Mini’ Got?

Boor e girdi’ ni yad ma yog nib mich Got u wan’rad. Machane faan ga ra fith ngak bagayad ko mini’ Got, mab thilthil rogon e fulweg ni yad ra pi’ ngom. Ya boch i yad e ma lemnag ni Got e reb e tapufthin nib kireb ya baadag ni nge gechignag e girdi’ ko kireb ni kar rin’ed. Ma boch i yad e ma lemnag ni ir ba Got ni ma t’ufegdad ma ma n’ag fan e kireb rodad ndemtrug ko mang e kad rin’ed. Ku bay boch i yad ni ma lemnag ni Got e ba palog rodad ma der ma lemnagdad. Ere bochan nib thilthil rogon ni ma lemnag e girdi’ ko mini’ Got, ma aram fan ni be lemnag e girdi’ ndabiyog ni ngad nanged ko ri ir mini’.

Gur, ba ga’ fan ni ngad nanged ko mini’ Got? Arrogon ba ga’ fan ya faan gad ra nang Got nib fel’ rogon, ma ra yibnag fan e yafos rodad. (Acts 17:26-28) Ma faanra chugur e tha’ u thilmew Got, ma ra gel e t’ufeg rok ngom ma ra ayuwegem. (James 4:8) Ma bin th’abi ga’ fan e, faanra yag e bin riyul’ e tamilangan’ ngom u murung’agen Got, ma ra yag e yafos ndariy n’umngin nap’an ngom.​—John 17:3.

Uw rogon ni ngam nang ko mini’ Got? Mu lemnag be’ nri ga manang, nsana reb e fager rom nib chugur e tha’ u thilmew. Uw rogon ni chugur e tha’ u thilmew? Sana kam guy rogon ni ngam nang fithingan nge rarogon nge tin baadag nge tin dabun nge tin ni ke rin’ nge tin ni be tanomnag ni nge rin’ nge ku boch ban’en. Ere bochan ni kam nang murung’agen facha’ ma aram e n’en ni ke chugurnagem ngak.

Ere ku taareb rogon nrayog ni ngad nanged murung’agen Got ni faan gad ra weliy e pi n’en ni baaray:

• MINI’ FITHINGAN GOT?

• UW RAROGON GOT?

• MANG E KE RIN’ GOT?

• MANG E BAYI RIN’ GOT?

• MANG ANGIN NRA YIB NGOM NI FAAN GA RA NANG KO MINI’ GOT?

Re ke magazine ney e kan ngongliy ni nge pi’ e fulweg ko pi deer ney nib puluw ko Bible. Pi article ni bay riy e gathi kemus nra ayuwegem ni ngam nang ko mini’ Got, ya ku rayog ni ngam nang rogon nra yib angin ngom ni faanra fel’ e tha’ u thilmew.