Yira Tabab i Wereg e Invitation ko Puguran ko April 2

1. Wuin ni gad ra wereg e pi invitation ko Puguran ko biney e duw, mang nib ga’ fan e re n’ey?

¹ Gadad ra tabab i wereg e invitation ko Puguran ko yam’ ni tay Kristus ko April 2 nge mada’ ko April 17. Kafram e boor e girdi’ ni kar uned ko re madnom ney ni bochan e pi babyor ney ni kad wereged. Immoy bayay e Puguran ni dengwanag reb e ppin e branch ofis me gaar: “Ka fin gu sul nga tabinaw ma kug pirieg reb e invitation u langan e mab rog. Gu ba adag ni nggu un ko re madnom ney, machane dagnang ko mingiyal’ e ngan tabab.” Ma aram me weliy fare walag ngak e gin nrayog ni nge pirieg riy ko fare invitation. Me gaar fare ppin, “Nggu un ko re muulung ney e daba’ ni blayal’!”

2. Mang e rayog ni ngad weliyed u nap’an ni ngad wereged e pi invitation?

² Rogon ni Gad Ra Rin’: De yoor e tayim ni ngad wereged e pi yungi babyor ney u gubin yang. Ere ba fel’ ndabi yoor ban’en ni ngad weliyed. Rayog ni ngad gaargad: “Siro’. Gamad ba adag ni nggu pied e re invitation ney ngomed chon e tabinaw rom ni ngam bad ngam uned nga reb e madnom nib ga’ fan ni yima tay u gubin e duw. Re madnom ney e yira tay ko Madnom, April 17. [Mag pi’ fagi babyor ngak facha’.] Rofen ney e ba puluw ko rofen ni yim’ Jesus riy. Yira pi’ reb e welthin ni be weliy rogon nra yib angin ngodad fare biyul ni pi’ Jesus. Gi babyor ney e bay riy e tayim nge gin’en ni yira tay e re muulung ney riy.”

3. Uw rogon nrayog ni ngad pininged urngin e piin rayog?

³ Faanra ba ga’ yang e gin ni nge wereg e ulung e yungi babyor ney riy, ma rayog ni nge yog e piin piilal ni ngan tay e yungi babyor ney ko pi tabinaw ni demo’ be’ riy, machane ngan tay u bang nra yan be’ u kanawo’ ma dabi guy. Dab mu pagtalin ni ngam pining e pi return visit rom, nge girdi’ rom, nge piin ni gimed nga maruwel, nge piin ni gimed nga skul, nge yugu boch e girdi’ ni gimed manangmed. Nap’an ni yira wereg e yungi babyor ney ko weekend, ma rayog ni ngkun chagiy e magazine ngay. Rayog ni ngam un ko pioneer ni ayuw ko pul ni April mag un ko re maruwel ney nib gel e felfelan’ riy, fa?

4. Mang fan ni gad ba adag ni nge un e girdi’ ko Puguran?

⁴ Boor ban’en nra fil e piin ni ra un ko puguran. Yad ra rung’ag murung’agen fene gel e t’ufeg rok Jehovah ya ke pi’ fare biyul’. (John 3:16) Yad ra fil ko mang angin fare Gil’ilungun Got nra yib ngak e girdi’. (Isa. 65:21-23) Maku yira yog ko girdi’ ni rayog ni ngar nonad ko pi walag ni ngan ayuwegrad ko fol Bible ni faanra yad baadag. Gamad be meybil nra un e piin nib yul’yul’ u nap’an ni ran piningrad ko Puguran!