Ba Puluw e Pi Fonow nu Bible Ngodad e Ngiyal’ Ney, Fa?

BOCH E GIRDI’ E MA YOG NI DANGA’. Immoy reb e togta ni yog ni faanra ngad paged e Bible ni nge pow’iydad, ma bod ni gad be fanay ba ken e babyor nni ngongliy u bang ko duw ni 1920 ni ngan fil e chemistry riy ko bitir u skul. Be’ nder ma tayfan e Bible e ku rayog ni nge fith ko rayog ni ngan fanay babyoren ba mit e computer ni un fanay kafram ni nge pow’iyey u rogon ni ngan maruwel nga reb e computer ni yibe fanay e chiney fa dabiyog. Re n’ey e be yip’ fan ni bay boch e girdi’ ni yad ma lemnag ni Bible e ba ke babyor ni ke kakrom ndaki puluw ngodad e ngiyal’ ney.

Ere, mang fan ni nge fanay be’ ba ken e babyor ni ke kakrom ni nge pow’iy e ngiyal’ ney ni ke yoor ban’en nib beech ni bod e cellphone, nge computer, nge boch ban’en ni kan ngongliy ni kab fel’ ko pi n’en ni immoy kafram? Bin riyul’ riy e, ki yoor e website nge yu yang ko Internet ni kan tay boor e fonow ngay ni kab beech nge boch ban’en nrayog ni nge pow’iyey. Boor e girdi’ ni yad ma non u TV ni boor ban’en ni yad manang u murung’agen boch ban’en, nge boch e program ni kan ngongliy ni yima pag yaan u TV ni yima pi’ boch e fonow riy ni keb rok e piin ni yad ma fil murung’agen rogon ni ma lem e girdi’, nge piin ni boor ban’en ni manang u murung’agen rogon e par ko girdi’, nge boch e girdi’ ni yad ma yoloy yu ken e babyor. Ku boor e kantin ko babyor nib sug yu ken e babyor riy ni yima pi’ nchuway’ nrayog ni ngam beeg mag nang e n’en ni ngam rin’ nga reb e ban’en nge reb. Pi babyor ney e boor e salpiy ni ma yag riy.

Ere, mang fan ni ngan sap ko Bible ni ba ke babyor ni kan ngongliy ni ke chugur i gaman 2,000 e duw ni ke yan ni faanra bay e tiney e fonow ni kab beech nrayog ni nge ayuwegey? Gathi ba puluw e n’en ni ma yog e piin ndarur ted fan e Bible ni aram e faanra ngan fanay ba ken e babyor ni ke kakrom ni nge pow’iyey ma bod ni yibe fanay ba ke babyor ko chemistry ara computer ni ke kakrom? Bin riyul’ riy e, de puluw e re lem ney. Science nge pi n’en nib beech ni kan ngongliy ni bod e cellphone, nge computer e gubin ngiyal’ ni be thil, machane uw rogon e girdi’? Gur, gubin ngiyal’ ni be thil e n’en nib t’uf rorad, fa? Ka baadag e girdi’ ni nge yib fan e yafos rorad, mar pirieged e felfelan’ nge pagan’, me fel’ thilrad chon e tabinaw rorad, me yag boch e fager nib fel’ ngorad.

Yugu aram rogon ni ke kakrom e Bible, machane rayog ni nge ayuweg e girdi’ u gubin e pi n’ey nge ku boch ban’en. Ku be yog e Bible nre ke babyor ney e ke yib rok e En ni Ke Sunmiydad. Rayog ni nge pow’iydad u gubin ban’en ni gad ma rin’ u lan e yafos rodad, miki ayuwegdad ko pi magawon ni gad ma lemnag nib ga’ fan. (2 Timothy 3:16, 17) Maku reb e, bay e fonow riy ni gubin ngiyal’ nra yib angin ko girdi’! Be gaar e Bible: “Thin rok Got e ba fos.”​—Hebrews 4:12.

Gur, riyul’ e pi n’ey ni be yog e Bible? Gur, daki puluw e thin riy ngodad e ngiyal’ ney, fa kemus e re ke babyor ni bay e fonow riy nib manigil ma kub ga’ fan ngodad e ngiyal’ ney, mab fos e thin riy? Fan ni kan ngongliy e re ke Wulyang ko Damit ney e bochan ni nge ayuwegem ni ngam nang e fulweg ko gal deer ney. Ireray e ken nsom’on u yu ken e re babyor ney ni yira ngongliy ni yugu ba thil ko pi Wulyang ko Damit ni un ngongliy kafram.