Ngam Folwok Rok Kristus Uw Rogon ni Ga ma Machibnag e Girdi’
1 I tay Jesus e kanawo’ ni ngad leked ko machib. I t’ufeg Got nge girdi’ nib gel ma ke dag e re n’em boor yay ngu boor e kanawo’. I skulnag e piin nib sobut’an’ ko thin nriyul’ ma ke rin’ boor ban’en nib gol ngak e piin nib gafgow.—Matt. 9:35.
2 Kanawo’ nge Machib ni Tay Jesus: De pag Jesus ir nge un ko ngongol ko am nge pi n’en ni ma rin’ e girdi’ ni fan nge fel’ rogon e binaw. Ma de pag ni nge m’on ko maruwel rok ni baga’ fan boch ban’en ni yibe lemnag ni tin nib fel’ ban’en. (Luke 8:1) I tiyan’ ko maruwel ni nge wereg fare thin nib fel’ ko Gil’ilungun Got ni aram e n’en nra pithig e magawon ko girdi’ ma kari mus. Ba gel e maruwel ni thingari rin’ Jesus ma buch uw e tayim ni nge rin’. Nap’an ni ba adag e girdi’ nu Kapernaum ni nge par Jesus u rom me gaar ko pi gachalpen: “Thingar darod ko pi binaw nib chugur ngaray, ya ngku gu machib riy, ya er fag ni ku gub.”—Mark 1:38.
3 I skulnag Jesus pi gachalpen me l’ograd me gaar ngorad: “Marod ngam machibgad ni nge lungumed, Gagiyeg rok Got e ke chugur!” (Matt. 10:7) I fil ko pi gachalpen ni ngar m’oneged tirok Gil’ilungun Got ban’en ko yafos rorad. (Matt. 6:33) Nap’an ni be yan Jesus nga tharmiy me tamilangnag ko pi gachalpen ko mang e ngar rin’ed. I gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup,”—Matt. 28:19.
4 Uw Fene Ga’ Fan Gil’ilungun Got: Gil’ilungun Got e aram kenggin e thin ni i machibnag Jesus ma ke yog ko pi gachalpen ni ngar folwokgad rok. Dabi yib angin e n’en ni ma rin’ e girdi’ ni ngar pithiged e magawon ko fayleng. (Jer. 10:23) Kari mus ni Gil’ilungun Got e ra n’uf fithingan Got ma ra pithig e magawon ko girdi’ nge mus rogon. (Matt. 6:9, 10) Ngan fil e thin nriyul’ ko Gil’ilungun Got ko girdi’ ni be “kireban’ ko urngin e tin nib kireb ni yibe rin’” ma ra ayuwegrad ngar pared nib falfalan’ e chiney me l’agan’rad ko gabul nge langleth.—Ezek. 9:4.
5 I ul’ul’ Jesus ni nge ayuweg fare maruwel ni ngan wereg fare thin nib fel’ ko Gil’ilungun Got, ma i micheg ni ra ayuwegdad. (Matt. 28:20) Uw rogon ni gad be fol ko kanawo’ ni tay Jesus ni fan ko machib? (1 Pet. 2:21) Ngiyal’ ney ni tin tomren e rran ma ngad rin’ed urngin ban’en nrayog ni ngad folwokgad rok Jesus ko machib!