Ngan Tay Fan E Pi Muulung Ko Kristiano

“Nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad.”​—HEBREWS 10:24, 25.

1, 2. (a) Mang fan nib taw’ath ni ngan un ko muulung ko tin riyul’ e Kristiano? (b) Uw rogon ma bay Jesus ko pi muulung ko pi gachalpen?

NGAN un ko muulung ko Kristiano aram ba taw’ath, ndemtrug ko ba lich ko ragag fa bokum biyu’ e girdi’ ni ra un ngay ni yad ma liyor ku Jehovah, ya i yog Jesus ni gaar: “Gin nra gak l’agruw fa dalip ni’ ngay u fithingag, e aram e gu ba’ rorad ko gin’em”! (Matthew 18:20) Riyul’ ni nap’an ni yog Jesus e re n’em ma be weliy u morngaagen e piin ni be yog e thin u lan e ulung nge rogon ni ngar pithiged e magawon. (Matthew 18:15-19) Machane ku rayog ni ngan puluwnag e thin rok Jesus ko urngin e muulung ko Kristiano ni ma tabab ko meybil ma ma mus ko meybil u daken fithingan fa? Arrogon. Ya nap’an ni tay Jesus chilen ko pi gachalpen ni ngar pingeged e girdi’ ngar manged pi gachalpen, me yog ni gaar: “Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.”​—Matthew 28:20.

² Dariy e maruwar riy ni Somol Jesus Kristus ni ir Lolugen fare ulung ko Kristiano e ri be lemnag urngin e muulung ko pi gachalpen. Maku, rayog ni nge mich u wan’dad ni bay rorad u daken e kan ni thothup rok Got. (Acts 2:33; Revelation 5:6) Ku be lemnag Jehovah Got e pi muulung rodad. Ya fan e pi muulung ney e ngan n’uf Got “u fithik’ e piin ni kar muulunggad u taabang.” (Psalm 26:12) Gad ma micheg ni ba t’uf Got rodad u nap’an ni gad ma un ko pi muulung ko ulung.

3. Mang fan ni gad ma tay fan e pi muulung ko Kristiano?

³ Ka bay boch fan ni gad ma tay fan e pi muulung ko Kristiano. U m’on ni chuw Jesus Kristus u fayleng, me dugliy e pi gachalpen ni yad e “tapigpig nib yul’yul’ mab gonop” rok mi yad pi’ e ggan nib spiritual ko ngiyal’ nib puluw ko tabinaw rok. (Matthew 24:45) Reb e kanawo’ nib baga’ ni yibe duruw’iy e girdi’ ko ggan nib spritual e daken e pi muulung ko ulung nge pi muulung ni baga’ ni​—assembly nge convention. Fare Somol Jesus Kristus e ma pow’iy e tapigpig nib yul’yul’ rok ni ngar pied e thin nib baga’ fan u nap’an e pi muulung nem ni fan ko urngin e piin ni yad ba adag ni ngar magaygad nib fas u nap’an e tomur ko re m’ag nib kireb ney mi yad par nib fas u lan e fayleng rok Got nib biech mab mat’aw.

4. Mang “yalen” ni bay ko Bible ni bay e riya’ riy, ma mang e ra ayuwegdad ngad siyeged?

⁴ Ere bay e riya’ ko Kristiano nfaanra ra rin’ e n’en ni yog apostal Paul ni rin’ boch e girdi’ ni gaar: “Nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndabda paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e ke chugur.” (Hebrews 10:24, 25) Faanra gad ra fl’eg i lemnag e taw’ath nge angin ni yib ngodad ko pi muulung ko Kristiano ma ra ayuwegdad ngad yul’yul’gad ngay ma ngad ted tanggin e pi muulung nem.

Pi Muulung ni Ma Ubungey

5. (a) Susun uw rogon e thin ni gad ma yog u nap’an e muulung? (b) Mang fan ndabda tinna’gad ni ngad pininged e girdi’ ngar uned ko muulung?

⁵ Pi Kristiano e ma yibilay e kan ni thothup rok Jehovah ni nge ayuweg e pi muulung ko Kristiano, me ere ra be’ ma susun ni nge athamgil ni nge ngongol nib puluw ko fare kan ni thothup ma “dabra n’igined ni nge dabki yib fare kan ni thothup.” (Efesus 4:30, New World Translation.) Nap’an ni yoloy apostal Paul e pi thin nem ni kan thagthagnag, ma be weliy u morngaagen rogon ni ngan non nib puluw. Pi thin ni gad ma yog e susun ni gubin ngiyal’ ma “ma ubung e girdi’ ni aram e nge yog e tin nib fel’ ban’en ngak e piin ni be motoyil.” (Efesus 4:29) Ri baga’ fan e re n’em u nap’an e pi muulung ko Kristiano. U lan e babyor ni yoloy Paul ngak piyu Korinth, me weliy ni nap’an e pi muulung mab t’uf ni ngan ubungey, ma ngan pi’ e fonow, ma ngan pi’ e athamgil nga lanin’uy. (1 Korinth 14:5, 12, 19, 26, 31) Urngin e piin nra un ko muulung ni aram rogon e ra yib angin ngorad, nib muun ngay e piin ka fin ra uned ko muulung, ma sana yad ra lemnag ni gaar: “Rriyul’ ni ba’ Got romed u roy.” (1 Korinth 14:25) Ere susun ndabda tinna’gad ni ngad pininged e girdi’ ni ba adag e machib ni ngar uned ngodad ko muulung, ya aram e ra pay mi yad mon’og ko tirok Got ban’en.

6. Mang boch ban’en ni ra n’igin ni nge ubing e girdi’ ko muulung?

⁶ Urngin e piin ni ra pi’ e welthin fa interview fa demonstration u nap’an e muulung ko Kristiano e thingara tedan’rad ngay ni thin ni yad ma yog e ra ubungey ma ba puluw ko Thin Rok Got ni bay ko Bible. Susun ni ngad dogned e thin nib puluw, maku susun ni ngad weliyed e lem rodad nge laniyan’dad nib puluw ku Got nge Kristus u rogon rarogorow nib fel’. Faanra urngin e piin ni ra pi’ e welthin ko muulung e yad ra tiyan’rad ni ngar daged ‘wom’engin e kan ni thothup rok Got’ ni bod e falfalan’ nge gum’an’ nge michan’uy, ma aram e ran ubung urngin e girdi’.​—Galatia 5:22, 23.

7. Uw rogon nrayog ko urngin e girdi’ ni ma un ko muulung ni ngar gelnaged e ulung?

⁷ Yugu aram rogon ni ke mus ni buch uw e girdi’ e ra rin’ ban’en u nap’an e muulung, machane urngin e girdi’ e rayog ni ngar ubunged e ulung. Boor yay ni yima fith boch e deer me ere rayog ni ngar pied e fulweg. Aram e ngiyal’ ni rayog ni ngad tamilangnaged e michan’ rodad u fithik’ e yoor. (Roma 10:9) Susun ndabda mon’eged e lem rodad, ara ngad ufgad ko pi n’en ni kad rin’ed, ara ngad thibthibnaged e pi walagdad. Ya gathi ra taleg ni nge yib e kan ni thothup rok Got ngodad? Magawon u thilin be’ nge be’ e susun ni ngan pithig ni goo yow u fithik’ e t’ufeg. Be weliy e Bible ni gaar: “Um golgad ngomed, me bigimed me munguy ngak bigimed, mu um n’iged fan u wun’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.” (Efesus 4:32) Rib fel’ ni ngad folgad ko re fonow ney u nap’an e pi muulung ko Kristiano! Ar fan ni ma athamgil e girdi’ ni ngar bad ko muulung nib pay boch, mi yad par boch u tomren ni kan mu’. Ya aram e rayog ni ngan ayuweg e piin ni ka fin ra uned ngay, ya ba t’uf ni ngan ayuwegrad ngan fl’eg laniyan’rad. Ere urngin e Kristiano ni kar ognaged yad ku Got e bay ban’en nib mil fan ngorad ko pi muulung mi yad ubing e girdi’ ‘nge baga[yad] ma ngi i lemnag baga[yad], ma nge bagayad ma ngi i ayuweg baga[yad] ma be dag ngak nib t’uf rok ma be rin’ e tin nib fel’ ngak.’

Ngan Fl’eg Rogoy nib Fel’ Rogon

8. (a) Uw rogon ni ma pag boch e girdi’ farad ni ngar uned ko pi muulung? (b) Mang kanawo’ ni tay Jehovah ni ir e tachugol saf?

⁸ Sana ba mom ko boch e girdi’ ni ngar uned ko muulung ko Kristiano machane boch e girdi’ e mo’maw ma ri yad be pag farad. Susun, reb e matin ni Kristiano e thingari maruwel ni nge pi’ e tin nib t’uf ko tabinaw rok ma ma sul nga tabinaw ni kari magar. Ma aram e thingari lum me ayuweg e bitir rok ngar fl’eged rogorad ni fan ko muulung. Ma boch e Kristiano e thingara milekaggad nib n’uw e kanawo’ ni ngar uned ko muulung, ma boch e ba magawon ya ke pillibthir ara bm’ar. Dabi siy ni manang fan Jehovah Got rarogon ra reb e girdi’ ni be un ko muulung ni bod e en tachugol saf ni ma nang fan e pi saf rok ni ra bagayad ma tin nib t’uf rok. Be weliy e Bible ni gaar: “Bay i ayuweg fare ran’ i saf rok ni bod rogon be’ ni ma gafaliy e saf; bayi kunuy fapi pi fak e saf nga taabang, mi i fekrad ni ke uchumiyrad; pi chitiningrad e bay i pow’iyrad Somol nib saf’og.”​—Isaiah 40:11.

9, 10. Uw rogon nrayog ni nge yib angin ngodad e pi muulung?

⁹ Piin ni thingara paged farad nib gel ni ngar uned ko urngin e muulung e sana dariy e tayim rorad ni ngar filed e pi n’en ni ngan weliy u nap’an e muulung u m’on riy. Bay angin riy ni ngan fol ko schedule ko Bible reading ko Theocratic Ministry School u gubin e wik. Ku aram rogon nfaanra ran fl’eg rogoy ko pi muulung u m’on riy min fl’eg rogoy ko Watchtower Study nge Congregation Book Study. Faanra ran fil e babyor u m’on riy ma ngan lemnag boch e thin ko Bible ma piin ni boor pa’ u puluwrad e rayog ni ngar uned ko boch ban’en ni yibe fil ko Bible ni baga’ fan u nap’an e muulung.

¹⁰ Ma girdi’ ni ke puf rogorad boch e rayog ni nge yoor e tayim ni ngar ted ni ngar fl’eged rogorad ko pi muulung. Susun, rayog ni ngar fl’eged i gay boch e thin ko Bible ni ka nog ko babyor. Ma aram e rayog ko urngin e girdi’ ni ngar ted talprad ni nge yib angin ngorad e pi muulung mi yad ubing e ulung ko welthin rorad nge thin rorad. Piin piilal nge pi ministerial servant e ra tay e kanawo’ nib fel’ nfaanra yad ra pi’ e fulweg nib ngoch mab tamilang. Piin ni ma un ko muulung e ra tay fan e pi n’en ni pi’ Jehovah me ere yad ra siyeg i rin’ ban’en nib wagey u nap’an e muulung.​—1 Peter 5:3.

11. Mang fan nib t’uf ni ngad t’ared lanin’dad ni ngad fl’eged rogodad ko pi muulung?

¹¹ Sana kaygi yoor e tayim ni gad be n’ag ko pi n’en ni dabi ayuwegdad ko tirok Got ban’en. Faanra er rogon, ma ba t’uf ni ngad yaliyed gadad ma “dab[da] pired ni [gad] e balyang” u rogon ni gad ma fanay e tayim rodad. (Efesus 5:17) Susun ngad nameged ni ‘urngin yay nra mab e kanawo’ ngo[dad] ma nga[d] maruwelgad ngay’ ma dabda uned ko boch ban’en ndariy fan ma aram e rayog ni nge yoor e tayim ni gad ra fil e Bible ma gad fl’eg rogodad ko pi muulung, ma gad un ko machib. (Efesus 5:16) Gathi mom e re n’ey, ma ba t’uf ni ngam t’ar lanin’um. Piin fel’ yangaren ni ma fol ko re n’ey e yad be fl’eg rogorad nga m’on rorad ni ngar mon’oggad iyan. I yol Paul ngak Timothy ni be’ nib bitir ngak ni gaar: “Um rin’ e pi n’ey [fonow ni pi’ Paul ku Timothy]; ma ga tiyan’um ngay, nge yog ni guy e girdi’ ni gubin ni ga be mon’og iyan.”​—1 Timothy 4:15.

Girdi’ u Lan e Thin rok Got ni Ur Ted e Kanawo’

12. Mang kanawo’ nib fel’ ni tay e tabinaw rok Samuel?

¹² Mu lemnag e kanawo’ ni tay e tabinaw rok Samuel, ya gubin ngiyal’ ma ur uned ko pi muulung ni kan yarmiy ni fan ko piin ni ma liyor ku Got u nap’an ni immoy fare tabernacle u Shiloh. Ke mus ni goo piin pumoon e kan tay chilen ngorad ni ngar milekaggad ni ngar uned ko pi madenom. Machane Elkanah ni chitamangin Samuel e ke fek urngin e girdi’ ko tabinaw rok u gubin e duw u nap’an ni yan “ko binaw rok nga Shiloh ni nge ta’ fan [Jehovah] me meybil me pi’ e maligach ngak [Jehovah] ni Gubin ma Rayog Rok.” (1 Samuel 1:3-5) Binaw rok Samuel e Ramathaim-zophim, nib chugur ko dap’ e l’ay ko fare binaw ni ka nog Rentis ngay e chiney ni bay u “daken e ted u Efraim.” (1 Samuel 1:1) Ere sana 20 e mayal palogngin e milekag rorad, mab mo’maw ko ngiyal’ nem. Aram e n’en ni rin’ e tabinaw ku Elkanah “urngin e duw; nap’an ni yad ra yan ko naun rok [Jehovah].”​—1 Samuel 1:7.

13. Mang kanawo’ ni tay e pi Jew nib yul’yul’ u nap’an ni immoy Jesus u fayleng?

¹³ Ki ilal Jesus ko reb e tabinaw ni baga’. Gubin e duw ma i milekag e tabinaw rok 60 e mayal u Nazareth iyan nga le’luch ni ngar uned ko fare madenom ko Paluk’af u Jerusalem. Bay l’agruw e kanawo’ ni rayog ni nga ranod riy. Fa bin nib kiy e kanawo’ e ba ngolol nga but’ nga lan fare Loway ni Megiddo ma ma forthog nga lang ni 2,000 e fit iyan nga lan e binaw nu Samaria ma ma sor iyan nga Jerusalem. Un Jesus ko fa binem e kanawo’ u nap’an e yay ntomur ni ke yan nga Jerusalem ko 33 C.E. Ke yan nga pe’ening nga lan fare Loway ni Jordan nib sobut’ ko day nge yan ko “nug nu Judea me th’ab e lul’ ni Jordan.” (Mark 10:1) Ma aram ma kan taw ko fare “kanawo’ ni be yan nga Jerusalem” ni 20 e mayal palogngin, ma ma forthag e re kanawo’ nem nga lang ni 3,700 fit tolngin. (Mark 10:32) Gubin ngiyal’ ma boor e girdi’ nib yul’yul’ e ur milekaggad u Galilee nga Jerusalem. (Luke 2:44) Rib fel’ e kanawo’ ni ur ted ko pi tapigpig rok Jehovah ko ngiyal’ ney ni boor i yad e mmom ni ngar uned ko pi muulung ko Kristiano ni bochan ni bay boor mit e maaf nib fel’ ko ngiyal’ ney!

14, 15. (a) Mang kanawo’ ni tay Anna? (b) Mang e rayog ni ngad filed ko uw rogon e muulung u wan’ e piin nka fin ra uned ko muulung?

¹⁴ Ku reb e girdi’ ni i tay e kanawo’ nib fel’ e Anna ni be’ ni ppin ni 84 e duw rok me yim’ figirngin. Be weliy e Bible ni “der pag e tempel ni rran nge nep’.” (Luke 2:37) Miki runguy Anna yugu boch e girdi’. Nap’an ni guy fare tir ni Jesus min nog ngak ni ir fare Messiah, ma mang e ke rin’? Ke pining e magar ku Got “me weliy murung’agen fare tir ngak urngin e girdi’ ni yad be sonnag Got ni nge chuweg yu Jerusalem u pa’ e toogor rok.” (Luke 2:38) Rib fel’ e lem rok, ma fel’ ni nge folwok urngin e Kristiano rok!

¹⁵ Arrogon, susun ni ngad falfalan’gad ni ngad uned ko pi muulung ma aram ma bod Anna ma dabda paged e muulung. Aram rogon ko boor e girdi’ ni ka fin ra uned ko muulung. Ur bad u fithik’ e lumor nga lan e tamilang rok Got ni rib fel’, ma yad ba adag ni ngar filed urngin ban’en nrayog, ma boor i yad e ur weliyed fene fel’ e pi muulung ko Kristiano. Ma piin ni ur uned ko tin riyul’ nib n’uw nap’an faram e thingara ayuwgad riy ya ‘daki t’uf rorad e tin riyul’ ni bod rogon nib t’uf rorad ko som’on.’ (Revelation 2:4) Sana dabiyog ni nge un be’ ko muulung ni bochan e m’ar ara yugu boch e magawon. Machane dabda paged e chogow ara fafel ara chalban ni nge n’igin ndabda fl’eged rogodad ko muulung ara dabda pasiggad ngay ara dabkuda uned ngay.​—Luke 8:14.

Fa Bin Th’abi Fel’ e Kanawo’

16, 17. (a) Uw rogon u wan’ Jesus e pi muulung ko tirok Got ban’en? (b) Mang yalen nib fel’ ni susun ni nge fol urngin e Kristiano riy?

¹⁶ I tay Jesus e kanawo’ ni rib fel’ ko uw rogon ni ngan tay fan e muulung. Nap’an ni ke gaman 12 e duw rok, me dag nib t’uf rok tafen Got u Jerusalem. Gallabthir rok e da ur nanged e gin ni bay riy machane munmun min pirieg ni bay ko pi tamachib u lan fare tempel ni yad be weliy e Thin Rok Got. Ma nap’an ni yog e gallabthir rok ni kar rusgow me yog Jesus ngorow ni gaar: “Da mu nangew nthingar gub gu par nga naun rok e Chitamag?” (Luke 2:49) Me par Jesus u tan pa’row mar sulod nga Nazareth. Mu rom e ki dag riy nib t’uf rok e pi muulung ko liyor ya gubin ngiyal’ ma ke un ko muulung u lan e synagogue. Ere, nap’an ni ke tabab ko machib, ma be weliy e Bible ni gaar: “Me ere sul Jesus nga Nazareth ko gin ni ir e nchuguliy riy nge ilal, me chirofen ni sabbath me yan nga lan tafen e muulung ni bod ni ma rin’. Me sak’iy nga lang ni nge beeg fare babyor nib thothup.” Tomren ni poy me tamilangnag Jesus e thin ko Isaiah 61:1, 2 ma gubin e girdi’ ni immoy u rom e “rogned e sorok ngak, mi yad gin ko pi thin nem nib fel’ ni ke weliy ngorad.”​—Luke 4:16, 22.

¹⁷ Ku aram rogon e pi muulung ko Kristiano ko ngiyal’ ney. Tomren e tang nge meybil ma ran weliy boch e thin ko Bible (ara thin ko Bible ni bay ko boch e babyor). Kan tay chilen ko tin riyul’ e Kristiano ni ngar folwokgad ko n’en ni rin’ Jesus Kristus u gubin ngiyal’. Yad ba falfalan’ ni ngar uned ko pi muulung ko Kristiano u gubin ngiyal nrayog rorad.

Kanawo’ ni Tay Boch e Girdi’ ko Ngiyal’ Ney

18, 19. Mang boch e kanawo’ nib fel’ ni tay e pi walag u lan e pi binaw nib gafgow ni fan ko muulung, nge assembly, nge convention?

¹⁸ U boch e binaw nib gafgow e girdi’ riy ma boor e pi walagdad ni pumoon nge ppin e yad ma tay e kanawo’ nib fel’ ya yad ma tay fan e pi muulung ko Kristiano. U Mozambique ma be’ ni ir e district overseer, ni Orlando fithingan nge Amélia ni ppin rok e ur ranow u but’ ni 55 e mayal n’umngin u lan 45 e awa ni fan ni ngar unew ko reb e assembly. Nge mu’ ma thingara sulow ni ngar unew ko bin migid e assembly. Ke weliy Orlando ni gaar: “U wan’mow ma aram gathi ban’en ni baga’ fan nfaanra ran lemnag e n’en ni rin’ e pi walag ko ulung nu Bawa. Ya kar milekaggad 250 e mayal ni ka ranod u but’ u lan nel’ e rran ni fan ni ngar uned ko reb e assembly mar sulod ko binaw rorad, ma bagayad e reb e walag ni pumoon ni 60 e duw rok!”

¹⁹ Ma uw rogon ni yibe tay fan e pi muulung ko ulung u gubin e wik? Kashwashwa Njamba e ir reb e walag ni ppin nib pag 70 e duw rok. Ma par u Kaisososi ni reb e binaw nib achig ni dalip e mayal pal’afngin ko Kingdom Hall u Rundu, Namibia. Ma yan u but’ ni nel’ e mayal ni nge un ko muulung me sul nga tabinaw ma ma yan u fithik’ e gerger. Ma bay boch e girdi’ ni kan li’rad u daken e re kanawo’ nem, machane ka be un Kashwashwa ko muulung. Ma baga’ ni pi muulung nem e bay ko yugu mit e thin ni de nang fan. Ere mang angin ni ma yib ngak ni nge un ko muulung? Be gaar Kashwashwa: “Gu ma motoyil ko pi thin ko Bible ni ka nog ma gu ma guy rogon ni nggu nang ko mang e yibe weliy morngaagen.” Machane de nang e cha’ nem e yol, ere uw rogon ni rayog ni nge nang e thin ko Bible ni ka nog? Ke fulweg ni gaar: “Gu ma motoyil ko pi thin ko Bible ni ke mit ngog.” Ma u lan in e duw ma ke yoor e thin ko Bible ni ke mit ngak. Ma ma un ko skul ko yol ni ke yarmiy e ulung ni fan ni nge mon’og i fanay e Bible. Be gaar: “Rib t’uf rog e pi muulung. Ya gubin ngiyal’ ma bay ban’en nib biech ni ngan fil. Ma gu ba adag ni nggu chaggad e pi walag ni pumoon nge ppin. Yugu aram rogon ni dabiyog ni nggu non ngak boch i yad, machane gubin ngiyal’ ma yad ma yib ngog mi yad pining e magar ngog. Ma n’en nth’abi ga’ fan e gu manang ni gu be falfalan’nag gum’ercha’en Jehovah ni bochan ni gu ma un ko muulung.”

20. Mang fan ni thingar dabda paged e pi muulung ko Kristiano?

²⁰ Bod Kashwashwa, ma bay bokum milyon e girdi’ ni ma liyor ku Jehovah u ga’ngin e fayleng ni yad ma tay fan e pi muulung ko Kristiano. Be chugur iyan e fayleng rok Satan ko magothgoth, me ere dabiyog ni ngad paged e muulung. Ere ngad pared nib od ko tirok Got ban’en ma ngad daged ni gad ma tay fan e pi muulung, nge assembly nge convention. Aram e ra falfalan’nag gum’ercha’en Jehovah ma ra yib angin ngodad yad gad be un ko machib nib thothup ni ma pow’iyey iyan ko yafas ni manemus.​—Proverbs 27:11; Isaiah 48:17, 18; Mark 13:35-37.

Pi Deer ni Ngan Sul Nga Daken

◻ Mang fan nib taw’ath ni ngan un ko pi muulung ko Kristiano?

◻ Uw rogon ma rayog ko urngin e girdi’ ni ngar ubunged e ulung u nap’an e muulung?

◻ Mang kanawo’ nib fel’ ni tay Jesus Kristus?

◻ Mang e rayog ni ngad filed ko pi walagdad u lan e pi binaw nib gafgow?

[Kahol ko page 17]

Yad Ma Tay Fan e Pi Muulung u Gubin Wik

Bokum milyon e girdi’ e ma par u lan e pi mach nib gafgow mab boor e bugel riy. Machane yug demtrug ma tin riyul’ e Kristiano ni bay u fithik’rad e yad ma tay fan e pi muulung ko Kristiano. Reb e piilal u reb e ulung ko piyu Soweto u Gauteng, Sourth Africa e ke gaar: “Bay 60 e girdi’ ko ulung romad ni yad e Pi Mich Rok Jehovah nge boch e piin ndawora uned ko taufe, ma baga’ ni sogonapan 70 nge mada’ ko 80 e girdi’ e ma un ko muulung romad, ma yu ngiyal’ ma ke yoor. Gathi rib n’uw e kanawo’ ko pi walagdad ni pumoon nge ppin ni ngar uned ko muulung, machane ba gel e magawon ko re binaw ney u Soweto. Kan rogoy ban’en nga keru’ reb e walag u nap’an ni be yan u but’ ko muulung. Ma l’agruw e walag ni ppin e kan guy rogon ni ngan kolrow ni ngan iring ban’en rorow. Machane dar talgad i un ko muulung. Gubin e Madenom u tomren ni kan meybil ko muulung, ma gamad ma yin’ boch e tang nib ngoch nap’an. Ma sogonapan 95 percent e girdi’ e ma par ni ngar ron’ed e pi tang ni ran fanay u nap’an e pi muulung ko bin migid e wik. Re n’ey e ma ayuweg e piin nka fin ra uned ko muulung ni ngar filed e pi tang mi yad un ngay.”

Piin ni ma par u arow e yad ba magawon ya ba n’uw e kanawo’ ni thingara milekaggad riy ni ngar uned ko pi muulung ndalip yay u gubin e wik. Bay ba wu’ i mabgol ni ka fin ra unew ko machib ma yow ma par nib palog gonapan mereb e mayal pal’afngin ko fare Kingdom Hall u Lobatse, Botswana. U reb e duw ma kar unew ko urngin e muulung ni yad l’agruw e bitir rorow. Maruwel rok figirngin fare tabinaw e mongongol sus ni nge ayuweg e tabinaw rok. Ma an leengin e ma pi’ nchuway’ boch e chugum ni ba achig ni nge yog boch a salpiy ngorad ni rayog ni ngar pied puluwon e yan ko muulung nge sul.

Reb e balayal’ ma ke yib e circuit overseer ko muulung, nge mu’ me yan e re tabinaw nem ko gin ni ma tal e bus riy, ma ke 9:00 nep’, ma dariy e bus. Ya ke tal urngin e bus u m’on riy ni bochan e ke kireb e yafang. Yib reb e polis me tal me fithrad ko mang e yad be rin’. Ma nap’an ni ke rung’ag e n’en ni ke buch ngorad, me runguyrad, ma aram me fekrad nga taferad ko karro rok ni mereb e mayal. Fa an leengin e reb e publisher ndawori un ko taufe, me gaar ko pumoon rok: “Am gu’, faanra gad ra mon’eg e muulung, ma ra ayuwegdad Jehovah.” Ma chiney ma ke yog figirngin ni ba adag ni nge un i wereg fare thin neb fel’.

[Sasing ko page 18]

Pi Mich Rok Jehovah ni bod e pi girdi’ ney u Romania e yad ma dag e kanawo’ nib fel’ ya yad ma tay fan e pi muulung ko Kristiano