Ngam Pag Urngin Ban’en Ngam Par ni “Yigoo Thin Rok Got” e Ngam Machibnag
1 Nap’an ni gad ra bieg ni ke un apostal Paul ko maruwel ko mongongol tent ma sana gad ra lemnag ni de yog ni nge un ko machib ni boor. Machane be weliy ko Acts 18:5 ni gaar: “me pag Paul urngin ban’en me par ni yigoo thin rok Got e be machibnag ko girdi’, ma be weliy ngak piyu Israel ni Jesus e ir fare Messiah.” Mang fan ni par Paul ni yigoo maruwel ko machib ni be lemnag? Yugu demtrug ni boor e girdi’ nu Korinth e kar uned ko machib, machane ke yog Somol ni ka bay boor e girdi’ ko re mach nem nra mang pi gachalpen. (Acts 18:8-11) Ku aram fan ni ngad pared ni yigoo machib e gad be lemnag? Arrogon. Rayog ni ngan pirieg boor e girdi’ min fil e thin nriyul’ ngorad.
2 Nge Yoor e Tayim ni Ngam Un ko Machib: Dabi siy ni ga be nameg ni ngam par ni gubin e pul ni ga be machibnag fare thin nib fel’. Machane bay boch e pul ni rib fel’ ni ngad paged urngin ban’en ma “yigoo” maruwel rok Got ni ngad rin’ed. Reb e pul ni aram rogon e April ya aram e ngiyal’ ko Puguran. Rayog ni ngam un ko pioneer ni ayuw fa nge yoor e machib ni ngam tay ko ngiyal’ ni spring? Boor e publisher ni be rin’ e re n’ey e be yib e flaab ngorad. (2 Kor. 9:6) Faanra ga be rin’ urngin ban’en nrayog rom, ma dabmu pag talin ni ke felan’ Jehovah ko pigpig ni ga be tay u polo’ i lanin’um. (Luke 21:2-4) Demtrug salpem ma ngam nameg ni ngam pag urngin ban’en ma “yigoo” machib ni ngam lemnag. Ma dab mu pag talin ni ngam pi’ e report rom ko machib u tomren ra reb e pul ya rayog ni ngan theeg e athamgil ni kam tay ngan uneg ko report ko tin ni ka bay girdien Jehovah.
3 Ngam Guy e Tin Biech e Girdi’ ni Kar Uned ko Puguran: Fa binem e duw ma ke un 16,675,113 e girdi’ ko Puguran u ga’ngin e fayleng. Ka bay nga m’on ko urngin e girdi’ ni ra un ko re duw ney. Machane be dag ko pi report ni ka bay boor e girdi’ ni ngan “kunuy.” (Matt. 9:37, 38) Ere dabni sagaal ni ngan guy e piin ni kar uned ko Puguran min ayuwegrad ko tirok Got ban’en. Faanra ngan sagaal ma rayog ko ‘Faanem nib kireb nge lag e n’en ni kan wereg nga fithik’ i lanin’rad.’ (Matt. 13:19) Ga ra sul ngak be’ nib pay ma ga be dag ni rriyul’ ni “yigoo thin rok Got” e ga be lemnag.
4 Nguun Ayuweg e Piin ni Kar Talgad ko Machib: Faanra bay e piin ni kar talgad ko machib u lan e ulung ma ngan athamgil ni ngan ayuwegrad. Pi piilal e rayog ni ngar yarmiyed ni ngan guyrad. Pi piilal e ra turguy ko mang e be magawonnag be’ ma uw rogon ni ngan ayuweg ni nge sul ko pigpig ku Jehovah. Re ayuw ney u fithik’ e t’ufeg e be dag ni be lemnag e pi piilal ni mmil fan ngorad ni ngar gafaliyed e “ran’ i saf rok Got.” (1 Pet. 5:2; Acts 20:28) Fare babyor ni The Watchtower ko September 15, 1993, English language edition ko page 22-3, e be weliy boch e thin nrayog ni nge ayuweg e pi piilal ngar pithiged fa lal e n’en ni sana ir e n’en ni be magawonnag e piin ni kar talgad ko machib. Ma rib fel’ ni faanra ngan ayuweg be’ nge un ko machib u mit e tabinaw iyan biyay.
5 Ngan Ayuweg e Girdi’ Ngar Manged Unbaptized Publisher: Rayog ko bitir rom ni ngar manged publisher ko fare thin nib fel’? Ma uw rogon e pi Bible study rom? Faanra ke fel’ u wan’ e pi piilal ma gathi ereray e ngiyal’ nib fel’ ni ngar uned ko publisher? Bay e Bible study rom ni be mon’og iyan? Susun ni ngam nameg ni ngam ayuweg facha’ ni nge tamilang u wan’ fare thin nib fel’ ma nge un ko publisher ma nge ognag ir ngak Jehovah me un ko taufe ni ir e Mich rok Jehovah.—Efe. 3:17-19; 1 Tim. 1:12; 1 Pet. 3:21.
6 Ga ra ul’ul’ i ayuweg ma ngam lemnag e pi Bible study rom ma ra ayuwegrad ngar uned ko thin nriyul’. Bay reb e Mich ni ke mada’nag ba wu’ i mabgol ni yow ba pillibthir mar adagew ni ngar filew e Bible. Machane dalip e wik ma de yog ni nge un fagali mabgol ko study. Munmun, ma kan tababnag e study. Ma aram me tal fagali mabgol ko study reb e wik, ma bin migid ma yow ra study. Machane ke taw ko ngiyal’ ni ke mon’og fare ppin me un ko taufe. Ke weliy fare walag ni gaar: “Tomren ni ke taufe me yib e lu’ u owchen ya kari falfalan’, ma ki yib e lu’ u owchemow e ppin rog.” Arrogon, kan par ni “yigoo thin rok Got” ni yibe lemnag ma ke yib e falfalan’ riy!
7 Thin ko profet u lan e Bible e be tamilangnag ni gad be par ko ngiyal’ ni tin tomren e rran. Ereray e ngiyal’ nib t’uf ko urngin e girdi’ rok Got ni ngar pared ni “yigoo thin rok Got” ni yad be wereg ko girdi’. Be weliy apostal Paul ni “pigpig ni gad be tay ngak Somol e gathi ra yan i aw nib m’ay fan.”—1 Kor. 15:58.