Reb e Magawon u Ga’ngin Yang u Fayleng

Boch e girdi’ e kar susunnaged ni faanra ulul e biney e magawon i yan, ma ra taw ko duw ni 2030 ma boor ko 8,000,000 e girdi’ ni yad ra yim’ ni bochan e tamagow. Ma kan nang nra taw ko bin 21 e chibog ma sogonap’an 1,000,000,000 e girdi’ ni ku ra yim’.

Gathi kemus ni goo piin ni yad ma thoy e tamagow e yad ra yim’. Ya kub muun girdien e tabinaw ngay ni darur uned ko tamagow ni yad ma par nib kireban’rad, ni bochan e boor e salpiy ni yima adbey ko tamagow, ni kub muun ngay 600,000 e girdi’ ndarur thoyed e tamagow ni yad be yim’ ni bochan e ath ko tamagow ni ku yad be fil. Be magawon e girdi’ ni bochan e be tolang puluwon e tafalay.

Biney e magawon ni ke garer e gathi bod yugu boch e m’ar ni ma gay e pi togta rogon ni ngar pirieged e falay riy, ya kan nang ko mang e yira rin’ me tal e re magawon ney. Dr. Margaret Chan ni ir e director-general ko fare World Health Organization, e yog ni gaar: “Biney e magawon e sum ko girdi’, ma faanra ba m’agan’ e pi am nge girdi’ ngay, ma rayog ni ngar taleged.”

Pi nam u fayleng i yan e yad be gay rogon ni ngar rin’ed boch ban’en ya nge yag ni ngar taleged e biney e magawon. Bod u nap’an e August 2012 ma gonap’an 175 e nam ni ke taareban’rad ngay ni ngar rin’ed boch ban’en ni ngan taleg e tamagow.a Machane ku bay boch ban’en ni be rin’ e pi siyobay ya nge yag ni nge dab ni tal i chuw’iy e tamagow, ma yad ma fanay bokum bilyon e dolla ni fan e nge adag e girdi’ ni ngar chuw’iyed e tamagow nib ga’ ni piin nib pin nge piin fel’ yangaren ni yad ma par ko pi nam nib gafgow. Ke gaman taareb e bilyon e girdi’ ni kar mechamgad ko tamagow. Ma bochan e re n’ey, mab mudugil ni ku boor e girdi’ ni ku ra yim’ riy. Piin ni yad ma thoy e tamagow e ngiyal’ ney e faanra dab ra talgad, ma tomuren aningeg i ragag e duw, ma ku ra yoor boch e girdi’ nra yim’.

Bochan e pi n’en ni yima dag yaan, ya nge adag e girdi’ ni ngar chuw’iyed ma bochan ni kar mechamgad ngay, ma pi girdi’ ney e yad ma athapeg ndab kur thoyed e tamagow. Ireram e n’en ni buch rok Naoko, ni tabab ko tamagow u nap’an ni kab fel’ yangaren. Bochan e pi n’en ni guy u TV u murung’agen e tamagow, me lemnag nib puluw e n’en ni be rin’. Yugu aram rogon ni yim’ e gallabthir rok ko lung cancer, maku be chuguliy l’agruw e ppin ni fak, machane ku de tal ko tamagow. I yog ni gaar: “Be magafan’ug nri yib e lung cancer ngog, maku be magafan’ug ko bitir rog, machane ku de yag ni ngu tal ko tamagow. Ere ug lemnag ndabiyog ni nggu tal ko tamagow.”

Machane, ke yag rok Naoko ni nge tal. Ke pirieg ni bay fan ni nge tal ko tamagow, ni aram e n’en ni ke ayuweg bokum milyon e girdi’ ni ngkur talgad ko tamagow. Mang e re n’em? Kum beeg e bin migid e article.