Guruy Ni 5

Organized to Do Jehovah’s Will

Piin ni rayog ni ngan dugliy ngar manged pi tagafaliy e saf ko ulung rok Got e susun ni be m’ug riy ko yafos rorad ni yad ba gonop. Faanra yad ba mabgol ma thingara folgad ko motochiyel ko Kristiano ko mabgol ni aram e thingari par ni taareb e ppin rok ma thingari yog rok ni gagiyegnag girdien e tabinaw rok nib fel’ rogon. Faanra fare piilal e bay e bitir rok ma dabi siy nib mich Kristus u wun’rad ma de kireb thiyrad ko yanyan ni yad be tay ara reb e darir folgad, ma aram ma girdi’ ko ulung e ra motoyil ko fonow ni pi’ fare piilal ni fan ko pi n’en nib l’ag ko par ko tabinaw nge par ko Kristiano. Pi pumoon ney e yad e piin nib fel’ e ngongol rorad u lan e tabinaw ngu lan e binaw, ma yad e piin nib fel’ thiyrad nge pangirad mab yal’uw, ma susun yad e piin ni ma tay e girdi’ fan, ni girdi’ ni gathi yad girdien e galesiya. Dabiyog ni ngan nog ni kar rin’ed ban’en nib kireb min nog e thin nib kireb u murung’agen e ulung. Ma dar rin’ed ban’en nib kireb min gechignagrad ara reprove ni de n’uw nap’an faram. Yad ra k’aring e girdi’ ko ulung ngar folgad rorad ma yad ra pagan’ ngorad.​—1 Kor. 11:1; 16:15, 16; Fil. 2:25, 29; Heb. 13:7, 17.

Pi pumoon ni aram rogon e ra pigpig ko ulung ko Kristiano ni bod rogon e pi piilal nu Israel ni yad e piin nib “gonop, nge yul’yul’.” (Deut. 1:13) Dabiyog ni ngar pared ni dariy e denen rorad. (Rom. 3:23) Machane girdi’ ko ulung nge girdi’ u lan e binaw e ra nang ni yad e piin nib mat’aw ma bay madgun Got u wun’rad ya kar daged ni yad ma fol ko pi motochiyel rok Got ko yafos rorad. Yad ra par nib yal’uw me ere rayog ni ngar pied e fonow ko ulung.

Pi pumoon ni rayog ni ngar manged piilal e susun ni yad be par nib thabthabel ko pi n’en ni yad ma rin’, nge rogon ni yad ma ngongol ngak e girdi’. Gathi yad ra pasig nib pag rogon, ya yafos rorad e ra par nib thabthabel mab yaram ma yad ma k’adan’. Yad ra par nib thabthabel ko damunmun nge unum, nge fafel. Ma yad ra par nib thabthabel ko muun alkul ma yad ra guy rogon ni dabiyog ni ngan nog ni yad e piin ni tachingaw ara piin nib ta ching ni ma k’aring e cham. Be’ ni ke ching ma dabiyog ni nge lem nib fel’ rogon e rayog ni nge dabki t’ar laniyan’ ma dabiyog ni nge ayuweg e ulung ko tirok Got ban’en.

Ra yog be’ e thin ko ulung ma ba t’uf ni nge dag ni ir be’ nib yaram ma ma ba yaram ko par rok, nge wok rok, nge maruwel. Re n’ey e ba muun ngay rogon e munmad, nge tabinaw rok, nge pi n’en ni ma rin’. Be’ ni aram rogon e dabi sagaal ni nge rin’ boch ban’en, ma rayog ni nge guy e pi n’en nib t’uf ma nge fl’eg rogon nib puluw. Ma fol ko yaram nib theocratic.

Be’ ni piilal e thingari par nib munguy. Thingari yog rok ni nge maruwel u taabang yugu boch e girdi’ nge piin piilal, ya mil fan ngorad ni ngar ayuweged e ulung. Susun rogon ni be lemnag ir e ba puluw nge m’ag ko yugu boch e girdi’, ni girdi’ ko ulung nge girdi’ ko binaw. Bochan ni ir be’ nib munguy ma fare piilal e dabi gel e lem rok ni be lemnag ni kab fel’ e tafinay rok ko tin ni ka bay e piilal. Ya sana kab salap yugu boch e piilal ko boch ban’en. Munguy e aram angin ni yib ngak be’ ni ma turguy boch ban’en u daken e thin ko Bible ma be athamgil ni nge folwok rok Jesus Kristus. (Fil. 2:2-8) Be’ ni piilal e ra tay fan yugu boch e girdi’ ma ra lemnag ni yad ba tolang ngak, ma aram ma dabi cham ma dabi pirdiiy be’ fa tugthin. Ma dabi ufanthin, ni ra gelan’ me yog ni lem rok e ir e bin th’abi fel’ e n’en ni ngan rin’.

Maku be’ ni ra mang reb e piilal e susun nrayog ni nge t’ar laniyan’. Ere susun ni nge nang fan e pi motochiyel rok Jehovah nge rogon ni ngan fol riy. Susun ni nge par nib munguy ma dabi papey ni nge pufthinnag be’. Susun ni nge motoyil ko fonow ni kan pi’ ngak me pag ni ngan pow’iy. Ma susun dabi par ni dabiyog ni nge turguy ban’en, fa ba dake modingnag ir, fa ba pasig nib pag rogon.

I yog Paul ku Titus ni be’ ni piilal e susun ni ir be’ ni ba adag e tin nib fel’. Susun ni ir be’ nib yul’yul’ ma ba thothup. Pi felngin ney e ra m’ug ko ngongol rok ngak e girdi’ nge rogon ni be par nib mudugil ko tin nib mat’aw nge fel’. Dabi maruwar ko pigpig ku Jehovah ma ra par ni gubin ngiyal’ ma be tay tanggin e pi motochiyel nib mat’aw u nap’an ni be turguy ban’en. Ma susun ni dabi wereg e thin u murung’agen ban’en nsusun dabi yog ko girdi’.

Ir be’ nib puluw e lem rok me ere dabi yog ko girdi’ ni ngar rin’ed ban’en dabiyog rorad. Ma dabi par ni goo be lemnag ko uw rogon nge par nib fel’ rogon, ya dabi chogowag e salpiy, ma dabi t’uf e salpiy rok. Dabi fanay e liw rok ni nge k’aring e pi walag ni ngar pied e chugum ara salpiy ngak, ma dabi tel ir nge pi’ e tayim rok ni nge ayuweg e ulung ni bochan e thingari pag fan me lus boch ban’en. Bochan ni ba t’uf pi walag rok nge pi milekag, ma ra adag ni nge ayuwegrad ngar bad nga tabinaw rok, ma ra pi’ ir nge tirok ni nge ayuweg yugu boch e girdi’.​—Acts 20:33-35.

Ba t’uf rok e piilal ara tagafaliy e saf ko ulung ni nge yog rok ni nge machib ni fan ni nge rin’ e tin nib mil fan ngak. Rogon ni yog Paul ngak Titus ma fare piilal e “thingari dabi pag e thin rok Got ni ir e nge pagan’uy ngay, ma ba puluw ko tin ni yibe machibnag ngak e girdi’. Ereray kanawoen me fil e tin nib riyul’ ngak boch e girdi’ me pi’ e athamgil nga lanin’rad, me ki dag ngorad e oloboch ni ke tay e piin ni yad be togopluw ko re thin ney.” (Titus 1:9) Rogon ni nge machibnag fare piilal e girdi’ ma ra weliy fan ngak e girdi’, ma ra puluwnag e thin ko Bible uw rogon nra pagan’ e girdi’ ma ra gelnag e michan’ rorad. Fare piilal e ra salap i machibnag e girdi’ ndemturug ko kari mab e kanawo’ ngak fa dawor. (2 Tim. 4:2) Ma rayog rok ni nge gum’an’ me pi’ e fonow u fithik’ e munguy ngak be’ ni ke oloboch fa nap’an ni be weliy fan ngak be’ ni ke maruwaran’ me k’aring ni nge mich u wan’ me ngongol nib puluw ngay. Ra dag fare piilal ni rayog rok ni nge rin’ e re n’em u nap’an ni be welthin ko ulung ara be machibnag be’.

I yoloy Peter ni piin piilal ko ulung e susun ni nge m’agan’rad ma ngar adaged ni ngar pigpiggad ko ulung ma dabra rin’ed nde m’agan’rad ngay. Susun ni ngar pasiggad ko maruwel rorad. Susun ni yad be yog e thin ko ulung, ma yad be par nib fel’ pangirad ya ngar folwokgad rorad.​—Heb. 13:17.

Urngin e pi n’ey ma aram boor ban’en ni thingari rin’ be’ ni ir e piilal. Ma dabi siy ni dariy reb e piilal nrayog ni nge rin’ urngin ban’en ni bay ko Bible u rogon ni kan weliy ko pi thin ney, machane susun dariy reb e piilal ni ri der fol ko reb e pi n’ey ni aram thibngin nib lingagil. Boch e piilal ma bay boch ban’en ni ri yad ba salap riy, ma boch e piilal ma bay yugu boch ban’en ni yad ma rin’ nib fel’ rogon. Ma angin ni yib riy e urngin e piilal ko ulung e yad ra par u taabang ni bay rorad urngin ban’en nib t’uf ni ngan ayuweg e ulung rok Got.

Nap’an ni ngan nog ko mini’ e ran dugliy ngar manged piilal, ma piin piilal ko ulung e dabra paged talin ko uw rogon thilrad Jehovah nge pi Kristiano. Be weliy ko Roma 12:3 ni “gad gubin ndab ud tolangniged gadad u lanin’dad nge pag rogon e lem nsusun e nguud tiyed, machane nguud lemgad u fithik’ e lem nib sobut’, me bagadad me gonopiy u wan’ e tin nrayog rok nib m’ag nga gelngin e michan’ rok ngak Got ni ke pi’ Got ngak.” Ra be’ ma susun ni nge lemnag ni ir e ba sobut’. Dariy be’ nsusun ni nge par ni ir be’ nib “mat’aw nib pag rogon” u nap’an ni yibe yaliy ko mini’ e rayog ni nge mang piilal. (Ekl. 7:16) Piin piilal ko ulung e ra lemnag ko mang e be yog e Bible u murung’agen e pi n’en nib t’uf ko piin piilal, ma yad ra turguy ko be fol reb e walag ko pi thin nem u rogon nrayog fa bay reb e motochiyel ko Bible ni gathi be fol riy me ere dabiyog ni nge mang piilal. Piin piilal ko ulung e ra lemnag ni urngin e girdi’ ma bay thibngirad, ma dabra pared ni yad ba laniyan’, ma rogon ni yad ra turguy ko mini’ e ra mang piilal ma yad ra tay fan e pi motochiyel rok Jehovah ma yad ra lemnag ko uw rogon nra yib angin ngak fare ulung. Bod rogon Timothy nge Titus ma ba t’uf ko piin piilal ko ngiyal’ ney ni ngar lemgad u fithik’ e meybil u nap’an ni yad ra turguy ko mini’ e ra mang piilal ma yad ra pag fare kan ni thothup rok Got nge pow’iyrad. Aram ban’en nib ga’ fan nib mil fan ngorad ma thingara rin’ed u rogon ni yog Paul ni ‘dab mu gur ngam tay paam nga daken be’.’​—1 Tim. 5:21, 22.

Pi pumoon ni bay rogon ni ngar manged piilal ko ulung ni Kristiano e rayog ni ngar ayuweged e ulung ko riya’ nib spiritual, ma yad ma tay e kanawo’ nib fel’ ko ngongol ko Kristiano. Rayog ni ngar rogned e thin nib puf rogon, ma rayog ni dabra telgad ni ngar pied e fonow nib t’uf ngak e girdi’ ko ulung ma ngar pasiggad i wereg fare thin nib fel’.​—Acts 4:29; 1 Tim. 3:13; Heb. 10:19-23, 35.

WOM’ENGIN FARE KAN NI THOTHUP

Pi pumoon ni bay rogon ni ngar manged piilal e ra micheg ko yafos rorad ni kan ni thothup e be pow’iyrad. Ra m’ug rorad wom’engin fare kan ni thothup ni bay ko Galatia 5:22, 23 ni “t’ufeg, falfalan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.” Rogon ni yad ra ayuweg fare ulung ma ra falfalan’ e pi walag ma fare ulung e ra maruwel u taabang ko pigpig nib thothup. Ngongol rorad nge maruwel ni yad be tay e ra micheg ni kan ni thothup e dugliyrad. (Acts 20:28) Kan tamilangnag ko Bible ko mang e ba t’uf ko piin piilal nge pi tagafaliy e saf ma aram ma rayog ni ngan dugliy e piin ni bay rogon ni ngar gafaliyed e ran’ i saf ko ngiyal’ ney.

PI PUMOON NI MA MON’OGNAG E TAAREBAN’UY

Ri baga’ fan ko piin piilal ni ngar maruwelgad u taabang ngar ayuweged e ulung nge taareban’rad. Ba thilthil pangirad machane yad ma athamgil ni nge taareban’rad ya ra bagayad e ma tay fan bagayad ma yad ma motoyil ngorad ni yugu demtrug ni gathi ba taareb rogon e lem rorad ko urngin ban’en ni yad ra puruy u murung’agen. Faanra gathi be th’ab e motochiyel ko Bible, ma susun ni nge m’agan’rad ngay ni ngar ted tangin e n’en ni turguy e piin piilal u taabang. Be’ ni ma t’ar laniyan’ e be dag ni “fare gonop ni yib u tharmiy” e be pow’iy ni aram ba gonop ni “ma fal’eg thiliy nge aw e gapas riy, ma ma sumunguynigey.” (Jas. 3:17–4:1) Dariy reb e piilal ni susun ni nge lemnag ni ir e ba tolang ngak e tin ni ka bay e piilal ko ulung, ma susun dabi guy rogon ni nge gagiyegnagrad. Piin piilal e be maruwel u taabang Jehovah u nap’an ni yad ma maruwel u taabang ni fan ko ulung.​—1 Kor. Guruy ni 12; Kol. 2:19.

NGAN ATHAMGIL NI NGAN UN NGAY

Pi pumoon ni Kristiano nib ilal e ra adag ni ngar manged piilal ko ulung. (1 Tim. 3:1) Machane ran dugliy ma aram e boor e maruwel ni thingari rin’ ma ba t’uf ni nge pag fan. Thingari pigpig ko pi walag me ayuwegrad ko tirok Got ban’en. Ra athamgil be’ nge mang piilal ma aram ma be athamgil ni nge rin’ e pi n’en ni bay ko Bible ni fan ko piin piilal. Boor ban’en nib mil fan ngak e piin piilal ma thingara ayuweged e piin ni kan tay nib mil fan ngorad.

Piin piilal e ma tay fan e pi thin ko Hebrew 13:17 ni be yog ni yad e “piin ni ma yog e thin,” ni yad be “matanagiy laniyan’ ” e pi walag ya “thingar rogned ngak Got rogon e maruwel rok ni ur ngongliyed.” Thingari ayuw e pi piilal ni dabra ‘suweyed’ fare ran’ i saf rok Got, ma dabra ngongliyed e maruwel rorad ni bochan ni nge yog ban’en ngorad, ma dabra pigpiggad ni bochan e yibe towarsariyrad. Thingari micheg e pi piilal ni yad ma gafaliy e ran’ i saf rok Got u fithik’ e t’ufeg.​—1 Pet. 5:2, 3; Prov. 27:23.

Hebrews 13:17 e be pi’ e fonow ko girdi’ ko ulung ni gaar: “Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra dangay ma bay ur ngongliyed nib taganan’rad, ma aram e dabi fel’ rogomed riy.” Yugu aram rogon ni dar flontgad e piin piilal, machane susun dariy be’ ko ulung e ra par ni dabi fol rorad, ya aram ban’en ni yarmiy Jehovah ma pi piilal e thingara dum’gad Ngak ko tin ni kar rin’ed. Yad owchen Jehovah nge gagiyeg rok nib theocratic. Ma fanay Jehovah e kan ni thothup ni nge dugliy be’ ma re kan ni thothup nem e ku ma chuweg e girdi’ ko liw rorad ni faanra de m’ug rorad wom’engin fare kan ni thothup ma dar folgad ko tin nib t’uf ko Bible ni ngar rin’ed.

Gathi gad ma pining e magar ko maruwel nib gel nge kanawo’ nib fel’ ni be tay e pi piilal ko ulung? I yoloy Paul e babyor ngak fare ulung nu Thessalonika me weliy ko pi walag ni gaar: “Gamad be wenig ngomed, pi walagmad ni girdien Kristus, ni ngam tiyed fan e piin ni yad be maruwel u fithik’med, ni piin ni ke mel’egrad Somol ni ngar pow’iyed gimed mi yad fonownagmed. Ngari mu ted farad mi gimed t’ufegrad ni bochan e maruwel ni yad be rin’. Mu um pired nib fel’ thilmed.”(1 Thess. 5:12, 13) Maruwel nib gel ni ma tay e pi piilal ko ulung e ma ayuwegdad nge mom boch e pigpig ku Got me gel e falfalan’ riy. Maku u lan e bin som’on e babyor ni yoloy Paul ku Timothy me weliy u murung’agen girdien e ulung nge rogon susun ni ngar ted fan e piin piilal ni gaar: “Piin ni piilal ko galesiya nib fel’ e maruwel ni yad be tay ni aram e yad be gagiyegnag girdien e galesiya e susun e ngan tafinaynag ni ba’ rogorad ni nge bagayad min pi’ puluwon ni ke l’agruw yay, ni ba ga’ ni piin nrib gel e machib ni yad be tay nge thin rok Got ni yad be fil ngak e girdi’.”​—1 Tim. 5:17.

RAYOG NI NGE THIL SALPEN BE’

Rayog ni nge aw ni reb e walag ni boor e duw ni ke pigpig nib yul’yul’ ma ke m’ar ara ke pillibthir ma dabkiyog ni nge rin’ e tin nib mil fan ngak e piilal ni bod ni rin’ kafram ara rogon ni be rin’ e tin ni ka bay e piilal. Ma yugu demtrug ma ka ran tay fan ni ir e piilal ya kan dugliy. De t’uf ni nge pag e liw rok ni bochan e dabkiyog ni nge rin’ urngin ban’en nib t’uf. Ka bay rogon ni ngan tay fan ni bod rogon e pi piilal ni be maruwel ni elmirin ni yad be pigpig nge mus rogorad riy ni ngar gafaliyed fare ran’ i saf.

Machane faanra turguy reb e walag ni kab fel’ ni nge tal ko maruwel rok ya ke thil salpen ma dabkiyog ni nge pigpig nib fel’ rogon, ma rayog ni nge tal. (1 Pet. 5:2) Susun ni ngan tay fan ma ka rayog ni nge rin’ boor ban’en ko ulung ni yugu aram rogon ni dabki rin’ e pi n’en nib mil fan ngak e piin piilal.

PI N’EN NI NGAN RIN’ KO ULUNG

Rayog ni nge dugliy fare Governing Body e pumoon ni bay rogon ni ngar uned ko piilal u yugu reb e binaw nge yugu ba ngiyal’ ni kar turguyed. De t’uf ko Governing Body ni ngar folgad ko thin ni yog e piin piilal ko reb e ulung. Ya n’en ni yog e piilal e ke mus aram e n’en ni yad be lemnag nib fel’ machane rayog ni nge dabi fol fare Governing Body ko thin rorad ya bay yugu boch ban’en ni yad manang. Maku rayog ni nge dugliy fare Governing Body yugu boch e girdi’ ni ngar turguyed ko mini’ e ra mang piilal.​—1 Tim. 1:3; Titus 1:5.

Nap’an ni ngan dugliy be’ ara ngan chuweg be’ ko piilal ma ngan nog ko ulung. Aram rogon ma rayog ni nge nang e girdi’ ko mini’ e be ayuweg e ulung ma rayog ni ngar maruwelgad u taabang ko n’en ni kan yarmiy.

Boor ban’en nib mil fan ngak e piin piilal ko ulung. Bay reb e presiding overseer nge secretary nge en ni ma conductnag fare Watchtower Study, nge overseer ko Theocratic Ministry School. Urngin fa boch e piilal e yad e Congregation Book Study overseer. Gathi ke mus ni yad ra rin’ e re n’ey ko ba ngiyal’ ni kan turguy. Machane faanra ra yan reb e walag i par u yugu reb e binaw fa dabkiyog ni nge rin’ e tin nib mil fan ngak yab m’ar ara ran chuweg ya dabki fol ko urngin e thin ko Bible ma aram e ran dugliy yugu reb e piilal ni nge rin’ e re maruwel nem. Boch e ulung ma buch uw e piin piilal me ere ba t’uf ko reb e piilal ni nge rin’ boor boch ban’en nge mada’ ko ngiyal’ nran dugliy boch e walag ngar manged piilal.

Fare presiding overseer e ir fa en ni chairman ko pi muulung ko piin piilal. Susun ni ir be’ nib salap i yarmiy ban’en ma rayog ni nge yog e thin u fithik’ e yul’yul’. (Rom. 12:8) Mmil fan ngak fare muulung ni Service Meeting. Ku ma yarmiy e public talk, ma faanra ba t’uf ma rayog ni ngan nog ko yugu reb e piilal ara ministerial servant ni nge ayuweg ko maruwel.

Mil fan ngak fa en ni secretary ni nge ayuweg e pi babyor ko ulung ma ma weliy ko pi piilal u murung’agen e pi n’en nib ga’ fan ni kan nog ngorad. Faanra ba t’uf ma rayog ni ngan nog ko yugu reb e piilal ara ministerial servant ni nge ayuweg.

Fare service overseer e ra yarmiy e maruwel ko machib nge pi n’en nib l’ag ngay. Ra fl’eg e schedule ko ngiyal’ nra yan ko ra reb e Congregation Book Study ma taab yay u gubin e pul ma ra yan ko yugu reb e book study ma ra pi’ e welthin. Ma nap’an fare wik ni ra un ko reb e book study ma ra un ngorad ko machib ko Sabado nge Madenom ma ra ayuweg e pi publisher ko return visit nge Bible study rorad. Pi ulung ni ke mus ni reb ara l’agruw e book study ma ra yarmiy ni nge yan ko ra reb l’agruw yay u reb e duw.

Yu ngiyal’ ma yibe weliy ko Machib Rodad Ni Fan Ko Gil’ilungun Got nge boch e babyor ni ma pi’ fare branch ofis u murung’agen e maruwel nib mil fan ngak e pi walag ney nge fa en ni ma conductnag fare Watchtower Study, nge fare overseer ko Theocratic Ministry School, nge pi overseer ko Congregation Book Study nge yugu boch e walag ni yad bang ko piin piilal ko ulung.

Rogon urngin e piilal ni bay ko ulung nge rogon e pi n’en nrayog ni ngar rin’ed, ma pi piilal e ra rin’ boch ban’en ni fan ko pi muulung u gubin e wik. Yibe fl’eg rogon e pi muulung ney ni ngan tamilangnag boch ban’en ma ngan ubing e girdi’ ko tirok Got ban’en. Mil fan ngak e pi piilal ni ngar pied e welthin ni ra tamilangnag ban’en. Pi piilal e ma weliy e machib ko ulung ma yad ma tay e kanawo’ ni ngan wereg e machib ma yad ma maruwel u taabang e pi publisher.

Fel’ ni pi piilal ko ra reb e ulung ni ngar puruy’gad u murung’agen rogon ni be mon’og iyan e ulung ko tirok Got ban’en. L’agruw e muulung ni aram rogon e yibe tay u nap’an ni yib fare circuit overseer. Ma susun ni ngan tay reb e muulung dalip e pul u tomren ni yib fare circuit overseer. Susun ni ba gaman aningeg e muulung u reb e duw ni nge puruy’ e pi piilal ni ngan pithig e magawon. Machane rayog ni nge turguy e pi piilal ni ngar muulunggad ko yu ngiyal’ nib t’uf. Machane faanra ra tiyan’ ra bagayad ko maruwel rok ma faanra fare presiding overseer e be yaliy ma be ayuweg e maruwel rorad, ma susun ndabi yoor e muulung ni thingari tay e pi piilal.