Deer

◼ Mang boch e riya’ riy ko ngam fanay e Internet ni ngam cheg ngak be’ ni da mu nang?

Kan fl’eg boch e Web site ni fan e ngan mada’nag e girdi’ min non ngorad u daken e Internet. Boor e Web site e ma pag ni nge ngongliy e girdi’ ba page ni ngar weliyed u murung’agrad, nib muun ngay e sasing nge yugu thin ni murung’agrad. Ma girdi’ ni kar guyed e re page nem e rayog ni ngar yoloyed boch e thin ngak. Rib lingagil e pi Web site nem ko piin ni fel’ yangaren, ma boch e piin ni fel’ yangaren u lan e ulung e kar fanayed ni ngar sabethingad yugu bitir ni u rogned ni yad e Pi Mich Rok Jehovah.

Mom ko girdi’ ni gad ra mada’nag u daken e Internet ni ngar bannaged gadad ko yad mini’, nge rarogon ko tirok Got ban’en, nge tin ni yad be nameg. (Ps. 26:4) Be’ ni ke yog ni ir reb e Mich Rok Jehvoah e sana ir be’ nde mich Jehovah u wan’, ara ir be’ ni kan tharbog, ara ir be’ ni ke digey e tin riyul’. (Gal. 2:4) Boor e girdi’ ni ka nog e pedophile ngorad e yad ma fanay e pi Web site nem ni ngar gayed e pi bitir.

Mus ko ke mich u wan’dad ni ba fel’ facha’ u wan’ Got ma ba fel’ e par riy u lan e ulung, machane sabethin ni aram rogon e rayog ni nge tor ko tin kireb. Ya be’ ndawori mada’nag be’ e ba ga’ nra lemnag u rogon nde puluw. Maku ma lemnag ndariy be’ e rayog ni nge guy e thin nib online ma ma lemnag ndabi nang yugu girdi’ u murung’agen e thin ni ra yoloy, ni bod e gallabthir rok ara piin ni piilal. Ke aw boch e piin ni fel’ yangaren ko pi tabinaw ni Kristiano ko wup, ya ke yib e thin nib kireb u l’ugunrad. (Efe. 5:3, 4; Col. 3:8) Yugu bitir e kar ted e sasing rorad ni ba m’ag ko darngal, nickname rorad nde yaluw, ara musik video nde yalen u daken e computer page rorad.

Bochan e pi n’en nem, ma susun ni nge yaliy e gallabthir e tin ni be rin’ e bitir rorad u daken e computer. (Prov. 29:15) Bay e riya’ riy ni ngam pining be’ ni da mu nang nge yib nga lan e naun rom ara ngam pag ni nge cheg ngak e bitir rodad ni goo yow. Maku bay e riya’ rodad nge bitir rodad ni ngar fagergad e girdi’ ndar nanged u daken e Internet, ni mus ko yad ra yog ni yad e Pi Mich Rok Jehovah.​—Prov. 22:3.