Wuin e Ra ‘Yib Gil’ilungun Got Ngodad’?

1, 2. (a) Mang e rayog ni nge magawonnag rogon e sap ni gad ma tay? (b) Mang e kad nanged u murung’agen Gil’ilungun Got?

SANA kam guy ni yooren e girdi’ e ba mom ni ngar paged talin boch ban’en ni kan rin’ u reb e gam’ing. Maku reb e, kub mom ni nge pagtalin be’ e n’en ni ke yog e togta u tomuren ni kan pirieg ni bay ba mit e m’ar rok. Fa reb e ku rayog ni nge mo’maw’ rok be’ ni nge pirieg e kiy ara teligiy rok, ni yugu aram rogon ni bay u charen. Piin ni yad ma gay murung’agen boch ban’en e ka rogned nre n’ey e kub mit e ma’ew, ya damur guy ban’en, ara ga be pagtalin ban’en ni bochan e ga be guy rogon ni ngam rin’ boor ban’en taab yay. Ku yima yog nre n’ey e ku bang u rogon ni ma maruwel e man’ey rodad.

² Boor e girdi’ ni aray rogon e ngiyal’ ney, ya gowa kar “ma’ewgad” ndakurir guyed e n’en ni be buch u fayleng. Yad ma yog nriyul’ ni ke thil rarogon e fayleng ni ka nap’an e duw ni 1914, machane dar nanged ko mang fan. Machane, gadad e piin ni gad ma fil e Bible e kad nanged nnap’an ni Pilung Jesus u tharmiy ko duw ni 1914, ma aram e ngiyal’ ni tabab Gil’ilungun Got ko gagiyeg. Yugu aram rogon, ma gad manang ni ka dawori lebug e thin ko fare meybil ni be gaar, “Nge yib Gil’ilungum ngomad. Min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matt. 6:10, NW) Ere, ba tamilang ni fin ngiyal’ ni yira thang e re m’ag nib kireb ney e aram e ngiyal’ nra lebug e thin ko re meybil ney. Maku aram e ngiyal’ nrayog ni ngan rin’ e tin nib m’agan’ Got ngay u roy u fayleng ni bod rogon ni yibe rin’ u tharmiy.

3. Mang angin ni ke yib ngodad ni bochan e gad ma fil e Thin rok Got?

³ Bochan ni gad ma fil e Thin rok Got ni gubin e rran, ma aram fan nrayog ni ngad guyed ni chiney e be lebug e pi n’en ni kan yiiynag kakrom. Rib thil e re n’ey nga rogon ni be lemnag yooren e girdi’, ya kar mitgad ko pi n’en ni yad ma rin’ u reb e rran ngu reb ma dakurur guyed e mich riy ni ke tabab Kristus ko gagiyeg ni ka nap’an e duw ni 1914, ma dabki n’uw nap’an me thang e re fayleng nib kireb ney. Machane, am lemnag e re deer ni baaray ni be gaar: Faanra ke yoor e duw ni kam pigpig ngak Got, ma kab mich u wan’um ni kari chugur e ngiyal’ ni yira thang e re m’ag ney ma pi n’en ni be buch e be micheg nriyul’ e re n’ey, fa? Mus ni faanra dawori n’uw nap’an ni kam mang reb e Pi Mich Rok Jehovah, ma mang e kam par ni be l’agan’um ngay? Demtrug rogon e fulweg rodad ko gal deer ney, mab fel’ ni ngad weliyed dalip i fan ni kad nanged ndab ki n’uw nap’an min rin’ e tin nib m’agan’ Got ngay u roy u fayleng.

KE TAW FAPI CHA’ NI YAD BE YAN U DAKEN E OS

4, 5. (a) Mang e be rin’ Jesus ni ka nap’an e duw ni 1914? (Mu guy e sasing u tabolngin e re article ney.) (b) Mang e be yip’ fan fa dalip i cha’ ni yad be yan u daken dalip i os, ma uw rogon ni ke lebug e re yiiy ney?

⁴ Nap’an e duw ni 1914, min pi’ ba teeliyaw ngak Jesus Kristus u tharmiy, ni aram e be yip’ fan ni ke mang Pilung u Gil’ilungun Got. Fare yiiy ni bay murung’agen ko Revelation ko guruy ni 6 e be weliy murung’agen Jesus ni be yan u daken ba os nib wechwech. Tomuren ni mang Pilung, ma aram me yan nrogon be’ ni ma gel ko mahl ni ke yan ni nge cham nge gel ko re m’ag rok Satan ney nib kireb. (Mu beeg e Revelation 6:1, 2.) Kan yiiynag nu tomuren nra tabab Gil’ilungun Got ko gagiyeg, ma ra gel e kireb u fayleng i yan. Ra gel e mahl, ma be lich e ggan, ma be yoor e liliy nib machreg ni ma af, nge ku boch ban’en ni ma buch ni ma yim’ e girdi’ riy. Pi gafgow ney e kan tamilangnag ko fare yiiy ni murung’agen fa dalip i cha’ ni yad be yan u daken dalip i os ni yad be lek fiti keru’ Jesus Kristus. ​—Rev. 6:3-8.

⁵ Kan yiiynag nra yib e mahl ‘nga daken e fayleng’ ni nge chuweg e gapas. Ke buch e re n’ey ni yugu aram rogon ni boor e nam ni kar micheged ni yad ra maruwel u taabang ni ngar awnaged e gapas. Fa Bin Som’on e Mahl ko Fayleng e aram e bin som’on u fithik’ e pi mahl ni ke gothey e gapas u fayleng. Yugu aram rogon ni ke mon’og boor ban’en ni be rin’ e pi nam ni nge yag e salpiy riy, maku be ga’ e llowan’ ko girdi’ i yan ni ka nap’an e duw ni 1914, maku der yag ni nge pagan’ e girdi’ ko par u fayleng ni bochan e ggan nder gaman. Maku reb e, gubin e girdi’ nrayog ni nga rogned nriyul’ ni bokum milyon e girdi’ ni be yim’ ni gubin e duw ni bochan e m’ar, nge yoko’ ara durru’, ara ku boch ban’en ni ma yib ni ma gafgow e girdi’ riy. Ke gel e kireb ko pi n’ey, ma yugu be par ni be buch, maku boor e girdi’ ni be yim’ riy. Dariy ba ngiyal’ ni ke buch e pi n’ey ni aray rogon. Ere, kam nang fan ni be buch e pi n’ey, fa?

6. Mini’ e piin ni kar nanged ni ke lebug e pi yiiy nu Bible, ma mang e kar rin’ed u nap’an ni ke lebug?

⁶ Boor e girdi’ ni ke magawon lanin’rad u nap’an ni tabab e Bin Som’on e Mahl ko Fayleng ngu nap’an ni garer fare miti m’ar ni ka nog e Spanish influenza ngay. Yugu aram rogon, ma i par e pi Kristiano ni kan dugliyrad ni yad be son ni nge mus Ngal’an e “piin ni gathi yad piyu Israel” ko duw ni 1914. (Luke 21:24) Dar nanged ko mang e ra buch, kemus ni yad manang ni bay ban’en nib ga’ fan nra buch u Gil’ilungun Got ko duw ni 1914. Ere, nap’an ni yugu ra nanged rogon ni ke lebug e yiiy nu Bible, mi yad tabab i weliy ko girdi’ ni ke tabab e gagiyeg rok Got. Rib gel e gafgow ni un tay ngorad ni bochan e machib ni ur ted. Machane, re n’ey e ku be lebguy e pi yiiy u Bible. Ma boor e duw nga tomuren ni i uneg e piin ni yad ma togopuluw nga Gil’ilungun Got e “tin nde mat’aw nga lan e motochiyel” ko nam. Ma kur lied e pi walag, ma yad be yon’ boch i yad nga kalbus, maku bay boch i yad ni un uchuliy k’angan, ma boch i yad e un boyochnag nge yim’ ara nni th’ab k’angan.​—Ps. 94:20; Rev. 12:15.

7. Mang fan ni yooren e girdi’ e darur nanged fan e pi n’en ni be buch u fayleng?

⁷ Ere, mang fan ni boor e girdi’ nder mich u wan’rad ni ke tabab Gil’ilungun Got ko gagiyeg u tharmiy ni yugu aram rogon ni boor e mich riy ni bay? Mang fan nder yag ni nge mich u wan’rad ni be lebug e pi yiiy u Bible ni bod rogon ni be machibnag e pi tapigpig rok Got ni ke yoor e duw? Gur, bochan ni yooren e girdi’ e kemus ni tin ni yad be guy nga owcherad e ir e yad be tedan’rad ngay? (2 Kor. 5:7) Fa kar mitgad ko pi n’en ni yad ma rin’ u reb e rran ngu reb ma dakir yag ni ngar nanged e n’en ni be rin’ Got? (Matt. 24:37-39) Gur, bay boch i yad ni kar paged yad ke magawonnagrad e lem nge pi n’en ni be nameg e re fayleng rok Satan ney? (2 Kor. 4:4) Faanra nge nang be’ fan e pi n’en ni be rin’ Gil’ilungun Got ma thingari gel e michan’ rok miki yag rok ni nge nang e pi n’en ni be buch u palog. Ri gad ba felfelan’ ni gad manang e pi n’en ni be buch!

BE GEL E KIREB I YAN

8-10. (a) Uw rogon ni ke lebug fare thin ni bay ko 2 Timothy 3:1-5? (b) Mang fan nrayog ni nga dogned ni ke gel e kireb u gubin ban’en?

⁸ Ku bay reb i fan ni kad nanged ndab ki n’uw nap’an me tabab Gil’ilungun Got ko gagiyeg u fayleng, ni aram e: Be gel e kireb u fayleng i yan. Ke chugur ni nge gaman raay e duw ni kad guyed ni be buch e n’en ni kan yiiynag ko 2 Timothy 3:1-5. Gad be guy ni rarogon e ngongol ko girdi’ ni kan weliy murung’agen ko re thin nu Bible ney e ke garer u gubin yang. Ga be guy e pi n’ey ni be buch, fa? Ngad weliyed boch ban’en ni be dag nriyul’ e re n’ey.​—Mu beeg e 2 Timothy 3:1, 13.

⁹ Am lemnag e n’en nib thil u thilin e pi n’en ni i lemnag e girdi’ u nap’an e pi duw ni 1940 nge yan i mada’ ko 1959 nib kireb, nge n’en ni be buch e ngiyal’ ney u tabon e maruwel, nge pi n’en ni ma n’ag e girdi’ e chalban rorad ngay, nge gosgos, nge rogon e mad ni yibe chuw ngay. Ke gel e cham ma ke garer e ngongol nib kireb u gubin yang. Ma guy e girdi’ rogon ni nge gin boch e girdi’ ko ngongol nib kireb ni yad be rin’. Pi n’en ni un pag u TV u nap’an e pi duw u thilin e 1950 nge yan i mada’ ko 1959 kakrom ni yima yog nib kireb e goo ma yaliy e girdi’ u lan e tabinaw e ngiyal’ ney. Ku gad be guy ni pi pumoon ni yad ma par e pumoon nge ppin ni yad ma par e ppin e boor e kachido ni yima pag yaarad riy, maku boor i yad ni ma un ko musik nge ku boch ban’en. Pi n’ey e ma m’ug riy rarogon e par ko pi girdi’ ney. Machane, ri gad ba felfelan’ ni bochan e ke yag ni ngad nanged rogon e lem rok Got ko pi n’ey!​—Mu beeg e Jude 14, 15.

¹⁰ Kum taarebrogonnag rogon e ngongol ko piin fel’ yangaren kakrom ko ngongol ko piin fel’ yangaren e ngiyal’ ney. Bod nnap’an e pi duw u thilin e 1950 nge yan i mada’ ko 1959 ma piin gallabthir e ma magafan’rad, ya dubrad ni nge un e bitir rorad ko mathoy tamagow, nge muun rrum, ara churu’ ni kireb. Machane ngiyal’ ney e ba ga’ ni gad ma rung’ag boch ban’en ko news ni bod e pi n’en ni baaray: Reb e bitir ni skul ni 15 e duw rok e chuchubeg e boyoch nga daken e bitir u lan e class rok me maad’ad 13 i yad, me yim’ l’agruw. Ku immoy ba ulung i bitir nib fel’ yangaren nra chingawgad ngemu’ mi yad li’ bochi pin ni mereb e duw rok nge yim’, mar chelgad ngar pirdiiyed e chitamangin nge cousin rok. Ki m’ug ko news ni bay reb e nam u Asia ni boor ko pi kireb ni kan rin’ u lan fa ragag i duw ni ke yan nib togopuluw ko motochiyel ko nam e piin fel’ yangaren e yad be rin’. Ere, gubin e girdi’ nrayog ni nga rogned ni ke gel e kireb ni yibe rin’ e ngiyal’ ney.

11. Mang fan ni boor e girdi’ ndarur nanged ni be gel e kireb i yan?

¹¹ I tamilangnag apostal Peter ni gaar: “Tin tomur e rran e bay yib i m’ug boch e girdi’ riy ni tin ni yad be yim’ ni bochan e ir e be gagiyegnag pangirad. Bay ur moninggad ngomed ni be lungurad, ‘I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney!’” (2 Pet. 3:3, 4) Mang fan ni ma yog boch e girdi’ e thin ni aray rogon? Ba ga’ ni faanra gubin ngiyal’ ni gad be guy ban’en ni be buch, ma ra mom ni nge dab kud tedan’dad ngay. Gad ra gin ni faanra yigi thil e ngongol rok be’ ni fager rodad nib tomgin. Machane, faanra i thil e lem nge ngongol ko girdi’ u toobdad ni buchuuw ma buchuuw mab mo’maw’ ni ngad nanged, ma sana dab da gingad ngay. Machane, ba gel e riya’ riy.

12, 13. (a) Mang fan nsusun e dabi mulan’dad ni bochan e pi n’en ni be buch u fayleng? (b) Mang e ra ayuwegdad ni ngad athamgilgad e ngiyal’ ney ko tin tomuren e rran ni ke “mo’maw’” e par?

¹² I yog apostal Paul nra yan i taw ko “tin tomuren e rran” ma ra “mo’maw’” e par. (2 Tim. 3:1) Machane, re n’ey e gathi be yip’ fan ndabiyog ni ngad pithiged e pi magawon ni gad be mada’nag e ngiyal’ ney, ere dab ud guyed rogon ni ngad milgad riy. Ya rayog ni nge ayuwegdad Jehovah, nge gelngin nib thothup, nge ulung ni Kristiano ni ngad gelgad ko pi n’ey. Rayog ni ngad pared ni gad ba yul’yul’, ya “re gelngin nem ni ir e ba th’abi gel” e yib rok Got, ma gathi gadad e yib rodad.​—2 Kor. 4:7-10.

¹³ U tabolngin fare yiiy rok Paul ni murung’agen e tin tomuren e rran me yog fapi thin ni “mu ta’ fanam i yan ko re bugithin ney.” Pi thin ney e be micheg nriyul’ nra buch e pi n’en ni ka nog ko re yiiy nem. Dariy e maruwar riy ni be gel e kireb ko re fayleng ney i yan nge mada’ ko ngiyal’ ni bayi chuweg Jehovah e tin nib kireb. Pi n’en ni ke buch ko girdi’ ni kab kakrom i yib e be m’ug riy ni faanra i gel e kireb ko ngongol ko girdi’, ma aram e ra munmun me kireb gubin ban’en. Machane, dariy ba ngiyal’ ni ke gel e kireb u fayleng ni bod rogon feni gel e kireb e ngiyal’ ney. Sana boor e girdi’ ni darur lemnaged e re n’ey, machane pi n’en ni ke buch ni ka nap’an e duw ni 1914 e be micheg ndab ki n’uw nap’an me chuweg Gil’ilungun Got urngin e kireb.

RE MFEN NEY E DABI CHUW

14-16. Mang e bin dalip i fan ni ke mich u wan’dad ndab ki n’uw nap’an me “yib” Gil’ilungun Got?

¹⁴ Bay e bin dalip i fan nrayog ni nge pagan’dad ni ke chugur e tomur. Pi n’en ni ke buch ko girdi’ rok Got e be dag ni ke chugur e tomur. Bod ni u m’on ni nge tabab Gil’ilungun Got ko gagiyeg u tharmiy ma immoy ba ulung ni kan dugliyrad ni ur pigpiggad ngak Got u fithik’ e pasig. Nap’an nde buch e n’en nra lemnaged nra buch ko duw ni 1914, ma mang e kar rin’ed? Yooren i yad e ulul ko pigpig ni i tay ngak Jehovah u fithik’ e yul’yul’ ni yugu aram rogon ni boor e skeng nge togopuluw ni ur mada’naged. Yooren e pi walag ney ni kan dugliyrad ni ur moyed u nap’an e duw ni 1914 ni kar pared ni yad ba yul’yul’ e kar m’ad ma ka ranod nga tharmiy.

¹⁵ I yog Jesus ko fare yiiy ni murung’agen e ngiyal’ ni ke chugur nga tungun e re m’ag ney ni gaar: “Ngar gog ngomed nriyul’ nre mfen ney e dabi chuw me taw ko ngiyal’ ni bay yib urngin e pi n’ey.” (Mu beeg e Matthew 24:33-35.a) Nap’an ni yog Jesus e “re mfen ney” ma be weliy murung’agen l’agruw ulung i Kristiano ni kan dugliyrad. Bin som’on e ulung e ur moyed u nap’an e duw ni 1914, ma kar nanged e pow riy ni ke tabab Kristus ko gagiyeg u nap’an e re duw nem. Piin ni yad ba muun ko re ulung nem e gathi kemus ni ur moyed u nap’an e duw ni 1914, ya kun dugliyrad nga gelngin Got nib thothup ko re duw nem ara u m’on riy.​—Rom. 8:14-17.

¹⁶ Bin migid e ulung ni ku yad ba muun ko “re mfen ney” e ku yad boch e Kristiano ni kan dugliyrad. Gathi kemus ni ur moyed u nap’an ni ka bay girdien e bin som’on e ulung ni ka yad ba fas, ya kun dugliyrad nga gelngin Got nib thothup u nap’an ni ka bay e pi walag ney u fayleng. Ere, gathi gubin e Kristiano ni kan dugliyrad ni ka yad bay e ngiyal’ ney e yad ba muun ko “re mfen ney” ni faani weliy Jesus murung’agen. Piin ni yad ba muun ko bin migid e ulung e kar pilibthirgad. Machane, fapi thin ni yog Jesus ni bay ko Matthew 24:34 e be dag ngodad “nre mfen ney e dabi chuw” me tabab fare gafgow nib ga’. Re n’ey e be micheg ngodad ndab ki n’uw nap’an me thang faen ni ir e Pilung u Gil’ilungun Got e piin ni yad ba kireb me beechnag urngin ban’en.​—2 Pet. 3:13.

DAB KI N’UW NAP’AN ME GEL KRISTUS

17. Fa dalip i n’em ni kad weliyed e mang e be ayuwegdad ni nge tamilang u wan’dad?

¹⁷ Ere, mang e rayog ni nga dogned u murung’agen fa dalip i n’em ni kad weliyed? Ke yog Jesus ndariy bagadad ni manang e re rran nem ara re awa nem. (Matt. 24:36; 25:13) Machane, ke yog Paul ni gad manang e “ngiyal’” ni ke chugur ngay. (Mu beeg e Roma 13:11.) Gad be par ko re ngiyal’ i n’em ni aram e tin tomuren e rran. Faan gad ra tedan’dad ko pi yiiy u Bible nge n’en ni be rin’ Jehovah Got nge Jesus Kristus, ma aram e rayog ni ngad guyed e mich riy ni ke chugur ni ngan thang e re m’ag nib kireb ney.

18. Mang e ra buch ko piin dubrad ni ngar folgad rok Jesus Kristus ni ir e Pilung u Gil’ilungun Got?

¹⁸ Dab ki n’uw nap’an ma urngin e piin ni dubrad ni ngar folgad rok Jesus Kristus ni ir Faen ni be yan u daken ba os nib wechwech, e yad ra nang nde puluw e n’en ni ur rin’ed. Dabiyog ni ngar milgad ko pufthin ni yira tay ngorad. Ra yan i taw ko ngiyal’ nem ma boor e girdi’ ni yad ra tolul ni be lungurad: “Mini’ e rayog ni nge fos?” (Rev. 6:15-17) Bin migid e guruy ko Revelation e be pi’ e fulweg ko re deer ney. Piin ni yad ba muun ko fachi ulung ni ka yad bay u fayleng nge piin ni yad be athapeg e par u fayleng e yad ra magey ni yad ba “fos” ni bochan e yad be rin’ e tin nib m’agan’ Got ngay. Fare ulung nib ga’ ara fapi “girdi’ ni ke muulung ni pire’ ni pire’” e yad ra magey ni yad ba fos u nap’an fare gafgow nib ga’.​—Rev. 7:9, 13-15.

19. Bochan ni kari mich u wan’um ni ke chugur e tomur, ma mang e ga be athapeg ni ngam guy nra buch boch nga m’on?

¹⁹ Faan gad ra tedan’dad nga rogon ni be lebug e pi yiiy u Bible e ngiyal’ ney, ma aram e dabi magawonnagdad e pi n’en ni bay ko re fayleng rok Satan ney. Maku gad ra nang fan ni be buch e pi n’en ni be buch u fayleng. Dab ki n’uw nap’an me gel Kristus ko kireb me thang e re fayleng nib kireb ney u nap’an fare mahl ni Armageddon. (Rev. 19:11, 19-21) Am lemnag gelngin e felfelan’ ni gad ra tay u tomuren ni ke buch urngin e pi n’ey!​—Rev. 20:1-3, 6; 21:3, 4.