GURUY NI 10
Uw Rogon Nrayog ni Nge Yib Angin e Muulung ko Pi Mich Rok Jehovah Ngom?
Bay ba ngiyal’ ni kan piningem nga reb e muulung ko Pi Mich Rok Jehovah, fa? Rayog ni ga be rus ni ngam un ko muulung ni faanra dariy bayay ni kam un. Sana ga be lemnag ko: ‘Mang e yima rin’ u nap’an e pi muulung ney? Mang nib ga’ fan? Ma mang fan nsusun e nggu un ngay?’ Ga ra fil ko re guruy ney rogon nrayog ni ngam chugur ngak Got ni faan gimed ra muulung yugu boch e girdi’ nga taabang nge rogon nra yib angin ngom.
1. Mang fan ni ma muulung e Pi Mich Rok Jehovah nga taabang?
Mu tay fanam i yan u rogon ni weliy be’ ni yoloy reb e babyor u Bible e bin th’abi ga’ i fan ni ngam muulunggad yugu boch e girdi’ nga taabang ni gaar: “Gu pining e sorok ngak Somol u lan e ulung ko girdi’ rok.” (Psalm 26:12, BT) Ku arrogon e Pi Mich Rok Jehovah nrib gel e felfelan’ ni yad ma tay u nap’an ni yad ra muulung nga taabang. Yad ma mada’ nga taabang u gubin e wik u ga’ngin yang e fayleng ni ngar pininged e sorok ngak Got, mi yad tang, mu kur meybilgad ngak. Ku bay in yay u gubin e duw ni yad ma tay boch e muulung nib ga’ ni fan ko liyor rorad.
2. Mang e ga ra fil u nap’an e muulung romad?
Yima weliy fan e Thin rok Got u nap’an e muulung ni ngan nang fan. (Mu beeg e Nehemiah 8:8.) Ga ra un ko muulung, ma ga ra fil murung’agen Jehovah nge pi fel’ngin nrib manigil. Ra yoor ban’en nim nang u murung’agen e t’ufeg rok ngom, ma aram e ga ra chugur ngak. Ku ram nang rogon nrayog ni nge ayuwegem ni nge yib fan e yafos rom.—Isaiah 48:17, 18.
3. Ga ra mada’nag boch e girdi’ u nap’an e muulung romad, ma uw rogon nra yib angin ngom?
Ke tay Jehovah chilen ngodad ni “nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad.” (Hebrews 10:24, 25) Gimed ra mada’ boch e girdi’ u nap’an e muulung romad nriyul’ ni yad ma lemnaged yad, ma yad baadag ni ngkur filed boch ban’en u murung’agen Got ni bod gur. Ga ra rung’ag boch ban’en ni yad ra weliy ni ke yib ko Bible nra pi’ e athamgil nga lanin’uy. (Mu beeg e Roma 1:11, 12.) Ku rayog ni ngam non ngak e piin muchugbil nge piin mabgol ni yad be par ni yad ba felfelan’ ni yugu aram rogon nrayog ni yad be mada’nag e magawon. Ireray boch i fan ni baadag Jehovah ni ngaud mada’gad nga taabang ni gubin ngiyal’!
KUM FIL BOCH BAN’EN U MURUNG’AGEN
Mu fil murung’agen e n’en yima rin’ u nap’an e muulung ni ma tay e Pi Mich Rok Jehovah nge fan nib fel’ ni ngad guyed rogon ni ngad uned ko pi muulung ney.
4. Muulung ko Pi Mich Rok Jehovah
Nap’an e bin som’on e chibog, ma i muulung e pi Kristiano nga taabang ni gubin ngiyal’ ni ngar liyorgad ngak Jehovah. (Roma 16:3-5) Mu beegew e Kolose 3:16, mi gimew weliy e fulweg ko re deer ni baaray:
Uw rogon ni i liyor e tin som’on e Kristiano ngak Jehovah?
Ku arrogon e Pi Mich e ngiyal’ ney ni ku yad ma mada’ nga taabang ni gubin ngiyal’ u tagil’ e liyor rorad. Mu yaliyew e re VIDEO ney ni be dag rogon e muulung ni yad ma tay. Tomuren mi gimew yaliy fare sasing ni yaan e muulung ni yibe tay, mi gimew weliy e fulweg ko gal deer ni baaray.
Mang boch ban’en ni kam guy ni taareb rogon ko n’en yima rin’ u Tagil’ e Liyor nge n’en kam beeg ko Kolose 3:16?
Ka bay ban’en ni kam guy ko fare video ara fare sasing ni ga baadag u rogon e muulung ni yima tay, fa?
Mu beegew e 2 Korinth 9:7, mi gimew weliy e fulweg ko re deer ni baaray:
Mang fan ndariy puluwon e muulung ni ma tay e Pi Mich Rok Jehovah?
Mu yaliyew e en be fil e Bible ngom e n’en yira weliy u nap’an reb e muulung ni yira tay u lan e re wik ney.
Gin ngan ko re muulung ney e ga be lemnag ni ga ra adag ni ngam motoyil ngay ara ga be lemnag nra yib angin ngom?
Baaray murung’agen ban’en
Ga ra yan ko jw.org, ma rayog ni ngam pirieg e gin yima tay e muulung riy u ga’ngin yang e fayleng nge ngiyal’ ni yima tay e pi muulung ney.
Yima pi’ e welthin u nap’an e muulung romad, ma yima dag rogon ni ngan rin’ boch ban’en, ma yima yaliy boch e video. Yima tang min meybil u m’on ngu tomuren e muulung
Bay yu ngiyal’ nra taw ngay ma rayog ni nge yog e girdi’ boch ban’en
Urngin e girdi’ nrayog ni ngar uned nib muun ngay chon e tabinaw, piin muchugbil, piin pilibthir, nge piin bitir
Dariy puluwon e muulung romad. Pi Mich Rok Jehovah e darur ninged e salpiy ngak e piin yad ma un ko muulung
5. Ba t’uf ni ngan athamgil ya nge yag ni ngan un ko muulung
Am lemnag e n’en ni i rin’ chon e tabinaw rok Jesus. Gubin e duw nthingar ranod u but’ u lan in e rran u Nazareth ngar mada’gad nga Jerusalem ni ngar uned nga reb e madnom ni yad be milekag u bangi ban’en ni boor e burey riy. Mu beegew e Luke 2:39-42, mi gimew weliy e fulweg ko pi deer ni baaray:
Ga be lemnag mab mom e re milekag ney ni yad ma tay, fa?
Mang fan nrayog nib t’uf ni ngarim athamgil ya nge yag ni ngam un ko muulung?
Ga be lemnag nib fel’ ni ngam rin’ e re n’ey ni yugu aram rogon nib mo’maw’, fa? Mang fan?
Be yog e Bible nrib ga’ fan ni ngaun mada’ nga taabang ni ngan liyor ngak Jehovah. Mu beegew e Hebrews 10:24, 25, mi gimew weliy e fulweg ko re deer ni baaray:
Mang fan nsusun e ngaud uned ko muulung ni gubin ngiyal’?
MA GAAR BOCH E GIRDI’: “De t’uf ni ngam mada’gad boch e girdi’ nga taabang, ya ba gaman ni ngam fil e Bible rom u tabinaw.”
Mang reb e thin nu Bible ara ban’en ni be weliy e Bible murung’agen ni be tamilangnag e n’en baadag Jehovah?
N’EN KAN FIL
Ga ra un ko muulung ma ra ayuwegem ni ngkum fil boch ban’en u murung’agen Jehovah, me chugur e tha’ u thilmew, mu kum liyorgad boch e girdi’ ngak u taabang.
Ngan Sul u Daken
Mang fan ni be pi’ Jehovah e athamgil nga lanin’dad ni ngaud mada’gad nga taabang?
Mang e ga ra fil u nap’an e muulung ko Pi Mich Rok Jehovah?
Ka bay reb e kanawo’ ni ga be lemnag nrayog ni nge ayuwegem e muulung riy, fa?
MU GAY MURUNG’AGEN
Uw rogon ni faanra ga be magagawon ni ngam un ko muulung? Mu guy rogon ni yag ni nge adag be’ nib pumoon e muulung ni aray rogon e lem rok.
Mu guy rogon ni adag be’ nib pagel e muulung nge n’en ni rin’ ya nge dabi pag e muulung.
Mu fil ko uw rogon u wan’ boch e girdi’ e muulung ni yad ma un ngay.
“Why Attend Meetings at the Kingdom Hall?” (Article ni bay ko website)
Mu fil rogon ni thil e yafos rok be’ nib pumoon ni i un nga barba’ i girdi’ nib kireb kafram u tomuren ni un nga reb e muulung ko Pi Mich Rok Jehovah.
“I Never Went Anywhere Without My Gun” (The Watchtower, July 1, 2014)