Gubin Ngiyal’ ni ke Fal’eg Rogon ke Par ni ra Ayuwegdad
1. Uw rogon nrayog ni nge war be’ ko tirok Got ban’en?
1 Anna, ni ir e walag ni ppin ni de un figirngin ko machib ma ba gel e maruwel ni be tay, me ere mo’maw ni nge un ko urngin e muulung, ma nge un ko machib, ma nge fil e Thin Rok Got. Yugu aram rogon ni ba t’uf Jehovah rok, ma ke tal boch ko machib. Ma bay e falfalan’ riy ya piin piilal e kar pied e ayuw nib spiritual ngak.
2. Uw rogon ma rayog ko urngin e Kristiano ni ngar pied e ayuw ko girdi’ ko ngiyal’ nib t’uf?
2 Be’ ni be fol ko ayuw nib spiritual ni ma pi’ fare ulung ni Kristiano e be dag ni be taga’ nga daken Jehovah. Piin piilal ko ulung e be folwok rok Jesus Kristus rogon ni ma pi’ e ayuw u fithik’ e t’ufeg ma yad ma gayiy rogon ni ngar pied e athamgil nga laniyan’ e piin ni be magawon ko tin nib spiritual ban’en mar ayuweged yad. (1 Thess. 5:14) Boor yay ma ke mus nib t’uf rok be’ ni ngan pi’ e athamgil nga laniyan’ min weliy e thin ko Bible ngak. Urngin e Kristiano ma gathi ke mus ni piin piilal e susun ni ngar pied e ayuw ko piin nib war ko tirok Got ban’en. Dabi siy ni gad gubin ma ke yib angin ngodad ni bochan e “thin nnog ko ngiyal’ nib m’ag ngay.”—Prov. 25:11; Isa. 35:3, 4.
3, 4. Mang e ba l’ag ngay ni ngan ayuweg e girdi’ ma uw rogon nrayog ni ngad rin’ed?
3 Ngam Rin’ Ban’en: Ba t’uf ni ngad rin’ed ban’en ni ngad ayuweged e piin nib t’uf e ayuw ma ngad lemnaged yad u fithik’ e yul’yul’. Nap’an ni ke tamilang u wan’ Jonathan ni ke magafan’ David ma ke “yan i guy David u Horesh, ni fan ni nge pi’ e athamgil nga laniyan’.” (1 Sam. 23:15, 16) Ngam par nib sumunguy u nap’an ni ngam ayuweg e girdi’. Ra yib angin ni ngan weliy e thin u fithik’ e yul’yul’. Maku i tamilangnag Jesus ni ba t’uf ni ngan athamgil u fithik’ e pasig ni ngan ayuweg reb e walag nge gel ko tirok Got ban’en. (Luke 15:4) Faanra rriyul’ ni gad ba adag ni ngad ayuweged be’ ma aram e gad ra athamgil ni ngad pied e ayuw ngak ni mus ni be sagaal ni nge mon’og iyan.
4 Rib fel’ ni ngada pininged e girdi’ nge piin ni be un ko bookstudy rodad ngar uned ngodad ko machib! Nap’an ni ngada ayuweged e tapigpig rok Jehovah nge un ko machib ma rayog ni ngad pied e athamgil nga laniyan’. Pi ngiyal’ nem ni ngad pared u taabang ko pigpig ku Jehovah e ma pi’ e athamgil nga laniyan’ e piin ni kar wargad ko tirok Got ban’en.
5. Mang ayuw nrayog ni nge pi’ e piin piilal u nap’an nib t’uf?
5 Ba Ayuw ni Kan Pi’ u Fithik’ e T’ufeg: Piin ni dawora uned ko machib fa ke n’uw boch nap’an ni yad be un ko ulung ma sana ba t’uf rorad ni ngan ubing e michan’ rorad. Sana ba t’uf ni ngan fil e Bible ngorad u daken e babyor ni Worship the Only True God, Draw Close to Jehovah, ara What Does the Bible Really Teach? Ke un facha’ ko taufe me ere de t’uf ni ngan fil e Bible ngak nib n’uw nap’an. Susun ni nge par fare Congregation Service Committee ni yad be tiyan’ ko piin ni ra yib angin ngorad ni ngan fil e Bible ngorad.—Mu guy e pi Deer ko fare babyor ni Machib Rodad Ni Fan Ko Gil’ilungun Got ko December 1998 nge November 2000.
6. Uw rogon ni ke gel reb e walag ni ppin ko machib biyay?
6 Anna, ni ir fare ppin ni kan weliy u murung’agen faram e ke fol ko ayuw ni pi’ e piin piilal ni kar yarmiyed ni reb e walag ni ppin nib ilal boch e ra fil e Bible ngak. Ke mus ni aningeg yay ni kan fil e Bible ngak me ke chugur ngak Jehovah biyay. Ke un ko pi muulung biyay me un i pining e sorok ku Jehovah Got u fithik’ e yoor. Fare walag nib ilal e ke ayuweg ni nge un ko machib ya ke yog ni nge un ngak ko boch e Bible study rok nge mada’ ko ngiyal’ ni ke yog ni nge un ko machib u mit e tabinaw iyan. Ere ke mus nib t’uf rok ni ngan ayuweg boch me sul ko machib!
7. Mang angin ni ma yib ni ngan ayuweg e girdi’ ngar gelgad ko tirok Got ban’en?
7 Ngan gelnag laniyan’ e piin nib t’uf e ayuw ma ra yib angin ngak urngin e girdi’. Fa en ni yibe ayuweg e ma falfalan’ ya be chugur ngak Jehovah ma be un ko pi n’en ni ma rin’ e ulung Rok. Piin piilal e ma falfalan’ ni ngar guyed e piin ni be mon’og iyan ko tirok Got ban’en. (Luke 15:5, 6) Girdien fare ulung e be chugur u taabang u nap’an ni ra bagayad e be lemnag bagayad u fithik’ e t’ufeg. (Kol. 3:2-14) Aram fan ni rib fel’ ni ngad folgad rok Jehovah ni gubin ngiyal’ ni ke fal’eg rogon ke par ni ra ayuwegdad!