Ri Ga Manang e Chitamam nu Tharmiy, fa?

RI GA manang e chitamam nib fel’ rogon, fa? Faanra mu ilal u ba tabinaw nib fel’ ma sana ga ra lemnag nde puluw e biney e deer ngom. Sana ga ra fulweg ni nge lungum, ‘Arrogon ri gu manang!’ Ya oren e girdi’ e manang e tin ni baadag e chitamangin nge tin ni dabun nge n’en ni ma rin’ u nap’an nra buch ban’en nge rogon ni ma ayuweg e tabinaw rok.

Machane, sana bay ba ngiyal’ ni kam gin nga ban’en ni ke rin’ e chitamam nyugu ba thil. Bod ni, reb e pagel e sana manang e chitamangin ni be’ ni gathi ri ma non mab sumunguy nge ni mada’ ko ngiyal’ ni buch ban’en u tabinaw rorad. Ka chingiyal’ nem me guy rogon feni mudugil laniyan’ e chitamangin ni nge ayuweg e tabinaw rok.

Ma uw rogon e En ni Sunmiydad? Ke weliy e Bible murung’agen ni gaar: “Ya fithik’ Got e gadad be par riy ma gadad be mithmith riy ma gadad ba’ riy.” (Acts 17:28) Ba milfan e yafas rodad ngak Got; aram fan ni ir e Chitamangin urngin ban’en nib fas. (Isaiah 64:8) Faanra aram rogon ni ga be lemnag Got, mab fel’. Machane, ka boor ban’en nib fel’ ni gad ra fil u murung’agen nra yib angin miki yibnag e felfelan’ ngodad.

Runguy nge tayfan rom ngak e chitamam e ra yan u rogon ni ga manang rarogon. Ere ku arrogon Got, ra yoor ban’en nim nang u murung’agen ma aram e ra gel e chugur ko tha’ u thilmew. Ra ayuwegem u nap’an ni keb e skeng ngom nfaanra mu athamgil ngam nang rarogon nib fel’ rogon ma ga fil rogon ni ngam rin’ e tin nib m’agan’ ngay.

Ba miti mang Got e bin riyul’ e Got? Ga ra nang fel’ngin Got ma mang e ra rin’ ko lem rom? Ga ra nang rarogon Got ma bay ban’en ni ke milfan ngom ni ngam rin’, fa? Ga ra nang e fulweg ko pi deer ney ko bin migid e article.

[Blurb on page 3]

Rogon e lem rom ngak be’ e be yan u rogon feni ri ga manang faanem