KENGGIN E RE KE BABYOR NEY | BA GA’ FAM U WAN’ GOT, FA?
Rayog Rok Got Ni Nge Fal’eg Lanin’um
“Got ni ma pi’ e athamgil nga laniyan’ e piin ni ke mulan’rad e pi’ e athamgil nga lanin’mad.”—2 KORINTH 7:6.
“Fak Got . . . e gub t’uf rok ma ke pi’ e pogofan rok ni fan ngog.”—GALATIA 2:20
FAN NI MA MARUWAR LANIYAN’ BOCH E GIRDI’: Yugu aram rogon nib t’uf rok boch e girdi’ ni ngan fal’eg lanin’rad, machane yad ma lemnag ni faan yad ra ning e ayuw ngak Got ni nge ayuwegrad ko magawon rorad, ma aram e yigoo yad e yad be lemnaged yad. Be’ nib pin ni Raquel fithingan e yog ni gaar, “Nap’an ni gu ra guy urngin e girdi’ u fayleng nge rogon feni ubchiya’ e magawon rorad, ma gowa daki ga’ fan e tirog e magawon, ma dabug ni nggu ning e ayuw ngak Got.”
N’EN NI BE FIL E THIN ROK GOT: Boor e kanawo’ ni ke guy Got rogon ni nge ayuweg e girdi’, miki fal’eg lanin’rad. Gubin e girdi’ ni ke af e denen ngorad, ma dariy ba ngiyal’ nrayog ni ngar pared ni yad ba mat’aw u mit Got. Machane, bochan ni gadad ba t’uf rok Got ma aram “me l’og Fak [Jesus Kristus] nge yib, nu daken Fak e nge n’ag Got fan e denen rodad riy.” (1 John 4:10) U daken fare maligach ni pi’ Jesus, ma ke yag ni nge n’ag Got fan e denen rodad, maku rayog ni nge beech e nangan’ rodad, ma ra yag e athap ngodad ko par u paradis u lan e bin nib beech e fayleng.a Machane gur, re biyul nem ni kan pi’ e fan ngak gubin e girdi’, fa be m’ug riy gelngin fanam t’uf rok Got?
Mu lemnag e n’en ni rin’ apostal Paul. Rib ga’ fan fare maligach ni ke pi’ Jesus u wan’ me yoloy ni gaar: “Ke michan’ug ngak e en ni Fak Got, ni ir e gub t’uf rok ma ke pi’ e pogofan rok ni fan ngog.” (Galatia 2:20) Riyul’ ni yim’ Jesus u m’on ni mang Paul reb e Kristiano. Machane, manang Paul ni fare maligach e ba tow’ath ni ke pi’ Got ni fan ngak.
Fare maligach ni pi’ Jesus e ba tow’ath ni ke pi’ Got ni fan ngom. Re tow’ath nem e be m’ug riy feni ri gab t’uf rok Got. Re n’ey e rayog ni nge pi’ e “l’agan’ nib mudugil [ngom] ni bay i par ndariy n’umngin nap’an,” maku rayog ni nge ‘suguy lanin’um ko athamgil me gelnagem nguum rin’ ma ga be yog urngin e tin nib fel’.’—2 Thess. 2:16, 17.
Machane, ke chugur ni nge gaman 2,000 e duw nap’an ni ke pi’ Jesus e yafas rok nib maligach. Mang e be micheg ni be gay Got rogon ni nge fel’ e tha’ u thilmew e ngiyal’ ney?
a Faanra ga baadag ni ngkum nang boch murung’agen fare biyul ni pi’ Jesus, mag guy e guruy ni 5 ko fare ke babyor ni Mang e Ri Be Fil e Bible? ni ke ngongliy e Pi Mich Rok Jehovah.