N’en ni Gad Ra Fil Rok Jesus

U Rogon ni Nguun Ngongol Ngak e Girdi’

Mang fan ni nguud golgad?

Ga ma gol ni yugu demtrug ko be gol e girdi’ ngom fa? Faanra ngad folwokgad rok Jesus, ma thingarda golgad ni ki mada’ ngak e piin ma fanenikaydad ni ngad golgad ngorad. I gaar Jesus: “Faanra kemus ni girdi’ ni gimed ba t’uf rorad e yad ba t’uf romed, ma mang ni gimed be finey nra fal’eg Got waathmed riy? Yi mus ngak e piin ni yad ba tadenen ma ba t’uf rorad e piin ni yad ba t’uf rorad. . . . Nge t’uf romed e pi toogor romed mi gimed rin’ e tin nib fel’ ngorad . . . , ma gimed pi fak Got ni ir e Th’abi Tolang. Yi Got e ba gol ngak e piin ndarir pininged e magar ngak nge piin nib kireb.”​—Luke 6:32-36; 10:25-37.

Mang fan ni ngaun n’ag fan e kireb?

Nap’an ni gad ra oloboch, ma gad baadag ni nge n’ag Got fan e oloboch rodad. Ke fil Jesus nib puluw ni ngad meybilgad ngak Got ni nge n’ag fan e oloboch rodad. (Matthew 6:12) Maku, i yog Jesus nra n’ag Got fan e oloboch rodad nfaan gad ra n’ag fan e oloboch rok boch e girdi’. I gaar: “Faanra mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy nra n’ag fan u wan’ e kireb ni kam rin’ed. Machane faanra dab mu n’iged fan u wun’med e kireb ni ke rin’ boch e girdi’ ngomed, ma ku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.”​—Matthew 6:14, 15.

Uw rogon ni nge felfelan’ e tabinaw?

Yugu aram rogon nde un Jesus ko mabgol, ma boor ban’en nrayog ni ngad filed rok u rogon ni ngad felfelan’niged e tabinaw rodad. U daken e thin rok nge ngongol rok e dag rogon riy ni ngad folwokgad rok. Ngada weliyed dalip ban’en:

1. Figirngiy e thingari t’ufeg leengin ni bod ir. I dag Jesus rogon e ngongol nib fel’ ni fan ko piin figirngiy ni ngar folwokgad riy. I gaar ngak pi gachalpen: “Nggu pi’ reb e motochiyel nib beech ngomed, nge bigimed me t’uf bigimed rok.” Uw rogon? I gaar: “Rogon ni um pired ni gimed ba t’uf rog.” (John 13:34) I yog e Bible e re kenggin e motochiyel ney ni nge fol e piin figirngiy riy ni gaar: “Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad . . . Pumoon e thingari t’uf rorad e piin nleengirad ni bod rogon nib t’uf dowrad rorad. Re moon nib t’uf leengin rok e aram e be t’ufeg ir. Ya dariy be’ ni kaa fanenikay e birok e dowef. Ya ma duruw’iy ma ma ayuweg, ni bod rogon e n’en ni ma rin’ Kristus ngak girdien e galesiya.”​—Efesus 5:25, 28, 29.

2. Piin mabgol e thingar ra yul’yul’gad ngorad. Yira un ngak be’ nga wuru’ e mabgol ma aram e kan denen nib togopluw ngak Got ma ra kirebnag e tabinaw. I gaar Jesus: “Mogned, dawor mbeeged . . . ‘Ereray fan nra digey e pumoon e chitamangin nge chitiningin ngar pirew leengin, mi yow par ni kar taab girdi’gow. Ya aram e gathi ku yow ba ruw ni girdi’, ya kar taab girdi’gow. Ere thingari dabi dareg e girdi’ e gali cha’ ni Got e ke chagiyrow. . . . Nggog ngomed, ni en nra chuweg leengin ni gathi ban’en ni ke par fare pin nge be’ ngki leengiy yugu reb e ppin, e aram e ke th’ab e motochiyel, ya kar pirew yugu reb e ppin ni gathi mabgol rok.”​—Matthew 19:4-9.

3. Piin bitir e thingar ra folgad ko gallabthir rorad. Yugu aram rogon nib flont Jesus ma gallabthir rok e dar flontgow, machane ma fol rorow. I yog e Bible nnap’an ni gaman 12 e duw rok Jesus: “Me un ngorow [gallabthir rok] ngar sulod nga Nazareth, mi i par ni be fol rorow.”​—Luke 2:51; Efesus 6:1-3.

Fan ni ngan fol ko pi kenggin e motochiyel ney?

I weliy Jesus murung’agen e pi n’en ni i fil ngak pi gachalpen ni gaar: “Re bugithin ney nib riyul’ e kam nanged e chiney, faan gimed ra maruwel ngay ma ra um pired ni gimed ba felfelan’!” (John 13:17) Faanra ngad manged e tin riyul’ e Kristiano, ma thingar da folwokgad ko fare fonow ni ke pi’ Jesus u rogon ni ngad ngongolgad ngak e girdi’. I gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”​—John 13:35.

Ra ga baadag ni ngkum nang boch, ma gguy e guruy ni 14 ko fare babyor ni What Does the Bible Really Teach?a (Mang e Ri Be Fil e Bible?)

[Footnote]

[Picture on page 16, 17]

Fare fanathin rok Jesus u murung’agen fare pagel ni digey e chitamangin nge yan nga bang e be fil ngodad feni ga’ fan e gol nge ngan n’ag fan e kireb.​—Luke 15:11-32

[Picture on page 17]

Piin mabgol e thingar ra yul’yul’gad ngorad