Ma Pi’ Jehovah Gelngin ni Ir e ba Th’abi Gel

¹ Machib ni ma tay e pi Kristiano​—aram e pigpig nib taw’ath ko urngin pi gachalpen Jesus. (Matt. 24:14; 28:19, 20) Machane rayog ni ngad lemnaged ni dabiyog ni ngad rin’ed e re n’em nib fel’ rogon ya gathi gad ba flont maku pi magawon ko re m’ag ney e be diliiy lanin’dad.

² Faanra aram rogon ma ra fl’eg lanin’dad e pi thin ni yoloy apostal Paul ko pi Kristiano u Korinth. I yoloy ni gaar: “Machane gamad e piin ni ba’ romad e re n’ey nib fel’ ni pi’ fare Kan ni Thothup e gamad bod e rume’ ni but’.” (2 Kor. 4:7) I mudugilan’ Paul ni gaar: “Got e ke runguydad ke pi’ e re maruwel ney ngodad, aram fan nder mulan’dad.” (2 Kor. 4:1) Rriyul’, gad gubin ni girdien fachi ulung ara piin ni “yugu boch e saf,” ma mo’maw rodad ni nguuda wereged fare thin nib fel’ ma “der mulan’dad.” Ba t’uf rodad ni nge pi’ Got gelngidad, ya “re gelngin nem ni ir e ba th’abi gel e yib rok Got, ma gathi gadad e yib rodad.”​—John 10:16; 2 Kor. 4:7.

³ Boor e Pi Mich ma yad ba pasig i wereg fare thin nib fel’ ni yugu aram rogon ni yibe togopuluw ngorad ara yad ba m’ar, ara yad ba gafgow ko salpiy. Goo gad manang ni Jehovah e be tay tanggin e maruwel rodad ko machib. Dabda paged nge mulan’dad ara ngad rusgad ma nge war lanin’dad ko machib ya nguud “taab girdi’gad ngak Somol ngi i gelnagdad nga gelngin nrib gel.”​—Efe. 6:10; Prov. 24:10.

⁴ Rogon ni nge Yib Gelngin Got Ngodad: Ngam meybil ni gubin ngiyal’ ma ngam ning ni nge pi’ Got e ayuw ngom nge gelngin. (Rom. 12:12; Fil. 4:6, 7) Ma aram mu pagan’um ngak Jehovah ni ra pi’ gelngin ngom ni ir e ba th’abi gel. (Prov. 3:5) Ngam bieg e pi thin u lan e pi magazine rodad u murung’agen e girdi’ rodad ko ngiyal’ ney ya pi n’em e be micheg ni be ayuweg Jehovah e pi tapigpig rok ko ngiyal’ ney ni ngar k’adedan’rad u fithik’ e magawon. Ngam par nib chugur ko pi walag u lan e ulung, ma dabmu pag e pi muulung.​—Rom. 1:11, 12; Heb. 10:24, 25.

⁵ Ngada rin’ed urngin ban’en nrayog rodad ni nge yog gelngin Jehovah ngodad​—ni aram gelngin ni ir e ba th’abi gel ma ra ayuwegdad ndabda paged fare maruwel nth’abi ga’ fan ni aram e ngan wereg fare thin ko Gil’ilungun Got.