Gur, Bay Be’ ni Be Motoyil?

Bay boch e girdi’ ni yad ma lemnag ni meybil ni yima tay e ban’en ni yugu yibe n’ag e tayim ngay ndariy fan, ya dariy be’ ni ma motoyil ngay. Ku bay boch e girdi’ ni yad ma gay rogon ni ngar meybilgad, machane yad ma lemnag ndariy be’ ni be fulweg taban e meybil rorad. Immoy be’ nde mich Got u wan’ ni i susunnag rarogon Got, ngemu’ me meybil ni gaar: “Aygum sakathkath ngog.” Machane, me yog ni “dariy ban’en” ni yog Got.

Machane, be micheg e Bible ngodad ni bay ba Got ni ma motoyil ko meybil. Baaray e n’en ni be yog e Bible nnog ngak boch e girdi’ kakrom. Ni gaar ngorad: “Nap’an ni gimed ra yornag e ayuw ngak, ma ra fulweg taban e meybil romed.” (Isaiah 30:19, BT) Ku bay reb e thin nu Bible ni be gaar: “Girdi’ nib fel’ e yad ra meybil ma rib fel’ u wan’ Somol.”​—Proverbs 15:8.

Ku be weliy e Bible murung’agen boch e girdi’ ni i rung’ag Got e meybil rorad. Bay reb e thin nu Bible ni be yog ni i meybil Jesus ni be “wenig ngak Got . . . ya ir e rayog rok ni nge tay Jesus ndabi yim’,” ma aram me “fulweg Got taban e meybil rok.” (Hebrews 5:7) Ku bay murung’agen boch e meybil ni i tay boch e girdi’ ko Daniel 9:21 nge 2 Kronicles 7:1.

Ere, mang fan ni ma lemnag boch e girdi’ nder ma fulweg Got taban e meybil rorad? Ra ngan motoyil ko meybil rodad, ma thingar da meybilgad ngak fare Got ni bay murung’agen u lan e Bible ni aram Jehovah,a ma gathi ngad meybilgad nga yugu boch e got ara pi ga’ rodad ni kar m’ad kakrom. Ku baadag Got ni ngad ‘ninged ban’en ngak ni ban’en nib m’agan’ ngay.’ Ke micheg ni faan gad ra yibilay e tin nib m’agan’ ngay ma ra “rung’ag” e meybil rodad. (1 John 5:14) Ere, faanra gad baadag ni ngan rung’ag e meybil rodad, mab t’uf ni ngad nanged murung’agen fare Got ni be weliy e Bible murung’agen ma gad fil e tin nib m’agan’ ngay.

Boor e girdi’ nib mich u wan’rad ni meybil e gathi kemus ni ban’en ni yima rin’ ni bay rogon ko teliw, ya riyul’ ni ma motoyil Got ko meybil ma ma fulweg taban. Isak ni ma par u Kenya e yog ni gaar: “Kug meybil ni nge ayuwegeg Got ni nggu nang fan e thin nu Bible. De n’uw nap’an nga tomuren, me yib be’ i yog ngog nrayog ni nge ayuwegeg. Ma aram e n’en nib t’uf rog.” Hilda ni ma par u Manile’ e baadag ni nge tal ko tamagow. Boor yay ni i gay rogon ni nge rin’ e re n’ey, ma de yag rok. Ere yog e pumoon rok ngak ni gaar, “Mang ndab mu meybil ngak Got nge ayuwegem?” Ere, fol ko n’en ni yog e pumoon rok ngak. I yog ni gaar: “Kug gin nga rogon ni Ke ayuwegeg. Gowa bod ni kug dabuy ni nggu tamagow. Ere, aram e n’en ni ayuwegeg nge yag ni nggu tal ko tamagow.”

Ga be lemnag ma baadag Got ni nge ayuwegem u boch ban’en ni ma magafan’um ngay nib puluw ko n’en nib m’agan’ ngay, fa?