Ngan Felfelan’ ko Chag ni Yima Tay u Taabang

1. Uw rogon ni ngad nanged boch e girdi’?

¹ Ga ma thamiy e t’ufeg nib gel ni bay u thilin e piin ni kar ognaged yad ngak Jehovah? (Mark 3:31-35) Ba ga’ e tayim nrayog ni nga i chag e girdi’ rok Got u m’on ngu tomren e muulung. Susun ni aram e ngiyal’ ni ngad chaggad ko girdi’ nib beech nge ku boch e girdi’ u lan e ulung. Faan gad ra weliy boch ban’en ni kad rin’ed u nap’an e machib nge ku boch ban’en nra pi’ e athamgil nga lanin’uy, ma aram e rayog ni ngad pied e athamgil nga lanin’dad.—1 Thess. 5:11, 15.

2. (a) Mang fan ni ma pining boch e walag e girdi’ rorad ni gathi yad e Mich ko abich ni gad ma tay? (b) Mang deer e susun ni ngad lemnaged?

² Ngan Chag ko Piin nib Fel’ e Ngongol Rorad: Dabiyog ni nge pigpig be’ ngak Got maku be chag ko piin nib kireb e ngongol rorad u pe’owchen Got. Be ginangey e Bible ni gaar: “Nchag ngak e girdi’ nib kireb me kireb pangiy nib fel’.” (1 Kor. 15:33) Boch e girdi’ u lan e ulung e yad ma pining e piin ni gathi yad e Pi Mich nge girdi’ rorad ndubrad e tin riyul’ ni ngar uned ko pi abich ni gad ma tay, ya yad be lemnag nra pi’ e athamgil nga lanin’rad ni ngar adaged e tin nriyul’. Machane, ba fel’ ni ngan rin’ e re n’ey mab puluw ko Bible, fa?

3. (a) Uw rogon ni ngad folgad ko fare thin ni bay ko 2 Korinth 6:14, 15? (b) Mang e ra buch ni faan gad ra un nga boch e abich ara mur ni ma tay e girdi’ nu fayleng?

³ Kan fonownagdad ni ngad kol ayuwgad ndab ud chaggad ko girdi’ nu fayleng nde mich Got u wan’rad. Mang fan ni dab ud chaggad ngak e piin ni yad ma un ko ngongol nu fayleng ma darur pigpiggad ngak Jehovah? (2 Kor. 6:14, 15) Boch e girdi’ ni dar gelgad ko tirok Got ban’en e yad ma chag ngak e piin ni yad ma lem ni bod e girdi’ nu fayleng ma darur gayed rogon ni ngaur chaggad ko piin Kristiano ni kar ilalgad ko tirok Got ban’en ma rayog ni ngar ayuweged yad nge gel e michan’ rorad. Darur lemnaged ni faan yad ra un ko abich ara mur ni ma tay e girdi’ nu fayleng ma rayog ni nge warnag e michan’ rorad.—Mu taarebrogonnag ko 2 Thessalonika 3:14, 15.

4. Ba miti mang girdi’ e susun ni ngaud chaggad ngorad?

⁴ Gubin e piin ni yad ba adag ni ngar folgad ko tin nriyul’ e susun ni ngaur chaggad ngak e piin ni yad ba yul’yul’ ngak Jehovah ma yad ra ayuwegrad ni ngar mon’oggad ko tirok Got ban’en. Pi fager rodad nge piin ni gad ma chag ngorad e rayog ni ngar suruyed lanin’dad ko tin nib fel’ fa tin nib kireb. Ere rib ga’ fan ni ngaud chaggad ngak e piin nib t’uf Jehovah rorad mab fel’ thilrad!