Fan ni Gad Ma Sul Ngak e Girdi’ ni Boor Yay

1. Mang reb e deer ni ke m’ug u murung’agen e machib u mit e tabinaw?

¹ Ba ga’ ni gad ma sul ko territory rodad ni boor yay. Gad ma sul nga reb e tabinaw ni boor yay ni yugu aram rogon ni ma yog e girdi’ ngodad ni dubrad e machib. Mang fan ni gad ma sul ngak e girdi’ ni ke yog ngodad ndubrad e machib?

2. Mang fan ni gad ma athamgil i ul’ul ko machib u mit e tabinaw?

² T’ufeg ku Jehovah nge Girdi’: Fan ni gad ma athamgil i ul’ul ko machib u mit e tabinaw e ba t’uf Jehovah rodad. Gum’irchadad e ma k’aringdad ni nguuda weliyed ngak yugu girdi’ u murung’agen e Got rodad. (Luke 6:45) T’ufeg rodad ku Got e ma k’aringdad ngad folgad ko pi motochiyel rok ma ngad ayuweged yugu girdi’ ni ngar folgad rok Got. (Prov. 27:11; 1 John 5:3) Faan gad ra par nib yul’yul’ ngad k’adedan’dad ko re maruwel ney ma dabi aw nga rogon ni ma fulweg e girdi’ ngodad. Mus ko fa bin som’on e chibog ni kan togopuluw ngak e pi Kristiano, machane ka ur machibnaged fare thin nib fel’ ni “urngin e rran nra ul’ulgad ngay.” (Acts 5:42) Faanra dabun e girdi’ ni ngar motoyilgad ngodad, ma dab da paged ni nge mulan’dad ngay, ya gad ra par ni gad ba mudugil ma ngad micheged ni ba t’uf Jehovah rodad ma gad ba yul’yul’ ngak.

3. Uw rogon ni t’ufeg ko girdi’ e ra ayuwegdad nguuda ul’ulgad i yan ko machib u mit e tabinaw?

³ Ku gad ma athamgil i ul’ul ko machib u mit e tabinaw ni bochan e ba t’uf e girdi’ rodad ni yad mmigid ngodad. (Luke 10:27) Dabun Jehovah ni nge thang e fan rok taabe’. (2 Pet. 3:9) Mus ko territory ni boor yay ni gad ma sul ngay, ma ka gad be pirieg e girdi’ ni ba adag ni nge pigpig ku Jehovah. Susun, u Guadeloupe, ma 1 guruy ko 56 guruy e girdi’ u daken e donguch e ir e Mich Rok Jehovah, ma 214 e kan taufenagrad ko fa binem e duw. Gonap’an 20,000 e girdi’ ni kar uned ko fare Puguran, ni aram 1 guruy ko 22 guruy e girdi’ u daken binem e donguch!

4. Uw rogon ni ma thil boch ban’en u lan e territory?

⁴ Ma Thil Boch Ban’en u Lan e Territory: Ma thil boor ban’en u lan e territory rodad. Bin migid yay ni ngad sulod nga reb e tabinaw ndabun e machib kafram, ma sana ra bing yugu reb e girdi’ e mab ko re tabinaw nem​—ndawori rung’ag fare thin nib fel’—​ma ra motoyil ngodad. Ara sana gad ra mada’nag be’ ko yugu reb e tabinaw ni ra fel’ e machib u wan’. Maku bitir ko tabinaw ni ke togopluw e gallabthir riy e ra ilal iyan me chuw ko tabinaw rok. Sana ra fel’ fare thin nib fel’ u murung’agen Gil’ulungun Got u wan’rad.

5. Mang e ra k’aring e girdi’ ni ngar motoyilgad ngodad?

⁵ Maku ma thil rarogon e girdi’. Som’on ma i par apostal Paul ni tatogopuluw ni yog e thin nib kireb me gafgownag e girdi’ rok Got. (1 Tim. 1:13) Ku aram rogon e ngiyal’ ney, boor e girdi’ ni yad be pigpig ku Jehovah e ngiyal’ ney e dubrad e tin riyul’ kafram. Sana boch i yad e kar togopuluwgad ko fare thin nib fel’ u ba ngiyal’. Faani thil rarogon e fayleng, ma sana ra motoyil e girdi’ ni tatogopuluw ara girdi’ ni ba laniyan’ ngodad. Ma sana ra motoyil yugu girdi’ ngodad u tomren ni ke yib e magawon ngorad, ni bod ni ke yim’ reb i girdien e tabinaw rorad, ara kan talegrad ko maruwel, ara ba’ e magawon ko salpiy rorad, ara de fel’ fithik’ i dowrad.

6. Mang fan ni susun ni nguuda machibgad ni gad ba pasig?

⁶ Bayi m’ay e re m’ag ney, machane maruwel rodad ko machib e be gur i yan. (Isa. 60:22) Ere, nguuda machibgad i yan ni gad ba pasig ma ba puluw lanin’dad ngay. Sana bin migid e girdi’ ni gad ra machibnag e ra motoyil ngodad. Ba t’uf ni nguuda machibgad! “Ya faanra mu rin’ ma ga ra ayuwegdad nge piin ni yad ma motoyil ngodad ngar thapgad ngak Got.”​—1 Tim. 4:16.