KENGGIN E RE KE BABYOR NEY | BA GA’ FAM U WAN’ GOT, FA?
Manang Got Rarogom
“Somol, ga be guy lanin’ug, ma ga manangeg.”—PSALM 139:1.
“Dawor ni gargelegeg ma ga be guyeg.”—PSALM 139:16
FAN NI MA MARUWAR LANIYAN’ BOCH E GIRDI’: Boor e girdi’ e yad ma lemnag ni Got e ma guy e girdi’ ni kemus ni yad bogi tadenen, ma dar beechgad, ma dariy rogon ni nge lemnagrad. Kendra ni be’ ni i par nib kireban’ e lemnag ndariy ban’en nib fel’ nrayog ni nge rin’, ya dabiyog rok ni nge fol ko motochiyel rok Got. Ere yog ni gaar, “Kug tal ko meybil.”
N’EN NI BE FIL E THIN ROK GOT: Gathi kemus ni ma sap Jehovah ko oloboch rom, ya ri manang rarogom. Be gaar e Bible: “Manang e n’en nni ngongliydad ngay; ma manang ni gadad e fiyath.” Der ma “gechignagdad nrogon nsusun ni nge aw ngodad,” machane ma runguydad ma ma n’ag fan e denen rodad ni faanra da kalgadngan’dad.—Psalm 103:10, 14, BT.
Mu lemnag David ni pilung nu Israel ni kan weliy murung’agen ko bin som’on e article ko pi article ney. U lan e meybil rok ngak Got me yog ni gaar: “Dawor ni gargelegeg ma ga be guyeg . . . Got, mu guy lanin’ug ngam nang; mu skengnigeg ngam nang e lem rog.” (Psalm 139:16, 23) Arrogon, ba mich u wan’ David ni yugu aram rogon ni ke rin’ reb e denen nib ubchiya’, machane rayog ni nge guy Jehovah ni ke kalngan’.
Manangem Jehovah nib fel’ rogon, nib thil nga rogon ni manangem boch e girdi’. Thin ko Bible e be gaar: “Girdi’ e yad ma guy be’ u wuru’ i downgin, mi gag e gu ma guy e lem ko girdi’.” (1 Samuel 16:7) Manang Got fan ni ga ma rin’ boch ban’en, maku manang ni bay boch ban’en u rarogon e gallabthir rom ni ma m’ug ko ngongol rom, maku manang rogon nni chuguliyem nge gin nni chuguliyem riy. Ma guy mab ga’ fan u wan’ e athamgil ni ga ma tay ni ngam par ni gab mat’aw u p’eowchen, ni yugu aram rogon ni ga ma oloboch.
Ere, bochan ni manang Jehovah rarogom, ma uw rogon nra fanay e re n’ey ni nge fal’eg lanin’um?