Ga Manang ma Ga Ma Fanay Fithingan Got, Fa?

Bay reb e fager rom nib chugur e tha’ u thilmew ni dam nang fithingan? Ba mudugil ndariy. I yog Irina ni be’ nu Bulgaria ni gaar, “Dabiyog ni ngam chugur ngak Got ni faanra dam nang fithingan.” Rogon ni kan tamilangnag ko fa bin ni ke yan e article e baadag Got ni ngam chuchugur ngak. Aram fan ni ke fanay Got e Bible ni nge yog ngom ko ir mini’. Be gaar: “I gag Jehovah. Ireray fithingag.”​—Isaiah 42:8, NW.

Ga be lemnag ma ba ga’ fan u wan’ Jehovah ni ngam nang ma ga fanay fithingan, fa danga’? Mu lemnag e re n’ey: Ngachal rok Got ni kan yoloy ni aningeg e letra riy ni thin nu Hebrew ni ka nog e Tetragrammaton ngay e ba chugur ni nge gaman 7,000 yay ni bay ko Pi Babyor ko Bible nni Yoloy Som’on ni Thin ni Hebrew. Dariy reb e ngachal ni aram feni yoor yay ni kan fanay u lan e Bible. Ere, ba tamilang ni baadag Jehovah ni ngad nanged ma gad fanay fithingan.a

Sana bay boch e girdi’ ni yad ma lemnag ni yad ra fanay fithingan Got ma aram e gowa yad be darifannag ni bochan ni Got e ba thothup ma gubin ma rayog rok. Riyul’ nde fel’ ni ngam fanay fithingan Got u reb e kanawo’ ni ga be darifannag, ni bod rogon ni dab mu darifannag fithingan e fager rom. Ya baadag Jehovah ni piin ni yad ba t’uf rok e ngar ted fan fithingan, ma ngkur weliyed ngan nang. (Psalm 69:30, 31; 96:2, 8) Mu lemnag rogon ni fil Jesus ngak pi gachalpen rogon ni ngar meybilgad ni nge lungurad: “Chitamangimad ni ga bay u tharmiy: Ngan tay fan fithingam nib thothup.” Rayog ni ngkud thothupnaged fithingan Got ni faan gad ra weliy ngan nang. Ma faan gad ra rin’ e re n’ey ma rayog ni ngari chugur e tha’ u thildad.​—Matthew 6:9.

Be micheg e Bible ni Got e ma lemnag e “piin ni yad ma lemnag [ara “ba ga’ fan u wan’rad”] fithingan.” (Malaki 3:16, NW; footnote) Ke micheg Jehovah ngak e en nra tayfan fithingan ni gaar: “Gu ra ayuweg ni bochan ni manang fithingag. Ra piningeg, ma gu ra fulweg lungun. Gu bay rok u nap’an nra yib e gafgow ngak.” (Psalm 91:14, 15, NW) Faanra ga baadag ni nge chugur e tha’ u thilmew Jehovah, ma ba ga’ fan ni ngam nang mu um fanay fithingan.