Yam’ Ni Tay Jesus Nge Fas Ko Yam’ Ni Tay​—Angin Nrayog ni Nge Yib Ngom

Dan sunmiy e girdi’ ni ngaur m’ad

“Me fek Somol ni Got fare girdi’ nge ta’ nga fithik’ fare woldug nu Eden ni ir e ngi i ayuweg ma be matanagiy. Me gaar ngak fare girdi’, ‘Ra um koy wom’engin urngin e gek’iy ni ba’ ko re gi woldug ney, ma kemus ni fare ke gek’iy ni ma tamilangnag an’uy ko tin nib fel’ nge tin nib kireb e dab mu koy. Thingar dab mu koy wom’engin. Ya rofen ni ga ra kay e ga ra yim’.’”​—Genesis 2:15-17.

I tay Got e bin som’on e girdi’ ni aram Adam nga lan fagi milay’ nu Eden. Gi milay’ nem e ba sug ko gamanman ni boor mit nge woldug nrib fel’ yaan. Boor mit e gek’iy riy ni bay wom’engin nrayog ni nge kay Adam. Machane, bay taab ken ko pi gek’iy nem ni yog Jehovah Got ngak Adam ndabi kay wom’engin, ya faanra kay ma ra yim’.

Manang Adam fan e re motochiyel nem nni pi’ ngak, fa? Arrogon, manang ko mang e yam’; ya i guy e gamanman ni i yim’ e ngiyal’ nem. Ma faan gomanga sunmiy Got Adam ni bay n’umngin nap’an ni nge par me yim’, ma ra yan i aw nib m’ay fan e binem e motochiyel ni pi’ Got ngak. Machane, manang Adam ni faanra fol rok Got ma dabi kay wom’engin fare ke gek’iy, ma ra par ndariy n’umngin nap’an ndabi yim’.

Bay boch e girdi’ ni yad ma lemnag ni fare ke gek’iy e be yip’ fan e par ko pumoon nge ppin. Machane, de puluw e re n’ey, ya bin riyul’ riy e, baadag Jehovah ni nge diyen Adam nge Efa ‘nge yoor pi fakrow’ me ‘wer e piin ni owcherow nga gubin yang u fayleng ngar pired riy mi yad suwey.’ (Genesis 1:28) Riyul’ e re ke gek’iy nem ni weliy Jehovah murung’agen. I yog ni aram “fare ke gek’iy ni ma tamilangnag an’uy ko tin nib fel’ nge tin nib kireb,” ni bochan e be yip’ fan mat’awun Got ni nge dugliy e n’en nib fel’ ni nge rin’ e girdi’ nge n’en nib kireb ndab ra rin’ed. Faan gomanga de kay Adam wom’engin e re ke gek’iy nem, ma aram e gathi kemus ni ke fol rok Got, ya ku ra m’ug riy ni be tayfan e En ni ke sunmiy ma ke pi’ urngin ban’en ngak nib tow’ath.

“I yim’ Adam ni bochan e de fol rok Got

Me gaar [Got] ngak Adam: ‘Kam . . . koy wom’engin fare ke gek’iy ni gog ngom ni dab mu koy. Ere . . . thingari yib e athuw u dakenam ma ga maruwel nib gel nge yog ni pi’ e but’ e ggan ngom, nge yan i mada’ ko ngiyal’ ni ngam sul riy ko but’ ni ir e ni ngongliyem ngay. Ni ngongliyem ko but’, ere bay kum ngal’ ni but’ bayay.’”​—Genesis 3:17, 19.

I kay Adam wom’engin fare ke gek’iy nnog ngak ndabi kay. Rib kireb e re n’em ni rin’, ya ke togopuluw, ma ki dag ndariy fan u wan’ urngin ban’en nib fel’ ni ke rin’ Jehovah ni fan ngak. Nap’an ni kay wom’engin e re ke gek’iy nem, ma aram me dag ni ke siyeg ndab ki fol rok Jehovah, ma rib kireb wenegan ni yib ngak.

I yim’ Adam ni bod rogon ni yog Jehovah u m’on riy. I sunmiy Got Adam ko “but’.” Ere, yog ngak ni ku ra ‘sul ko but’.’ Tomuren ni yim’ Adam, ma de ngal’ ni yugu ban’en, ara yan nga yugu reb e giyow. Nap’an ni yim’ me sul ngki ngal’ ni but’ bayay, ni aram e n’en nni ngongliy riy.​—Genesis 2:7; Eklesiastes 9:5, 10.

“Gad ma yim’ ni bochan e kad bad rok Adam

Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.”​—Roma 5:12.

Gathi yigoo Adam e ke gafgow u wenegan e denen ni ngongliy. Gathi yafas ni kemus ni 70 ara 80 e duw n’umngin nap’an e mul u pa’ Adam, ya mul e athap ko yafas ndariy n’umngin nap’an u pa’. Maku reb e, nap’an ni denen Adam, ma aram ma daki par nib flont me af e denen rok ngak pi fak.

Gad gubin ni kad bad rok Adam. Ke af rarogon ngodad ndaki flont, ma aram fan ni gad ma denen ma gad ma yim’. Rib fel’ rogon ni weliy Paul murung’agen e re n’ey. I yoloy ni gaar: “Kan pieg ni chuway’ ngak e denen ni bod rogon ba sib. Ere kar gu gafgow! I mini’ e ra chuwegeg u pa’ e re dowef ney ni ir e be fekeg i yan ko yam’?” Me fulweg ni gaar: “Ke magar Got u daken e Somol rodad i Jesus Kristus!”​—Roma 7:14, 24, 25.

I pi’ Jesus e yafos rok ya ngki yag e yafos ndariy n’umngin nap’an ngodad bayay

“En ni Chitamangiy e l’og Fak nge yib ni ir e en ni nge thapeg e girdi’ nu fayleng ngak Got.”​—1 John 4:14.

Bay ban’en ni ke rin’ Jehovah Got nra pithigdad ko denen nge yam’. Ni uw rogon? Ke l’og Fak u tharmiy ni nge yib nga fayleng ni ngan gargeleg ni be’ nib flont. Machane, ba thil Jesus ngak Adam, ya Jesus e “dariy e denen ni ngongliy.” (1 Peter 2:22) Bochan nib flont Jesus, ma aram fan nde par u tan gelngin e yam’, maku rayog ni nge par ndariy n’umngin nap’an nib flont.

Machane, ke pag Jehovah e pi toogor rok Jesus ni ngar lied ngem’. Dalip e rran nga tomuren, me faseg Jehovah bayay nga reb e dowef ni gathi downgin e girdi’, ya nge yag ni ngki sul bayay nga tharmiy. Mu rom e yan i ognag Jesus riy fel’ngin e yafas rok nib flont ni ke pi’ ni fan e nge yag ni ngki sul bayay e n’en ni ke mul u pa’ Adam nge pi fak. I m’agan’ Jehovah ko re maligach nem, me bing e kanawo’ ko girdi’ nrayog ni nge mich Jesus u wan’rad miki yag e yafas ndariy n’umngin nap’an ngorad.​—Roma 3:23, 24; 1 John 2:2.

Ere, bod ni ke chuw’iy Jesus ngki fulweg e n’en ni ke mul u pa’ Adam. I yim’ ni fan e ngki yag e yafas ni manemus ngodad. Be gaar e Bible: “Jesus e . . . yim’ ni fan ngak urngin e girdi’ ni bochan e be runguy Got e girdi’. Ma kad guyed ni ke teeliyawnag Got ko flaab nge ta’ fan e chiney ni bochan fare yam’ ni ta’ ni gafgow riy.”​—Hebrews 2:9.

Re n’ey ni kan rin’ e be m’ug rarogon Jehovah riy. Bochan ni gubin ban’en ni ma rin’ mab mat’aw, ma aram fan ndabiyog ni nge pag e girdi’ ndawor ra flontgad ni nge mang yad e ra biyuliyed yad. Machane, bochan nib t’uf e girdi’ rok ma ma runguyrad, ma aram fan ni fol ko motochiyel rok, me pi’ Fak ni nge pi’ puluwon e n’en ni ke mul u pa’ Adam.​—Roma 5:6-8.

Kan faseg Jesus ko yam’, maku bay boch e girdi’ ni ku yira fasegrad ko yam’

“Kristus e ir e som’on u fithik’ e piin ni kar m’ad nni faseg ko yam’. Ni bod rogon ni yam’ e yib ni bochan taareb e girdi’, e aram rogon ni fos ko yam’ e yib ni bochan taareb e girdi’. Rogon ni ma yim’ urngin e girdi’ ni bochan e yad taab girdi’ Adam, e aram rogon ni gubin e girdi’ ni bay ni faseg ko yam’ ni bochan e kar taab girdi’gad Kristus.”​—1 Korinth 15:20-22, NW.

Dariy e maruwar riy nriyul’ ni immoy Jesus, ma ku riyul’ ni yim’. Machane, mang e be micheg nriyul’ nni faseg ko yam’? Bin th’abi ga’ e mich riy e tomuren nni faseg ko yam’, ma boor e girdi’ ni m’ug ngorad, ma kub thilthil e gin ni i m’ug riy ngorad. Immoy bayay ni m’ug ngak 500 e girdi’. I weliy apostal Paul murung’agen e re n’ey u lan fagi babyor ni yoloy nge pi’ ngak piyu Korinth. I yog ni bay boch e pi girdi’ nem ni ka yad ba fos e ngiyal’ nem, ma rayog ni ngar micheged nriyul’ e n’en ni kar guyed nge n’en ni kar rung’aged.​—1 Korinth 15:3-8.

Nap’an ni yoloy Paul ni Kristus e “ir e som’on” nni faseg ko yam’, ma be yip’ fan ni bay boch e girdi’ ni ku yira fasegrad nga tomuren. I yog Jesus nra taw nga ba ngiyal’ ma “gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.”​—John 5:28, 29.

Ra nge yag e yafas ndariy n’umngin nap’an ngodad, ma thingar da maruweliyed e michan’ rodad ngak Jesus

“Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

Tin som’on e page ko Bible e be weliy rogon ni af e yam’ ko girdi’, me mul fare Paradis u pa’rad. Ma tin tomur e page ko Bible e be weliy murung’agen e ngiyal’ ni yira chuweg e yam’, me sulweg Got e Paradis nga rogon. Ra taw ko ngiyal’ nem, ma rayog ni nge par e girdi’ ni yad ba felfelan’ ndariy n’umngin nap’an. Be gaar e Revelation 21:4: “Dab ku unim’.” Verse 5 e be micheg nriyul’ e pi thin ney, ya be gaar: “Pi thin ney e ba riyul’ ma rayog ni ngan pagan’uy ngay.” Rayog rok Jehovah ni nge lebguy urngin e tin ni ke micheg.

Ere, ba mich u wan’um ni “pi thin ney e ba riyul’ ma rayog ni ngan pagan’uy ngay,” fa? Ere, mu guy rogon ni ngkum fil boch ban’en u murung’agen Jesus Kristus, ma ga maruweliy e michan’ rom ngak. Ya faan ga ra rin’ ni aray rogon, ma aram e rayog ni ngam fel’ u wan’ Jehovah. Ma gathi kemus nra fel’ rogom ko pi tow’ath ni be pi’ ngodad e chiney, ya ku ra yag fare athap ngom ko yafas ni manemus u Paradis u fayleng ko ngiyal’ ni “dab ku unim’, ma dab ki i kireban’uy, ma dab ku un yor, ma dab ku un amith.”