Yira Wereg Babyoren Fare Puguran u Ga’ngin Yang e Fayleng!
1. Mang reb e maruwel ni yugu ba thil ni yibe lemnag ni ngan rin’ u m’on ko Puguran?
1 “Um rin’ed e re n’ey ngi i pugurag ngomed.” (Luke 22:19) Pi tapigpig rok Jehovah nge piin ni yad baadag e machib e yad ra muulung nga taabang ko rofen ni March 30, 2010 ni ngar madnomnaged e Puguran ko yam’ ni tay Jesus ni ir e tay chilen ni ngan rin’. Yira wereg e babyor ko re Puguran ney u ga’ngin yang e fayleng ko March 13 nge mada’ ko March 30.
2. Uw rogon ni ngad wereged fare babyor ko puguran?
2 Rogon ni Ngan Rin’: Rayog ni ngam pi’ e gi babyor nem ngak e en ni kam mada’nag nge yaliy mag gaar ngak: “Ra yan i blayal’ ko March 30, ma bokum milyon e girdi’ u fayleng i yan ni yad ra muulung nga taabang ni ngar madnomnaged e puguran ko yam’ ni tay Jesus. Ere ku gub e daba’ ni nggu piningmed chon e tabinaw rom ni ngam uned ko re madnom nem. Ku rayog ni ngam pining e pi tafager rom.” Rayog ni ngam dag ngak e n’en ni tay Jesus chilen u Bible mu kum weliy ngak e ngiyal’ nge gin’en ni yira tay e re madnom nem riy. Machane, dab mu pagtalin ni kan dugliy n’umngin nap’an ni ngan wereg e pi babyor ney, ere ba fel’ ni nge dabi n’uw nap’am u reb e tabinaw.
3. Mini’ e rayog ni ngam pining?
3 Faanra ba ga’ yang e gin ni ma machib e ulung riy, ma rayog ni nge dugliy e piin ni piilal ni ngan tay e babyor ko tabinaw ndan moy riy. Maku rayog ni ngan pi’ e pi magazine nge fare babyoren e puguran u taabang ni faanra ba t’uf. Dab mu pagtalin ni ngam e pining e return visit rom, nge piin ni ga ma fil e Bible ngorad, nge girdi’ u tabon e maruwel rom, nge bitir u skul, nge girdi’ rom, nge buguli yoror rom, nge ku boch e girdi’ ni ga manang.
4. Faanra rriyul’ nib ga’ fan u wan’dad e t’ufeg ni ke dag Jehovah ko fare biyul ni pi’, ma ra k’aringdad ni ngad rin’ed e mang?
4 Mu Fal’eg Rogom ni Ngam Un ko Re Maruwel Ney: Nap’an nra chugur ko Puguran ma aram e ngiyal’ nib fel’ ni ngad yoornaged e tayim ni ngad ted ni fan ko machib. Rayog ni ngam yarmiy e tayim rom ni fan e ngam un ko auxiliary pioneer, fa? Bay e bitir rom ara piin ni ga be fil e Bible ngorad ni yad be mon’og i yan ko tirok Got ban’en, fa? Faanra bay, mag fith ngak e piin ni piilal ko rayog ni ngar uned ko publisher, fa. Faanra rriyul’ nib ga’ fan u wan’dad e t’ufeg ni ke dag Jehovah ko fare biyul ni ke pi’ ni fan ngodad ma ra k’aringdad ni ngad uned i pining e girdi’ ko re madnom ney, maku gad un ngay.—John 3:16.