Angin ni Ke Yib ni Bochan e Babyor ni Kan Wereg
Dalip e wik u m’on ko convention rok e Pi Mich Rok Jehovah, ma yad ra wereg bayay e babyor ni yad be pining e girdi’ ko binaw rorad ni ngar uned ko re muulung nem. Bay fan e re n’ey nib fel’ ni yibe rin’. Ma piin ni yad ma un ko re muulung ney e yad baadag e pi welthin ni kan fek u Bible, nge boch e maruwel ni be rin’ e pi walag ni kan yarmiy nib fel’ rogon, nge rogon e ngongol nge taareban’ ni yad be dag. (Ps. 110:3; 133:1; Isa. 65:13, 14) Yugu aram rogon nriyul’ ni bay angin e pi babyor ni kad wereged ngak e girdi’ ni yad baadag e machib, machane gur, yad ra milekag nib palog ni ngar uned ko convention?
Tomuren fare district convention ko duw ni 2011, me yol be’ nib ppin nga reb e branch ofis ni be weliy ni ke pirieg reb e invitation u langan e mab rok. Ba ga’ ni ma mith u nap’an ni ma tugtuguy e Pi Mich Rok Jehovah e mab rok. Ke yoloy ni gaar: “Fel’ e tabinaw rog, ma pumoon rog e be’ nib manigil, ma kug lemnag nib gaman gubin ban’en ni bay rog ni nge yag ni nggu felfelan’. Machane bin riyul’ riy e dawor gu pirieg e felfelan’, ma dariy fan e yafas rog. Ere, kug dugliy ni nggu milekag ni 200 e mayel ya nge yag ni nggu un ko fare muulung ko Sabado.” Kari felfelan’ ni ke un ko fare muulung, ma aram me callnag e pumoon rok ni nge yog ngak ni ngki par nge un ko muulung ko Madnom. Me ulul ngay ni gaar: “Gu fal’eg e motoyil ko gubin e welthin, ma kug mada’nag boor e Pi Mich Rok Jehovah, ma tafinay rog e dabug ni nge m’ay e re muulung ney.” Tomuren ni sul nga tabinaw rok, me tabab ni nge un ko fol Bible me tomuren aningeg e pul me mang reb e publisher ndawori un ko taufe. Me ulul ngay ni gaar: “Kug felfelan’ ni kug pirieg fare invitation u langan e mab rog, ya chiney e ke yib fan e yafas rog!”
Boch e girdi’ ni ke yag reb e invitation ngorad e ba mudugil ni yad ra un ko fare convention. Ere ngad wereged fapi babyor ni bay rogon ko convention u fithik’ e pasig. Pi invitation ni ke aw e ngan fek ko convention, ya ngan fanay ni ngan machibnag boch e girdi’ u fithik’ e sabethin.
[Kahol ko page 5]
Uw Rogon ni Ngad Wereged fare Invitation?
Susun ndabi yoor e thin ni nga dogned, ya nge yag ni ngad wereged e pi babyor ni fan ko convention nib papey u lan e pi binaw ni gad ma machib riy. Rayog ni ngad gaargad: “Gamad be un i wereg e re gi babyor ney ni ireray ban’en ni yibe rin’ u ga’ngin yang u fayleng. Baaray e birom. Faanra ga ra beeg ma ra tamilang u wan’um e n’en ni bay riy.” Ngam wereg u fithik’ e pasig. Nap’an ni ga ra un i wereg e re invitation ney u nap’an e Sabado ara Madnom, ma thingar da uned i wereg e pi magazine rodad.