Mu Pi’ e Pong Ngorad

1. Wuin e ngad tababgad i pining e girdi’ ni ngar uned ko fare convention rodad?

¹ Faanra ga be fal’eg rogon reb e abich ni fan ngak girdien e tabinaw rom ara pi fager rom, nrib gel e maruwel ni kam tay riy, ma dabisiy ni ga ra felfelan’ u nap’an ni ga be piningrad ni ngar uned ko fare abich. Re n’ey e ku taareb rogon ko pi n’en ni kan yarmiy ni bay rogon ko tirok Got ban’en ni yira pi’ ni fan ngodad u nap’an e convention ni gad ra un ngay. Dalip e wik u m’on ni nge tabab fare convention rodad ma gad ra tabab i pining boch e girdi’ ni ngar uned ngodad ko re muulung ney. Ere, mang e ra ayuwegdad ni ngad rin’ed e re n’ey u fithik’ e pasig?

2. Mang e n’en nra ayuwegdad ni ngad athamgilgad u rogon nrayog ni ngad pininged e girdi’ ni ngar uned ko fare convention?

² Faan gad ra fal’eg i lemnag rogon angin ni ma yib ngodad u nap’an ni gad ma rung’ag e pi welthin ni yima pi’ u nap’an e pi convention ni ke ngongliy Jehovah ni fan ngodad, ma aram e n’en nra ayuwegdad ni ngad athamgilgad u rogon nrayog rodad ni ngad pininged e girdi’ ni ngar uned ko re convention ney. (Isa. 65:13, 14) Ma dab da paged talin ni compaign ni gad ma tay e bay angin ni ma yib ngodad. (Mu guy fare kahol ni kenggin e “Bay Angin Nra Yib.”) Piin ni kad pininged yad e dabisiy ni bay boch i yad nra un ngodad ko fare convention maku bay boch i yad ndabi un. Demtrug ko uw urngin e girdi’ ni yad ra un ko fare convention rodad, machane ra felfelan’ Jehovah ko athamgil ni gad ra tay, ma re n’ey e ra dag feni ri ma runguy e girdi’.—Ps. 145:3, 7; Rev. 22:17.

3. Uw rogon ni ngan wereg e pi invitation rodad?

³ Susun ni nge dugliy e piin piilal rogon ni ngad wereged e pi invitation rodad ngak e girdi’. Ma ngkur dugliyed ko gad ra tay e invitation ko pi tabinaw ndariy e girdi’ riy ara ngkud pied ngak e girdi’ u nap’an ni ngad machibgad u fithik’ e girdi’ ni yoor. Ma ra rofen ni sabado nge madnom ma gad ra wereg e pi magazine nge pi invitation u taabang. Tomuren fare compaign ma ri gad ra felfelan’ ni kad pininged e girdi’ u fithik’ e pasig ni ngar uned ngodad ko re muulung ney ni ke yarmiy Jehovah ni fan ngodad!

Bay Angin Nra Yib

Boch e duw kafram u nap’an ni un reb e walag nib pin i wereg e invitation u m’on ko reb e convention me lemnag ko ra yib angin e n’en ni yibe rin’ fa danga’. I lemnag ko, ‘Gur, ra un e girdi’ ni kan piningrad ko re convention romad ney?’ Rofen ni Sabado ni kakadbul me guy reb e pumoon nu Sikh ni be par u tooben ma aram me non ngak. Ma aram me tamilang u wan’ fare walag nib pin ni ke yib e re moon nem ko re muulung nem ni bochan e kan pi’ reb e invitation ngak. Mi ki fith fare moon boch e deer ngak fare walag nib pin ma ke yag rok ni nge tamilangnag e fulweg riy. Me yog e re moon nem nri baadag e pi n’en ni kan weliy u nap’an fare muulung maku baadag rogon e munmad nge rogon e ngongol ko pi girdi’ nem ni yad bay u rom. Maku rofen nem miki mada’nag fare walag ba wu’ i mabgol ni kar parew nga tooben miki non ngorow. Ka rognew ni kun pi’ bang fare invitation ngorow ma kar unew u bus ngaram ni ngar unew ko fare convention. Kar felfelan’gow ko pi welthin ni kar rung’agew ma aram e kar lemnagew ni yow baadag ni ngkur sulow ko Madnom. Fin aram e ke tamilang u wan’ fare walag nib pin nib ga’ fan fapi invitation ni gad ma wereg ko girdi’.
Nap’an reb e convention ma ba wu’ i mabgol ni yow ma un ko pioneer nra nonad ba wu’ i mabgol ni kar pilibthirgow. Me yog fa gal labthir ni aram e som’on ni kar unew ko re muulung nem. Me fith fa gal pioneer nra gaargow: “Mini’ e ke piningmew?” Mar fulwegew ni lungurow: “Nap’an ni kug sulow nga tabinaw romow mug piriegew reb e invitation u tan e mab romow.” Ra beegew fagi invitation mar yoloyew fare coupon ni bay u wuru’. Nap’an ni yibe abich ko misiw’ me pi’ boch e walag e ggan rorad ni nge kay fa wu’ i mabgol. Kari felfelan’ fa wu’ i mabgol ko n’en ni ke buch rorow e rorran nem, ma aram mar dugliyew ni ngkur sulow e bin migid e rran ni ngar unew ko muulung. Ere kan yarmiy ni nge yan reb e walag i guyrow nge fil e Bible ngorow.