Mang Fan ni Ma Meybil e Girdi’?

Pi thin ni baaray ni ke yog Samuel, nge Teresa, nge Magdalene e be dag ni boor fan ni ma meybil e girdi’. Boch e girdi’ e ba puluw fan e meybil ni yad ma tay ma boch e danga’. Bay boch e girdi’ ni yad ma meybil nrogon ni ke yib u gum’ircha’rad; ma boch e danga’. Demtrug ko yad ma meybil ni nge yag nra ngongliyed e skeng rorad u skul nib fel’ rogon, ara nge gel e piin ni yad baadag ni ngar gelgad u ba mit e gosgos, ara nge pow’iy Got e tabinaw rorad, ara ku boch ban’en, machane bokum milyon e girdi’ e yad ma guy nib t’uf ni ngar meybilgad. Bin riyul’ riy e, kan pirieg ni mus ngak e piin ndarur uned nga barba’ e teliw ma yad ma meybil ni gubin ngiyal’.

Me gur, ga ma meybil, fa? Faanra ga ma meybil, ma mang e ba ga’ ni ga ma yibilay? Demtrug ko ba mecham ngom ni ngaum meybil fa danga’, ma sana ga ra fithem ni nge lungum: ‘Bay angin e meybil ni gu ma tay, fa? Gur, bay be’ ni ma motoyil ngog?’ I yog reb e tayol ni meybil e bod “ba mit e tafalay . . . ma bod rogon ni ga be non nga reb e nig ni ga be chuguliy.” Ku bay boch i girdien e tafalay ni ku aray rogon e n’en ni ka rogned. Yad ma yog ni meybil e kub “mit e falay.” Gur, piin ni yad ma meybil e kemus ni yug yad ma rin’ ban’en ndariy fan, fa bay angin ni ma yib nga lanin’rad?

Be yog e Bible ni meybil e gathi kemus ni bod ba mit e tafalay. Ya be yog nnap’an ni yira meybil u reb e kanawo’ nib puluw mu kun yibilay e pi n’en ni ir e ba ga’ fan, ma bay be’ nra motoyil ngay. Riyul’ e re n’ey, fa? Ngad guyed e fulweg riy.