Uw Rogon Ni Be Pow’iydad Jehovah
“Ngam pow’iyeg ni nggu wan ko kanawo’ nib mat’aw.”—PSALM 27:11, New World Translation.
1, 2. (a) Uw rogon ni be pow’iy Jehovah girdien e chiney? (b) Mang e ba l’ag ko pi n’en nra fel’ rogoy riy ko pi muulung?
KADA filed ko fare article ni Jehovah e Ir i Yib Rok fare tamilang ko thin nriyul’. Thin rok e ra pi’ e tamilang ngodad ko ngiyal’ ni gad be yan ko kanawo’ nib mat’aw. Be fil Jehovah ngodad murung’agen e kanawo’ rok ma aram e kanawo’ ni ma pow’iydad. (Psalm 119:105) Taabrogon ko fare psalmist kakrom, ni ngad folgad ko kanawo’ ni be pow’iy Got ma ngad meybilgad ni ngad gaargad: “Jehovah mu fil ngog e kanawo’ rom ma ga pow’iyeg ko kanawo’ nib mat’aw.”—Psalm 27:11, NW.
2 Reb e kanawo’ ni ma skulnag Jehovah e girdi’ riy e chiney e daken e pi muulung ko Kristiano. Ri gad be tay fan e re yaram ney ni kan pi’ ngodad u fithik’ e t’ufeg ni (1) gad ma un ngay ni gubin ngiyal’, ma (2) gad ma motoyil ko program riy nib fel’ rogon, ma (3) gad ma un ko welthin ara bang ni bat’uf ni nge un e pi tayengeg ngay u fithik’ e pasig? Ku reb, gad be falfalan’ ni ngad folgad ko boch e fonow ni kan pi’ ngodad ni be ayuwegdad ni ngad pired “u lan fare kanawo’ nib mat’aw”?
Urogon ni Ga Ma Un ko Muulung?
3. Uw rogon ni rin’ fare pioneer ma kari mecham ni nge un ko muulung u gubin ngiyal’?
3 Boch e publisher e yad ma un ko muulung u gubin ngiyal’ ni ka nap’an ni ka yad ba bbitir. Bay ban’en ni ke yib nga laniyan’ reb e Mich rok Jehovah ni pioneer ni gaar, “Nap’an ni gamad be ilal iyan e pi walageg ni ppin ko pi duw ni 1930” me ulul ngay ni gaaar, “ma de t’uf ni nggu fithed ngak e gallabthir romad ko gamad ra un ko muulung fa danga’. Ya ri gamad manang ni gamad ra un ko muulung nfaanra de m’ar bagamad. Ri der ma pag e tabinaw romad e muulung.” Bod rogon Anna ni reb e profet, ma re walag ney e “der ma pag e muulung” ko gin ni yima pigpig ku Jehovah riy.—Luke 2:36, 37.
4-6. (a) Mang fan ni yu ngiyal’ e dabiyog ni nge un boch e publisher ko muulung? (b) Mang fan ni baga’ fan ni ngan un ko pi muulung?
4 Gur bagayad fa piin ni ma un ko muulung ko Kristiano u gubin ngiyal’, fa yu ngiyal’ ma damur ta’ fan e re n’ey? Boch e Kristiano ni kar lemnaged ni ffel’ e n’en ni kar rin’ed e yad ma dugliy ni ngar yaliyed yad ni ngar nanged ko uwrarogorad. U lan in e wik, ma kar yoloyed nga but’ urngin yay ni kar uned ko muulung. Nap’an ni kar sulod nga daken fare babyor ko ngiyal’ ni ke taw nga tungun ni kan dugliy, ma kar gingad ya boch e muulung e dar uned ngay.
5 ‘Dabni gin ngay,’ ni ra gaar boch e girdi’. ‘Ngiyal’ n’ey e boor ban’en ni ma tomalnag laniyan’ e girdi’ arfan nib mo’maw’ ni ngara uned ko pi muulung u gubin ngiyal’.’ Ri ba riyul’ ni gad be par ko tayim ni boor ban’en ni ma k’aring e kireban. Maku, dariy e maruwar riy ni ra gel iyan e magawon. (2 Timothy 3:13) Machane gathi ri bat’uf ni ngad uned ko muulung u gubin ngiyal’ ni yugu aray rogon e pi magawon ney? Faanra dabda ked e ggan ni spiritual nib fel’ u gubin ngiyal’ ni nge pi’ gelngidad, ma dabiyog ni ngad gelgad ko pi magawon ni be fek e re m’ag nib kireb ney i yib ngodad. Riyul’, ni faanra dabda chaggad ko pi walagdad u gubin ngiyal’ ma rayog ni nge war lanin’dad ngad paged “fare kanawo’ ko piin nib mat’aw” ni polo’! (Proverbs 4:18) Riyul’, nap’an ni kad tawgad nga tafedad tomren ni kad uned ko maruwel nib gel, ma sana kad dabuyed ni ngad uned ko muulung. Machane, faan gad ra un ko muulung ni yugu aram rogon ni kada magargad, ma ra yib angin ngodad ma gad be pi’ e athamgil nga laniyan’ e pi walag u Kingdom Hall.
6 Hebrews 10:25 e be weliy boch ban’en ni be dag ko mang fan ni thingarda uned ko muulung u gubin ngiyal’. Be fanownag Paul ni apostal e pi Kristiano ni pi walagen ni ngar muulunggad u taabang ni ‘ngari gel ni fan e yad be guy ni Chirofen ni bay yib Somol riy e be chugur.’ Arrogon, thingar dabda paged talin ni “fare rran rok Jehovah” e ke chugur. (2 Peter 3:12) Faan gad ra lemnag ni kab n’uw nap’an e tomur ko re m’ag n’ey, ma sana gad ra pag ni nge par nib m’on ko yafas rodad e tin ni baadag e dowef rodad ma gathi fare maruwel ni tirok Got, ni bod ni ngan un ko muulung. Ngemu’, rogon ni ke ginangey Jesus, e gaar, ‘ya richey mi gadad da’da’ ko re Rran nem ni ke taw ngodad.’—Luke 21:34.
Ngam Motoyil nib Fel’ Rogon
7. Mang fan ni ri baga’ fan ni nge tiyan’ e pi bitir u nap’an e muulung?
7 Dawori gaman ni faanra ke mus ni ngan un ko pi muulung. Thingarda motoyilgad nib fel’ rogon, ma ngada tiyan’dad ko n’en ni yibe weliy u rom. (Proverbs 7:24) Ma ba muun ngay e pi bitir rodad. Nap’an ni nge yan reb e bitir ko skul, ma yibe athapeg ni nge motoyil ko sensey rok, yugu aram rogon ni dabun e n’en ni be weliy e sensey rok ara n’en nib mo’maw’ ni nge nang fan. Manang fare sensey ni faan ra be guy rogon fare tir ni nge motoyil, ma rayog ni nge nang fan ma ra yib angin ngak fapi n’en ni kan fil. Ere, gathi fel’ ni piin bitir ni ka yad ma un ko skul ni ngar motoyilgad ko pi welthin ni yima pi’ u nap’an e muulung ma dabni pagrad ni ngar molod ko ngiyal’ ni ke tabab fare muulung? Riyul’, ni boch ban’en ko thin nriyul’ ni baga’ fan ni bay u lan e Thin rok Got e “boch ban’en nib mo’maw’ ni ngan nang fan.” (2 Peter 3:16) Machane dabda lemnaged ni n’en ni rayog ni nang e bitir fan e kaygi buchuw ma dariy fan. Got e gathi aram rogon. U nap’an e Bible, i motochiyelnag Got ngak e pi tapigpig rok ni ka yad ba pagal ni ngar ‘motoyilgad ni ngar nanged fan ni nge yib madgun Jehovah ngorad ma yad fol ko urngin e thin ko pi motochiyel rok ney,’ ma dariy e maruwar riy ni bay boch ban’en riy ni ra mo’maw’ ko pi bitir ni ngar nanged fan. (Deuteronomy 31:12; compare Leviticus 18:1-30.) Gathi aram rogon e n’en ni baadag Jehovah ni nge rin’ e pi bitir ko ngiyal n’ey?
8. Mang boch ban’en ni ma rin’ e pi gallabthir ni ngar ayuweged e pi bitir rorad ni ngar tiyan’rad ko pi muulung?
8 Pi llabthir ni Kristiano e yad manang ni rayog ni nge ayuweg e pi bitir rorad e tin ni kar filed ko pi muulung ko tirok Got ban’en. Arfan, ni boch e llabthir e kar yarmiyed ni nge toffan boch e pi bitir rorad u m’on ni nge tabab e pi muulung ma ra bad nga Kingdom Hall nib fel’ e lem rorad ma papay ni nge mit ban’en nga lolugrad. Bay boch e gallabthir ni kar ted chilen ngak e pi bitir rorad nib gel ma kan lichnag ara kan chuweg e tayim ni ngar yaliyed e television ko rofen ni bay e muulung. (Ephesians 5:15, 16) Ma ke buchuw e magawon ko pi llabthir nem ko motoyil u nap’an e muulung, ma yad be ayuweg e pi bitir rorad ni ngar motoyilgad nge ngar filed ban’en, ni ma tor nga daken yangarrad nge salap rorad.—Proverbs 8:32.
9. Mang e ra ayuwegdad ni ngad salapgad ko motoyil?
9 I non Jesus ngak e piin ni kar ilalgad ko ngiyal’ ni ke gaar: “Ere mu tedan’med nga rogon e motoyil ni gimed be tay.” (Luke 8:18) Ngiyal’ ney, ma kab mom ni ngan nog e re n’ey ko bin ni ngan rin’. Riyul’ ni ngan motoyil nib fel’ rogon e aram e maruwel nib mo’maw’, machane rayog ni nge maruweliy be’ ni nge salap ko motoyil. Nap’an ni ga be motoyil ko reb e welthin ara ban’en ni ir bang ko muulung, mu guy rogon ni ngam kieg ara mu chaariy e pi kenggin ko tin ni kan weliy. Ngam sonnag ko mang e bin migid ni nge weliy fa en ni be pi’ e welthin. Ngam gay boch ban’en ni rayog ni ngam fanay ko machib ara pi n’en nib t’uf rom. Ngam sul ngam lemnag boch ban’en nib fel’ ko ngiyal’ ni yibe weliy e pi n’en ney. Ngam yoloy nga babyor boch ban’en nib ngoch.
10, 11. Uw rogon ni ke ayuweg boch e gallabthir e pi bitir rorad ni ngar salapgad ko motoyil, ma mang boch e kanawo’ ni kam pirieg nra ayuwegey?
10 Ffel’ e motoyil ni faan yira mecham ngay ni ka yab bitir. Boch e gallabthir e ma pi’ e athamgil nga laniyan’ e pi bitir rorad ni daworra uned ko skul ni ngar “yoloyed” boch ban’en u nap’an e muulung ni yugu aram rogon ni dawori cheg ko yol nge beeg. Yad ra ta’ e pow nga babyor rorad ko ngiyal’ ni kan nog ko welthin reb e thin nib mom ni bod “Jehovah,” nge “Jesus,” ara “Gil’ilungun”. Ereray kanawoen ni nge fil e pi bitir rogon ni ngar tiyan’rad ko n’en ni yibe yog ko gin ni yima pi’ e welthin riy.
11 Mus ko piin ni kar ilalgad boch, e yu ngiyal, ma bat’uf ni ngan pi’ e athamgil nga laniyan’rad ni ngar motoyilgad nib fel’ rogon. Reb e matam ni ke guy fak ni 11 e duw rok ni lem rok e ke sor nga bang u nap’an e muulung ko pi Kristiano ni convention, me pi’ reb e Bible ngak me yog ni nge gay e pi thin nu Bible ni be weliy fa en ni be pi’ e welthin. Fare matam, ni ku be yoloy boch ban’en nga babyor, e be sap ngak fak ni be kol fare Bible. Ma tomren e re n’em, me motoyil fare pagal ko program ko fare convention u fithik’ e pasig.
Mu Pag ni Ngan Rung’ag Lamam
12, 13. Mang fan ni baga’ fan ni ngan un ko tang u nap’an e muulung?
12 I yon’ David e tang ni gaar: “Jehovah, nggu liyeg tafen e meybil rom, ni ngam rung’ag lamag ni gu be pining e magar ngom.” (Psalm 26:6, 7) Pi Muulung ni ma ta’ e Pi Mich rok Jehovah e aram ngal’an nra yog ni nguu dogned e michan’ rodad ni baga’ lamdad. Reb e kanawo’ ni gad ra rin’ e re n’ey riy e aram e ngad tanggad u taabang u nap’an e muulung. Ereray bang ko liyor rodad ni baga’ fan, machane papay ni ngan dariyfannag.
13 Boch e bitir ni dar nanged e yol e ke mit ngorad e pi tang rodad ni tirok Got ni yima yin’ u nap’an e muulung rodad u gubin e wik. Yad be falfalan’ ni rayog ni ngar uned ko piin ni kar ilalgad ni nga ron’ed e tang u taabang. Machane, nap’an ni kar ilalgad boch, sana kar dubuyed ni ngar uned i yin’ fapi tang rodad ni fan ko Gil’ilungun Got. Boch ni kar ilalgad e be maruwaran’rad ni ngar ron’ed e tang u nap’an e pi muulung. Machane, ngan yin’ e tang ya ir bang ko liyor rodad, ni bod fare machib u mit e tabinaw i yan ni ir bang ko liyor rodad. (Ephesians 5:19) Gad ma rin’ e tin th’abi fel’ ni ngad pininged e sorok ngak Jehovah ko machib u mit e tabinaw iyan. Ere ku dabiyog ni ngad n’ufed Got u lamdad ni baga’—ko tang rodad ni yib u gum’ercha’dad—ni yug demtrug ko puluw ko ton fa danga’?—Hebrews 13:15.
14. Mang fan ni thingarda fal’eged rogodad u m’on ko pi n’en ni yira fil u nap’an e muulung?
14 Maku rayog ni ngada pininged e sorok ngak Got ni faan gad ra pi’ e fulweg ni ra pi’ e athamgil nga laniyan’uy u nap’an fare welthin nib t’uf ni nge un e girdi’ ngay. Ba t’uf ni ngan fal’eg rogoy. Bat’uf e tayim ni ngan fal’eg i lemnag fan fapi Thin rok Got nib toar. Paul ni apostal, ni ir e en ni ma fil e Thin rok Got u fithik’ e pasig, e i nang e re n’ey. Me yol ni gaar: “Ri ba ga’ e flaab rok Got! Ma rib toar e gonop rok nge llowan’!” (Romans 11:33) Gimed pi lolugen e tabinaw, ri baga’ fan ni ngam ayuweged be’ nge be’ ni girdien e tabinaw romed ni nge gay e gonop rok Got, ni kan dag e re n’ey ko Thin rok. Ngam dugliy e tayim u nap’an e fol Bible u tabinaw ni ngan weliy e tin nib toar fan ma ngam ayuweg e tabinaw rom ni ngar fal’eged rogorad ni fan ko muulung.
15. Mang boch e fonow nra ayuweg be’ ma aram rogon nrayog ni nge pi’ e fulweg u nap’an e pi muulung?
15 Faanra ga baadag ni ngam pi’ e fulweg u nap’an e muulung u gubin ngiyal’, ma mang fan ni dabmu maruweliy u m’on e pi n’en ni ga baadag ni ngamog? De t’uf ni ngan weliy boor ban’en. Ran bieg e thin nu Bible nib puluw u fithik’ e pagan’ ara ni weliy buchuw e thin ni kan mel’eg ni yib u gum’ercha’ey ma rib fel’. Boch e publisher e kar rogned ngak fa en ni ma ayuweg e fol Bible ni nge tay e pow nga reb e paragraph ya yad e som’on ni ngar pied’ e fulweg riy, ma ra aram rogon ma dabi maadab e tayim ni ke mab e kanawo’ ni nga rogned e michan’ rorad.
Fa En ni Dan Skulnag e Rayog ni Nge Mang Be’ nib Gonop
16, 17. Mang fonow ni ke pi’ reb e piilal ku reb e ministerial servant, ma mang fan ni ke yib angin ngak?
16 Nap’an e pi muulung ko Pi Mich rok Jehovah, ma yima puguran ngodad ni ngad bieged e Thin rok Got u gubin e rran. Ran fol ko re n’ey ma ma biechnag lanin’uy. Ku ra ayuwegdad ko ngiyal’ ni ngad turguyed ban’en, ku ra yal’uweg e kireb rodad, ra siyeg e togopuluw ko n’en ni ma wawliy lanin’dad, ma ra golnagdad biyay ko tirok Got ban’en ni faanra kada sorgad nga bang.—Psalm 19:7.
17 Piin piilal u lan e ulung nib salap e bay rogorad ni ngara pied boch e fonow ni kan fek ko Thin rok Got ni ra puluw ko magawon rodad. Ke mus ni tin ngad rin’ed e ngad “l’inged e re n’ey ngalang” ni aram e ngad gayed e fonow rorad ni kan fek u Bible. (Proverbs 20:5) Reb e rran ma reb e ministerial servant ni kab pagal mab pasig e ke fith ngak reb e piilal ko uw rogon ni nge ayuweg e ulung nib fel’ rogon. Ma ri manang fare piilal fare pagal, me pithig e Bible rok ko 1 Timothy 3:3, ni be weliy ni piin kan pi’ e maruwel ngorad ko ulung e susun be’ ni “ba munguy.” Me yog fare piilal ngak boch e kanawo’ u rogon ni nge dag ni ir be’ nib munguy ngak yugu boch e girdi’. Ke yib e damumuw ngak fare walag ni kab pagal ya kan fonownag nib gel, fa? Ri danga’! “Ke fanay fare piilal e Bible,” me yog ni gaar, “ere gu manang ni ke yib fare fanow rok Jehovah.” Me fol fare ministerial servant ko fonow ni kan pi’ ngak u fithik’ e falfalan’ ma ke mon’og.
18. (a) Mang e ke ayuweg ko reb e Kristiano ni kab pagal ni nge togopuluw ko tin ke wawliy laniyan’ u skul? (b) Mang thin u Bible e ra yib nga lanin’um u nap’an ni kam mada’nag e n’en ni be wawliy lanin’um?
18 Thin rok Got e ku rayog ni nge ayuweg e piin ni pagal ni nge “tayrad u urel ko tin ni ma ararnag e piin pagal.” (2 Timothy 2:22) Reb e Mich rok Jehovah ni kab pagal ma ka fini mu’ ko high school e ke yog rok ni nge togopuluw ko tin ni ma wawliyey ko pi duw ni baaram ni ka ma un ko skul ni bochan ni ma fal’eg i lemnag ma be fol ko thin u Bible. Gubin ngiyal’ ma ma lemnag fare fonow ni kan yoloy ko Proverbs 13:20 ni gaar: “Mpachegem ngak e piin ni ba gonop me yog e gonop ngom.” Ke yog rok, ni ke kol ayuwngin me mel’eg be’ ni nge mang fager rok ni ke mus ni piin ni ri ma tay fan kenggin e motochiyel ko Thin rok Got. Me weliy fan ni gaar: “Gathi gu be’ nib fel’ ni gub thil ko yugu boch e girdi’. Faanra manga kug un ko girdi’ nib kireb, ma gu baadag ni nge falfalan’ e pi fager rog ngog, ma rayog ni gu ra magawon.” Ku ke ayuweg e cha’ nem fare fonow ni ke yog Paul ko 2 Timothy 1:8 ke yoloy ni gaar: “Ere dabmu tamra’ ni nguum weliy murung’agen e Somol rodad, . . . Machane mu un ko gafgow ni fan ko fare Thin Nib Fel’ ni yib rok Got.” Ma ke puluw uwan’ e re fonow nem, mi i weliy e michan’ rok nib puluw ko thin nu Bible ngak e pi classmate rok ko ngiyal’ ni ra m’ag. Nap’an ni kan nog ngak ni nge yog ngak e pi classmate rok e report rok, me mel’eg reb e kenggin ni nge fanay ni nge machibnagrad u murung’agen Gil’ilungun Got u fithik’ e gonop.
19. Mang fan ni fare pagal e de yog rok ni nge togopuluw ko pi n’en u fayleng ni ke suruy laniyan’, machane mang e ke pi’ gelngin ke gel ko tirok Got?
19 Faanra kada sorgad nga bang nib palog ko “fare kanawo’ nib mat’aw,” ma ra ayuwegdad e Thin rok Got ni nge yaluweg rogon e yan rodad. (Proverbs 4:18) Reb e pagal ni ma par u Africa e ke nang e re n’ey. Nap’an ni ke yib e Mich rok Jehovah ni nge gu’, me adag ni ngar filew e Bible. Ma ke falfalan’ ko n’en ni ke fil machane de n’uw nap’an u tomren me chag ko piin nib kireb u skul. Ma munmun, me un ko ngongol ni darngal. Me gaar, “Be magawonnageg e nangan’ rog u gubin ngiyal’, ma sana nggu tal ko muulung,”. Boch nga tomren, me tabab ni nge un ko muulung biyay. Me yog fare pagal e tin ni ke tamilang uwan’ ban’en ni gaar: “Kug guy e chiney ni ke buch ngog e re n’em ni bochan ni ke yib e bilig ngog ko tirok Got. Daku gu fil ban’en ni go’ gag. Arfan ni dariy gelngig ni nggu togopuluw ko n’en ni ke wawliy lanin’ug. Ma kug tabab ni nggu beeg fare babyor ni The Watchtower nge Awake! Ma tomuren, ma ke yib gelngig biyay ma kug beechnag e yafas rog. Bochan ni kug thiliyeg e par rog ma ke yib angin e re n’ey ko girdi’ ni kar nanged e n’en ni kug rin’. Kan taufenageg, ma gu be falfalan’ e chiney.” Mang e ke gelnag e re pagal ney ni nge cham ko tin ni baadag e dowef rok? Ke sul gelngin biyay ko tirok Got ya ma fil e Bible u gubin ngiyal’ ni goo ir.
20. Uw rogon ni ra togopuluw be’ ni kab pagal ko cham rok Satan?
20 Piin ni Kristiano ni ka gimed ba pagal, yibe cham ngomed e chiney! Thingar mu ked fare ggan nib spiritual u gubin ngiyal’, ma aram e rayog ni ngam gelgad ko cham ni be tay Satan ngomed. Fare psalmist, ni sana kab pagal, e manang e re n’ey. I pining e magar ku Jehovah ya ke pi’ e Thin rok, ma ‘rayog ni nge biechnag reb e pagal e kanawo’ rok.’—Psalm 119:9.
Demtrug e Gin nra Pow’iydad Got Ngay, Ma Ngad Folgad Riy
21, 22. Mang fan ni thingar dab dogned ni kaygi mo’maw’ fare kanawo’ ko tin riyul’?
21 I fek Jehovah fare nam nu Israel ngar chuwgad u Egypt nga ranod ko fare Binaw ni kan Micheg. Fare kanawo’ ni ke mel’eg e be lemnag e girdi’ ni de fel’ e re n’em mab mo’maw’. De fekrad Got nga ranod ko kanawo’ ni ba mom, ya kab chuchugur e re n’em ni aram fare kanawo’ nib chuchugur ko Day ni Mediterranean, machane ke fek Jehovah girdien ko fare kanawo’ nib mo’maw’ ni yan u daken e ted. Machane, riyul’ ni be dag e re n’ey ni ke runguyrad Got. Kab chuchugur fare kanawo’ ni yan u l’ay, machane ra yan piyu Israel nga ram ma ngar th’abed fare binaw ko piyu Philistine ni yad e pi toogor rorad. Bochan ni ke mel’eg Jehovah yu pa’ e kanawo’ ni nga ranod riy e nge dabiyog ni nge cham piyu Philistine ngorad nib papay.
22 Taabrogon ko ngiyal’ n’ey, fare kanawo’ ni be pow’iydad Jehovah ngay e yu ngiyal’ ma gowa ba mo’maw’. Gubin e wik, ma boor e maruwel ni kan ta’ ni ngan rin’, ma ba muun ngay e pi muulung ko ulung rodad, nge ngan fil e Bible, nge machib u mit e tabinaw iyan. Yugu boch e kanawo’ e gowa ba mom. Machane ke mus nfaan gad ra fol u rogon ni be pow’iydad Got ma gad ra taw ko gin ni gad be nameg ni gad be maruweliy nib elmerin ni ngad tawgad ngay. Arfan, ni nguuda ululgad ni ngad filed e pi thin ni baga’ fan ni be pi’ Jehovah ngodad ma gad par ko “fare kanawo’ nib mat’aw” ni dariy n’umngin nap’an!—Psalm 27:11.
Rayog ni Ngam Weliy Fan?
• Mang fan ni ri bat’uf ni ngad uned ko muulung u gubin ngiyal’?
• Mang e rayog ni nge rin’ e pi gallabthir ni ngar ayuweged e pi bitir rorad ni ngar tiyan’rad u nap’an e muulung?
• Ran salap ko motoyil ma mang e ba l’ag ngay?
• Mang e ra ayuwegdad ma rayog ni ngad pied e fulweg u nap’an e muulung?
[Picture on page 14, 15]
Ngan un ko muulung e ra ayuwegdad ni nge par u lanin’dad fare rran rok Jehovah
[Pictures on page 16]
Ba thil thil e kanawo’ nge rogon ni ngan pining e sorok ngak Jehovah u nap’an e pi muulung ko piin Kristiano