Ngan Pining e Girdi’ Ngar Uned ko Puguran!
1. Ra tabab ko March 21, 2009 ma mang maruwel e ra tay e pi tamachib, ma mang fan?
1 Rofen ni aningeg fen e maruwel ko April 9, 2009, e ra muulung e tapigpig rok Jehovah u ga’ngin yang e fayleng ni ngar madnomnaged e n’en ni pi’ Jehovah ni nge dag gelngin e t’ufeg rok ngak e girdi’ nu fayleng. (Roma 5:6-8) Ri gad ba felfelan’ ngay ni ma un boor e girdi’ ko re madnom ney ni madnom ko yam’ ni tay Jesus. Ere, bay reb e babyor ni yira tabab i wereg u ga’ngin yang e fayleng ko March 21 ni fan e ngan pining e girdi’ ko re Puguran ney.
2. Mang e dab mu pagtalin u nap’an ni ga be pi fare babyor ni fan ko puguran?
2 Boch Ban’en Nthingar ni Lemnag: Ngan maruwel ko pi fanathin, nge deer nge thin nu Bible ni bay ko gi babyor ney nib fel’ rogon. Reb e rayog nim dag fare sasing ni bay u keru’ fa gi babyor mag gaar: “Gu baadag ni nggu piningem ni ngam un ngomad i madnomnag e puguran ko yam’ ni tay Jesus ko rofen ni Aningeg Fen e Maruwel ko April 9, 2009.” Ngemu’ mag weliy kenggin fare babyor ngak nge nge pi deer ni bay nga tanggin. Dab mu pagtalin ni nga mog ngak e en ni gimew be non ni demtrug be’ nrayog ni nge pining nge un ngak ko re muulung ney, ni bod chon e tabinaw rok nge ku boch e girdi’.
3. Mang e ngam rin’ u tomren ni kam pining be’ ni nge un ko Puguran?
3 Faanra ba ga’ yang e gin ni yima machib riy ma rayog ni nge yarmiy e piin piilal ni ngan tay e pi babyor ney ko pi naun ndariy be’ riy. Ma Sabado nge Madnom e rayog ni ngan pi’ e Wulyang Ntagil’ e Damit nge fare babyor ni fan ko puguran u taabang. Mu athamgil ni ngam pining e piin ni ga ma fil e Bible ngorad, girdi’ u skul rom, girdi’ u tabon e maruwel, piin buguli yoror rom, nge ku boch e girdi’. Fa binem e duw ni ke yan e pining reb e walag nib pin 30 e girdi’ u tabinaw rok, mi yig i sul nga i puguran e re muulung nem ngorad. Ma faani taw ko puguran ma 25 ko pi girdi’ nem e ra uned ma 4 i yad e ra uned ko fol Bible!
4. Mang boch ban’en ni ngan lemnag ni ka chiney, ma mang fan?
4 Mu Lemnag e N’en ni Ngam Rin’ ni Ka Chiney: Boor e tamachib nrayog ni ngar yoornag e tayim rorad ko machib ko pul ni March nge April. Faanra bay e bitir rom fa piin ni ga be fil e Bible ngorad ni yad be mon’og i yan, ma ereray e ngiyal’ nib fel’ ni ngar uned ko publisher. Ereray e ngiyal’ ni ngam fal’eg rogom ni ngam un i pining e girdi’ ngar uned i madnomnag e re Puguran ney ni be dag gelngin e t’ufeg rok Jehovah nge Jesus ngodad.—John 3:16; 15:13.