Kan Pi’ e Machaf Ngodad ni Ngad Ayuweged

¹ I tay apostal Paul fan e maruwel ni pi’ Got ngak ni nge wereg e machib ma ke yog ni aram e “machaf.” (2 Kor. 4:7) I athamgil u fithik’ e gafgow nge magawon ni nge lebuguy e re maruwel nem. De tal ni nge weliy e machib ngak urngin e girdi’ nrayog. I milekag boor e mayal nib mo’maw ma bay e riya’ riy u but’ ngu maday. Uw rogon nrayog ni ngad folwokgad rok Paul ma ngad daged ni gad ma chaariy e maruwel rodad ko machib? (Rom. 11:13) Mang fan ni maruwel ko machib e aram ba machaf ni bin th’abi fel’?

² Ba Machaf ni Bin Th’abi Fel’: Machaf nu fayleng e rayog ni nge yibnag e gafgow ma angin ni yib riy e dabi par ndariy n’umngin nap’an. Ma machib rodad e ma yibnag angin ngodad nge yugu boch e girdi’. (1 Tim. 4:16) Ma ayuweg e piin nib yul’yul’ ni ngar nanged Jehovah ma ngar thiliyeged e par rorad uw rogon nib t’uf ma ma pi’ e athap ngorad ni yafos ni manemus. (Rom. 10:13-15) Faan gad ra tay fan e maruwel rodad ko machib ma bay fan e yafos rodad ma ma fl’eg lanin’dad, ma bay e athap rodad ko gabul nge langleth.​—1 Kor. 15:58.

³ Ngam Dag ni Ga Ma Tay Fan e Machaf Rom: Rogon ni gad ma tay fan ban’en e be m’ug riy uw rogon ni gad ra pi’ puluwon ni fan ni nge yog ngodad. Ri gad ba tow’ath ya rayog ni ngad ted e tayim rodad nge gelngidad ni ngad pininged e sorok ku Jehovah! (Efe. 5:16, 17) Tin ni gad ma rin’ e susun ni nge dag ni tirok Got ban’en e kab baga’ fan ko tin nu fayleng ban’en. Bay ban’en nib ga’ fan ni ngad wereged, me ere gad ra machib u fithik’ e pasig ma gad ra wereg fare thin nib fel’ u gubin ngiyal’ nrayog.

⁴ Pi machaf nib tolang puluwon e gathi yima mithag ya yima tay u bang ni fan ni nge guy urngin e girdi’. Faanra gad ma lemnag ni machib rodad e aram ba machaf, ma ra aw ni aram ban’en nib ga’ fan ko yafos rodad. (Matt. 5:14-16) Ngad ted fan e maruwel rodad ko machib ma ngad boded apostal Paul ngad pared ni gubin ngiyal’ ma gad be dag ni baga’ fan u wan’dad e machib ni bod e machaf.