Boch Ban’en ni Kan Yiiyang ni Ke Riyul’, Machane Boor e De Riyul’

Ga baadag ni ngam nang ko mang e ra buch rom boch nga m’on, fa? Re n’ey e boor e girdi’ ni baadag. Boor e girdi’ e yad ma yog murung’agen e pi n’en nra buch boch nga m’on, machane ba thilthil e n’en ni ma buch. Mu lemnag e pi n’en ni baaray:

• PI SCIENTIST e yad ma fanay boor mit e talin e maruwel, maku yad ma fanay boor e salpiy ya nge yag ni nga rogned ko mang e ra buch boch nga m’on. Ku yad ma yog ko mang e rayog ni nge buch ko fayleng ni bochan e pi n’en ni be kirebnag, maku rayog ni nga rogned ko ra gabul ma ra aw e n’uw ko gin ni ga ma par riy, fa danga’.

• GIRDI’ NI YAD MA FAL’EG I YALIY RAROGON BOCH BAN’EN, MI YAD WELIY MURUNG’AGEN e yad ma guy e n’en nra buch ko pi siyobay nge rarogon e pi am. Warren Buffet ni ir be’ nth’abi yoor salpiyen e ka nog ni bod reb e profet ni bochan e manang rogon ni nge maruwel ko salpiy rok, ya nge fel’ rogon e siyobay rok. Nate Silver ni be’ ni ma fal’eg i yaliy rarogon boch ban’en e ma fil murung’agen e matheeg ya aram e n’en ni ma ayuweg nge yag ni weliy ko mang e ra buch ko am nu Meriken, maku rayog ni nge nang ko mini’ e piin ni kan mel’egrad u fithik’ e piin ni yad ma fal’eg e kachido ni yira tow’athnagrad.

• PI N’EN NI KAN YOLOY KAKROM e kan nang ni aram boch e yiiy. Ngiyal’ ney e bay boch e girdi’ ni kar guyed ni ke lebug e thin ni ke yoloy Michel de Notredame (Nostradamus) ko bin 16 e chibog. Reb e Mayan calendar ni yan i mus ko December 21, 2012 e kan weliy riy fan nra buch boch ban’en nrayog ni nge magawonnag e par ko girdi’ boch nga m’on.

• PI TAYUGANG’ KO PI YURBA’ I TELIW e yu ngiyal’ e yad ma weliy ni bay boch ban’en nra buch ko fayleng boch nga m’on, ya ngar ginanged e girdi’, me yag ni nge yoor e girdi’ ni nge un ko ba’ rorad e teliw. Harold Camping e ir be’ ni ma yiiynag e pi n’en nib kireb nra buch ko fayleng nge boch e girdi’ ni yad ma un ngak e kar weliyed ni yira kirebnag e fayleng ko duw ni 2011. Machane, dariy ban’en ni ke buch ko fayleng.

• GIRDI’ NRAYOG NI NGAR NANGED RAROGON E LEM ROK YUGU BOCH E GIRDI’ e yad ma yog ni bay gelngirad ni ngar guyed ko mang e ra buch boch nga m’on. Edgar Cayce nge Jeane Dixon e bay boch ban’en nra yiiynagew u murung’agen e pi n’en nra buch ko bin 20 e chibog nriyul’ ni lebug. Maku bay boch nra yiiynagew nde lebug. Bod ni yog Dixon nra tabab e Bin Dalip e Mahl u Fayleng ko duw ni 1958, me Cayce e yog ni fare mach nu New York e ra ligil nga ar u lukngun e duw ni 1970.

Gur, bay reb e kanawo’ nrayog ni ngan nang ko mang e ra buch boch nga m’on? Ireray reb e deer nib fel’ ni yira lemnag? Faan ga ra nang e pi n’en ni bayi buch boch nga m’on, ma rayog ni nge yib angin ko yafas rom nge pi n’en ni ga ra mel’eg ni ngam rin’.