Pi Deer Ni Bay E Fulweg Riy U Bible

Got e ir be’ ni uw rogon?

Got e dabiyog ni ngan guy. Ke sunmiy e pi n’en u lan e lang nge fayleng nge urngin ban’en riy nib fos. Dariy be’ ni ke sunmiy Got, ma ir be’ nde sum. (Psalm 90:2) Baadag Got ni ngad gayed ir, ma gad nang e tin riyul’ u murung’agen.​—Mu beeg e Acts 17:24-27.

Got e rayog ni ngad nanged fithingan, ma rayog ni ngad lemnaged pi fel’ngin u daken e pi n’en ni ke sunmiy. (Roma 1:20) Machane, faanra ngad nanged murung’agen Got nib fel’ rogon mab t’uf ni ngad filed e Thin rok u Bible. Gad ra rin’ e re n’ey ma rayog ni ngad nanged rarogon.​—Mu beeg e Psalm 103:7-10.

Uw rogon ni ma lemnag Got e tin nde mat’aw?

En ni Sunmiydad ni aram Jehovah, e ma fanenikay e tin nde mat’aw. Ma ke sunmiy e girdi’ ni bod yaan. (Deuteronomy 25:16) Ireram fan ni boor i gadad e dabun e tin nde mat’aw. Pi kireb ni be buch u toobdad e gathi Got e be k’aring. Ke pi’ Got e puf rogon ko girdi’. Ma rib gel e kireban’ riy, ya yooren e girdi’ e yad ma fanay e re puf rogon nem ko tin nde mat’aw ban’en. Ere, ke “taganan’” Jehovah.​—Mu beeg e Genesis 6:5, 6; Deuteronomy 32:4, 5.

Jehovah e ba t’uf rok e tin nib mat’aw, ma dabi pag e tin nde mat’aw nge par ni dariy n’umngin nap’an. (Psalm 37:28, 29) Ke micheg e Bible ni dabki n’uw nap’an ma ra chuweg Got gubin e kireb.​—Mu beeg e 2 Peter 3:7-9, 13.