoon rorad” ni yad ba gafgow. (James 1:27) Yugu boch e ba gafgow ko yafang nib kireb, ara mahl, ara bugel, ara gagiyeg ni ma tay e pi tayugang u fithik’ e yargel, ara m’ar, ara yam’.

13. Mang boch e magawon ni buch ko boch e girdi’ ni kan reportnag?

¹³ Susun, nap’an e duw ni 1996 ma ke reportnag e pi branch ofis ko Watch Tower ngak fare Governing Body ko Pi Mich Rok Jehovah ni boch e pi walagdad ni pumoon nge ppin e be gafgow u kalbus ni bochan ni yad be fol ko Bible. Ma dalip e ulung u reb e binaw u South America e kan taleg ya pi ulung ko guerrilla e ur tulufed bokum miriay e Pi Mich ngar chuwgad ko gin n’em. U reb e binaw u West Africa ma kan li’ boch e Pi Mich kar m’ad ya ur moyed ko gin ni yibe cham riy. Mu reb e binaw u Central America ma ba gafgow e pi walag ko salpiy me gel e gafgow rorad ni bochan ni aw e yoko’. Mu yugu boch e binaw ma dariy e magawon ko salpiy nge ggan, machane yugu boch ban’en e ma k’aring e kireban’ ko girdi’. Ma yugu boch e girdi’ e ke tomal lanin’rad ya rogon e par u gubin e rran e ke diliiy lanin’rad. Ma bochan ni dariy fan e machib u wan’ boor e girdi’ ma boch e girdi’ e ke mulan’rad u nap’an ni yad ma machibnag fare thin nib fel’ ko Gil’ilungun Got.

14. (a) Mang e gad be fil ko n’en ni buch ku Job? (b) Ni nge dabi mulan’dad u nap’an ni ke yib e magawon ngodad ma mang e susun ni ngad rin’ed?

¹⁴ Pi n’en ney e gathi be dag ni de felan’ Got ko pi girdi’ ney. Ya mu lemnag Job nge urngin e gafgow ni yib ngak. Ma ir be’ nib “mat’aw mab fel’.” (Job 1:8) Ere dabi siy ni ke mulan’ Job u nap’an ni yog Elifaz nib kireb e rok! (Job, guruy ni 4, 5, 22) Dabda lemnaged ni ke yib e gafgow ngodad ni bochan ni de felan’ Jehovah ngodad ara daki flaabnagdad Jehovah. Ya ran lemnag ni aram rogon ma ra war e michan’ rodad. (1 Thessalonika 3:1-3, 5) Nap’an ni yib e gafgow ngodad mab fel’ ni ngad fl’eged i lemnag ni Jehovah nge Jesus e ba chuchugur ngodad ndemtrug ko mang e ra buch.

15. Uw rogon ni gad manang ni ma lemnag Jehovah e pi gafgow ni be tay e girdi’ rok?

¹⁵ N’en ni yog apostal Paul e be pi’ e athamgil nga lanin’dad ye gaar: “Rogon ni gadad ba t’uf rok Kristus e mini’ e rayog rok ni nge daregdad riy. Gur rayog rok e magafan’, ara n’en ni ma yib ngodad nib mo’maw, ara gafgow ni yima tay ngodad, ara uyungol, ara gafgow ni yima tay, ara ban’en ni yira riya’ riy, ara yam’? . . . Ya rogon ni gadad ba t’uf rok e mmudugil u wun’ug ndariy ban’en nrayog ni nge daregdad riy, ndemtrug ko yam’ ara yafos; ara pi engel ara yugu boch e kan ni be gagiyeg u tharmiy ara gelngin e kan; ara tin ni bay e chiney ara tin ni bay yib; ara bin nu lang e tamilang ara bin nu ar e tamilang​—dariy ban’en u fithik’ urngin e tin ni ke sunumiy Got nrayog rok ni nge daregdad u rogon ni gadad ba t’uf rok Got ni ke yog ngodad u daken Kristus Jesus ni ir e Somol rodad.” (Roma 8:35, 38, 39) Ri ma lemnagdad Jehovah ma manang rogon ni gad be gafgow. Nap’an ni be par David ni be mil me yoloy ni gaar: “I Jehovah e ma matanagiy e piin ni yad mmat’aw, ma ma motoyil ngorad ko tin ni yad ma wenignag ngak. I Jehovah e ba chugur ngak e piin ni ke mulan’rad.” (Psalm 34:15, 18, NW; Matthew 18:6, 14) Chitamangidad nu tharmiy e ma t’ufegdad ma ma runguy e piin nib gafgow. (1 Peter 5:6, 7) Ma pi’ e tin nib t’uf rodad ni ngad k’adedan’dad, ndemtrug ko miti mang gafgow ni ke yib ngodad.

Pi Taw’ath rok Jehovah e ma Pi’ Langgidad

16. Mang e ke pi’ Jehovah ni ra ayuwegdad ni ngad k’adedan’dad ma uw rogon?

¹⁶ Yugu aram rogon ni dabada lemnaged ni dabi yib e magawon ngodad u lan e re m’ag ney machane “dariy ba ngiyal’ ndariy taabe’ ni fager rodad.” (2 Korinth 4:8, 9) I micheg Jesus ni ra pi’ e Ta ayuw ngak pi gachalpen. I gaar: “Bay gu wenig ngak e en ni Chitamangiy, nge pi’ reb e Taayuw ngomed, ni aram fare kan ni thothup ni ma dag e tin riyul’, me par romed ndariy n’umngin nap’an.” (John 14:16, 17) U nap’an e Pentekost ko 33 C.E., me yog apostal Peter ngak e girdi’ ni “ra yog e tow’ath rok Got ngorad ni aram fare kan ni thothup.” (Acts 2:38) Be ayuwegdad fare kan ni thothup ko ngiyal’ ney fa? Arrogon! Gelngin e kan ni thothup rok Jehovah e be pi’ waamngin ngodad nib fel’: “T’ufeg, falfalan’, gapas laniyan’, gum’an’, gol, felngin nib fel’, michan’, sumunguy, t’ar laniyan’.” (Galatia 5:22, 23, NW) Pi n’ey ni gubin e aram pi felngin ni ra ayuwegdad ngad k’adedan’dad u fithik’ e gafgow.

17. Mang boch e thin riyul’ ko Bible ni ma gelnag e michan’ rodad ma ma k’aring nge mudugilan’dad ni nge l’agan’dad ku Jehovah?

¹⁷ Ku ma ayuwegdad fare kan ni thothup ni ngad nanged u wan’dad ni pi gafgow ko ngiyal’ ney e “ba achig ma dabi n’uw nap’an me m’ay” nfaanra ran lemnag puluwon ni fare taw’ath ni yafas ni manemus. (2 Korinth 4:16-18) Ke mich u wan’dad ni dabi pag Got talin e maruwel ni kad ted ni fan ngak nge rogon ni gad ma t’ufeg. (Hebrews 6:9-12) Gad ma poy e thin ni kan thagthagnag nga lan e Bible ma be fl’eg lanin’dad e pi thin u morngaagen e piin nib yul’yul’ nkakrom ni kar athamgilgad u fithik’ boor e gafgow machane kan nog ni ke felan’rad. Yoloy James ni gaar: “Pi walageg ni girdien Kristus, mu tafinaynaged fapi profet ni yad owchen Jehovah ni ur weliyed e thin rok. Gadad be yog ni kar felan’gad ni bochan e ra k’adedan’rad.” (James 5:10, 11) Be micheg e Bible ni yira pi’ “gelngin ni ir e ba th’abi gel” ngodad nge yog ni ngad k’adedan’dad u fithik’ e gafgow. Ku ma taw’athnagdad Jehovah ko fare athap ko fas ko yam’ nga m’on. (2 Korinth 1:8-10; 4:7) Ran poy e Bible u gubin e rran min fl’eg i lemnag e pi n’en ni kan micheg, ma ra gelnag e michan’ rodad ma ra mudugil lanin’dad ni nge l’agan’dad ku Got.​—Psalm 42:5.

18. (a) U 2 Korinth 1:3, 4, ma mang e yibe piningdad ni ngad rin’ed? (b) Uw rogon nrayog ko pi piilal ni Kristiano ni ngar fl’eged laniyan’ e girdi’ mar pied e toffan ngorad?

¹⁸ Miki pi’ Jehovah ngodad fare paradis nib spiritual ni aram e rayog ni ngad pared nib falfalan’ u fithik’ e t’ufeg ko pi walagdad ni Kristiano ni pumoon nge ppin. Gad gubin e mmil fan ngodad ni ra bagadad e nge fl’eg laniyan’ bagadad. (2 Korinth 1:3, 4) Pi piilal ni Kristiano e rayog ni ngar fl’eged laniyan’ e girdi’ mar pied e toffan ngorad. (Isaiah 32:2) Yad e “taw’ath ko girdi’,” ma kan tay chilen ngorad ni ngar ubinged e piin nib gafgow mar “pied e athamgil nga laniyan’ e piin ni ke mulan’rad,” mara “ayuweged e piin ni yad meewar.” (Efesus 4:8, 11, 12; 1 Thessalonika 5:14, NW.) Yibe yog ko piin piilal ni ngar fanayed e pi babyor ni Watchtower nge Awake! nge yugu boch e babyor ni fl’eg “fare tapigpig nib yul’yul’ mab gonop.” (Matthew 24:45-47) Ya pi babyor ney e bay e fonow ko Bible riy ni ra ayuwegdad ngad pithiged ma ngad siyeged boch e magawon ni ma wageynag lanin’dad. Ngad folwokgad rok Jehovah ma nge bagadad ma nge fl’eg laniyan’ bagadad ma nge bagadad ma nge pi’ e athamgil nga laniyan’ bagadad u nap’an e ngiyal’ ni ke yib e magawon ngak bagadad!

19. (a) Mang e ma ayuwegdad ni ngad siyeged e gafgow? (b) Mini’ e thingarda pagedan’dad ngak, ma mang e ra ayuwegdad ngad gelgad ko gafgow?

¹⁹ Gad be chugur iyan nga tungun e tin tomren e rran ko re m’ag ney ma be kireb iyan rarogon e fayleng, ma pi Kristiano e yad ma rin’ e n’en nrayog rorad ni ngar siyeged e magawon. (Proverbs 22:3) Ngongol nib gonop mab llowan’ nge tamilangan’ nu Bible e ra ayuwegdad ngad turguyed boch ban’en u fithik’ e gonop. (Proverbs 3:21, 22) Gad ma motoyil ko Thin rok Jehovah ma gad ma fol riy ya nge siy da olobochgad. (Psalm 38:4) Machane gad manang ni demtrug uw fene gel e athamgil ni gad ra tay ma dabiyog ni ngad chuweged e gafgow ko yafas rodad. U lan e re m’ag ney ma boor e piin mat’aw e be mit ko gafgow nib ubchiya. Ma rayog ni ngad k’adedan’dad u fithik’ e gafgow rodad ma nge mich u wan’dad ni “dabi n’ag Jehovah e girdi’ rok.” (Psalm 94:14) Ma gad manang ni dabki n’uw nap’an ma ra thumur e re m’ag ney nge pi magawon riy. Ere nge mudugilan’dad ni “dabi chalbadad i ngongliy e ngongol nib fel’; ya faanra dabda paged gadad, ma ba’ nap’an ni bayi taw ngay ma gadad t’ar wom’engin.”​—Galatia 6:9.

Mang e Kad Filed?

◻ Mang boch e magawon ni ma yib ko urngin e pi Kristiano?

◻ Mang boch e thin ko Bible ni ma ayuwegdad ngad nanged fan ni pi gafgow ni ma yib ngodad e gathi be dag ni de felan’ Jehovah ngodad?

◻ Uw rogon u wan’ Jehovah e pi gafgow ni ma yib ko girdi’ rok?

◻ Mang boch e taw’ath ni ma pi’ Jehovah ni ma ayuwegdad ngad k’adedan’dad u fithik’ e gafgow?

[Sasing ko page 22]

David, Naboth, nge Josef e aram dalip ni’ ni ke yib e gafgow ngorad