Ngan Wereg e Thin Nga Gubin Yang u Fayleng u Murung’agen e District Convention ni “Mu Lek Kristus!”
Pi Publisher e ra Wereg e Handbill Biyay
1 Fa binem e duw ma ke yib angin e maruwel ni ngan tamilangnag u murung’agen e “Ke Chugur ni Ngan Chuwegey ko Gafgow!” District Convention. Piin ni kar feked fare pong mar bad ko assembly e kar guyed rogon e abich ko tirok Got ban’en ko Pi Mich Rok Jehovah. (Isa. 65:13) Kar falfalan’gad ya kar cheggad ba nga ulung i Kristiano ni bay e t’ufeg riy. (Ps. 133:1) Ra ngad ayuweged urngin e girdi’ nrayog rodad ni ngar uned ko fare “Mu Lek Kristus!” District Convention, ma gad ra un i wereg e special handbill u gubin yang u fayleng biyay.
2 Angin e Maruwel ko Fa Binem e Duw: Boor e report e ke yib u boor e nam u fayleng, ma ke dag ni ke yib angin e maruwel ni ngan tamilangnag u murung’agen e “Ke Chugur ni Ngan Chuwegey ko Gafgow!” District Convention. Ka nog boor e thin nib fel’ u boor e binaw u murung’agen e maruwel ni kan tay. U reb e mach, ke yoloy reb e simbung e thin ni nel e colunm riy u murung’agen e maruwel ni kan tay ni gaar: “Ra nge taw e thin ngak gubin e girdi’ ma ke maruwel e Pi Mich nib elmirin’—ni kar ted boor e awa ngay, ma ba palog ni kar ranod u but’, mar weliyed e thin nib papey.” Fare maruwel ni ngan wereg e handbill e ke pug e tafinay rok yugu reb e news media u yugu ba mach ni ke tamilangnag u murung’agen e maruwel ni kan tay. Dalip e simbung ni kar rogned e thin nib fel’ u murung’agen e maruwel u m’on ko fare convention. Reb e reporter e ke yoloy boch e thin ni pag l’agruw e page ko simbung ni kan wereg ko Madenom. Ke tamilangnag e pi n’en nib mich u wan’dad, me weliy murung’agen ba ulung i walag, nge fare maruwel ni ngan wereg e handbill, nge fare convention. Nap’an ni ke pi’ reb e publisher e handbill u reb e tabinaw, ma ke yog fare pin ni gaar: “Arrogon. Ka fin gu bieg u murung’agen u lan e simbung!” Me yog yugu be’ ni ke gaar: “Ka fin gu bieg u murung’agem, ma chiney ga bay u roy! Ir e ram e pong rog fa?” Ma aram me yog, “Ri aram ban’en nib fel’ ni be rin’ e Pi Mich Rok Jehovah.”
3 Kan guy boor e girdi’ ni kar bad ko fare convention ni bay fare pong u pa’rad. Boch i yad e kar bad u yugu reb e mach ni ngar uned ngay. Bochan e kad athamgilgad ni ngad pininged e girdi’ ni ngar uned ngay ma angin ni yib riy e ke yoor e girdi’ ni ke un ngay, ma reb e nam e ke mun 27 pasent ko convention ko fa binem e duw.
4 Maruwel ni Ngan Tay ko Pi Territory: Rayog ni ngam tabab i wereg e handbill dalip e wik u m’on ko convention rom. Susun ni ngan athamgil ni ngan wereg e pong u gubin e binaw ko ulung. Faanra boor e territory ni bay ko ulung, ma pi publisher e rayog ni ngar ted e pong u ba yang ndabiyog ni nge guy yugu girdi’ ko pi tabinaw ni de moy e girdi’ ko fa bin tomur e wik u m’on ko fare convention. Pi ulung e susun ni ngar guyed rogon ni ngar wereged urngin e pong ni kan pi’ ngorad mar wereged u gubin e territory nrayog rorad. Pi pionner ko ulung e rayog ni ngar fanayed e tin ni ka bay.
5 Thin ni Nga Nog: Rayog ni ngam mog e thin ni aray rogon: “Gamad be un ko reb e maruwel ni yibe tay u gubin yang u fayleng ni nggu wereged e re pong ney ko reb e muulung ni ba ga’ fan. Ba aray e pong rom. Fare pong e bay boch e thin riy nra weliy u murung’agen.” Faanra buchuw e thin ni ngad dogned ma ra yoor e tabinaw ni ngad wereged fare pong ngak. Machane, faanra fith e girdi’ boch e deer, ma rayog ni ngad ted e tayim ni ngad weliyed e fulweg. Faanra ba adag e girdi’ e machib, mu yoloy e thin nga but’ ma ga sul ngak.
6 Uw fene ga’ fan ni ngad athamgilgad ni ngad leked Kristus! (John 3:36) Fare district convention ni bay ni fl’eg nga m’on e ra ayuweg urngin e girdi’ ni kar uned ngay ni ngar rin’ed. Rayog ni ngad nanged ni bay yib angin biyay ni bochan e maruwel ni gad ra tay ni ngad tamilangnaged u murung’agen e “Mu Lek Kristus!” District Convention. Me ere, mu pasig iyan ni ngam pininged e girdi’ ni ngar uned ngay. Gamad be yibilay ni nge flaabnagem Jehovah ko pasig rom ko re maruwel ney ni yira tay u gubin yang u fayleng.